“Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.”​—1 JOHN 5:3.

1, 2. Nso inam fi ama Jehovah Abasi?

NDI amama Abasi? Edieke edide ama ayak idem fo ọnọ Jehovah Abasi, afo edibọrọ ih ke ofụri esịt—ndien emenen ndibọrọ ntre! Edi ndammana n̄kpọ nnyịn ndima Jehovah. Ke akpanikọ, nnyịn ima Abasi ke ntak emi enye akamade nnyịn. Bible ọdọhọ ete: “Nnyịn ima ima, koro enye [Jehovah] ekebemde iso ama nnyịn.”—1 John 4:19.

2 Jehovah ekebem iso ama nnyịn. Enye ọnọ nnyịn ediye isọn̄ emi ete idụn̄. Enye ọnọ nnyịn mme n̄kpọ udu uwem. (Matthew 5:43-48) Enye ese aban̄a nnyịn n̄ko ke n̄kan̄ eke spirit, oro akam edide akpan n̄kpọ akan. Enye ọnọ nnyịn Ikọ esie, kpa Bible. Ke adianade do, enye ọdọhọ nnyịn isibọn̄ akam inọ imọ, onyụn̄ ọn̄wọn̄ọ ke iyeyere nnyịn, inyụn̄ inọ nnyịn edisana spirit imọ man an̄wam nnyịn. (Psalm 65:2; Luke 11:13) Ke akande kpukpru, enye ama ọnọ ata edima Eyen esie edi nte Andifak man anyan̄a nnyịn osio ke idiọkn̄kpọ ye n̄kpa. Se utọ akaka ima emi Jehovah amade nnyịn do!—John 3:16; Rome 5:8.

3. (a) Nso ke ikpanam man ika iso idu ke ima Abasi? (b) Ewe akpan mbụme ke ana ikere iban̄a, ndien ẹkụt ibọrọ ke m̀mọ̀n̄?

3 Jehovah oyom ndima nnyịn ke nsinsi. Edi nnyịn  inyene ndibiere m̀mê iyoyom ima emi m̀mê idiyomke. Ikọ Abasi ọdọhọ nnyịn ete: “Ẹnịm idem mbufo ke ima Abasi . . . ye idotenyịn ndinyene nsinsi uwem.” (Jude 21) Ikọ oro, “ẹnịm idem mbufo” anam ifiọk nte ke ana nnyịn inam n̄kpọ man ika iso idu ke ima Abasi. Oyom inam nsio nsio akpan n̄kpọ man iwụt ke imama enye n̄ko. Akpan mbụme oro anade ikere iban̄a ndien edi-o, ‘Didie ke n̄kpowụt ke mmama Abasi?’ Ikọ emi apostle John akadade odudu spirit Abasi ewet mi ọnọ ibọrọ mbụme oro: “Ndima Abasi ọwọrọ ete nnyịn inịm mme ewụhọ esie; ndien mme ewụhọ esie idobike owo mbiomo.” (1 John 5:3) Ọyọfọn itịm idụn̄ọde se  ikọ emi ọwọrọde, sia iyomde ndiwụt Abasi nnyịn adan̄a nte imade enye.

“NDIMA ABASI ỌWỌRỌ”

4, 5. Tịn̄ nte ọkọtọn̄ọde ndima Jehovah.

4 Apostle John ọkọtọn̄ọ ikọ ekpri ibuotikọ emi ke ndidọhọ, “Ndima Abasi ọwọrọ.” Ẹyak ise nte enye akanamde an̄wan̄a se ọwọrọde ndima Abasi. Edi mbemiso inemede emi, n̄wana nditi ini oro ọkọtọn̄ọde ndima Jehovah.

Uyakidem nnọ ye baptism owụt ke owo ọtọn̄ọ ndikop uyo nnọ Jehovah

5 Kere esisịt ban̄a ini oro afo ọkọtọn̄ọde ndikpep akpanikọ oro aban̄ade Jehovah ye mme uduak esie onyụn̄ ọtọn̄ọde ndinyene mbuọtidem. Ama edifiọk nte ke kpa ye oro akamanade nte anamidiọk oro adian̄arede ọkpọn̄ Abasi, ke Jehovah ama ada Christ eberede usụn̄ ọnọ fi ndifiak ndi mfọnmma owo nnyụn̄ nnyene uwem nsinsi oro Adam ọkọduọkde. (Matthew 20:28; Rome 5:12, 18) Afo ama ọtọn̄ọ ndikụt akaka n̄kpọ oro Jehovah akanamde ke ndinọ ata edima Eyen esie edikpa ke ntak fo. Emi ama enen̄ede otụk fi, ndien afo ama ọtọn̄ọ ndima Abasi emi akamade fi utọ akaka ima oro.—1 John 4:9, 10.

6. Didie ke owo ekeme ndiwụt ke imenyene ata ima, ndien ima oro afo akamade Abasi akanam fi anam nso?

6 Edi ata ima emi amade Jehovah ọkọtọn̄ọ nditụk fi ke idem oro. Ima idịghe ntụk kpọt; inyụn̄ idịghe n̄kpọ inua inua. Ata ima oro ẹmade Abasi akan owo ndinyụn̄ ndọhọ, “Mmama Jehovah.” Ukem nte mbuọtidem, se ata ima anamde owo anam owụt ke owo oro enyene ima. (James 2:26) Ẹsida se inamde man enem owo esịt ẹfiọk ke imama owo oro. Ntem, ke ini afo ekedide edima Jehovah ata ima ke esịt fo, ama ọdọn̄ fi ndidu uwem ke usụn̄ oro edinemde Ete fo eke heaven esịt. Ndi afo edi Ntiense oro ama akana baptism? Edieke  edide ntre, ọwọrọ ke utọ akaka ima ye nsọn̄ọnda emi ẹkenam fi anam akakan ubiere emi ke uwem fo. Ama ayak idem fo ọnọ Jehovah man anam uduak esie, ndien afo ama ana baptism man ayarade uyakidem emi. (Rome 14:7, 8) Ndinam se ọkọn̄wọn̄ọde emi nnọ Jehovah abuana n̄kpọ efen oro apostle John asiakde.

“NNYỊN INỊM MME EWỤHỌ ESIE”

7. Nso idi ndusụk ewụhọ Abasi, ndien ndinịm mmọ abuana nso?

John anam an̄wan̄a se ndima Abasi ọwọrọde, ete: “Nnyịn inịm mme ewụhọ esie.” Nso idi mme ewụhọ Abasi? Jehovah ada Ikọ esie, kpa Bible, ọnọ nnyịn ndusụk akpan ewụhọ. Ke uwụtn̄kpọ, enye akpan utọ edinam nte ukpammịn, use, ukpono ndem, uyịpinọ, ye usu nsu. (1 Corinth 5:11; 6:18; 10:14; Ephesus 4:28; Colossae 3:9) Ndinịm mme ewụhọ Abasi abuana ndidu uwem ekekem ye mme in̄wan̄-in̄wan̄ edumbet ido uwem Bible.

8, 9. Nnyịn idisan̄a didie ifiọk se inemde Jehovah esịt idem ke mme idaha oro akpan ibet Bible mîdụhe? Nọ uwụtn̄kpọ.

8 Man inem Jehovah esịt, oyom inam se ikande edinịm mme nnennen ewụhọ esie. Jehovah idaha ibet esie ibọp nnyịn ke kpukpru ikpehe uwem nnyịn eke usen ke usen. Ke ntem, imekeme ndisobo ediwak n̄kpọ ke usen ke usen, oro akpan ewụhọ Bible ndomokiet mîdọhọke owo anam m̀mê okûnam. Ke mme utọ idaha oro, didie ke nnyịn ikeme ndifiọk se idinemde Jehovah esịt? Bible owụt ekikere Abasi ata in̄wan̄-in̄wan̄. Nte isụk ikpepde Bible, imesifiọk se Jehovah amade ye se enye asuade. (Psalm 97:10; Mme N̄ke 6:16-19) Imesidi idifiọk mme edu ye edinam oro enye amade. Nte ikade iso ndikpep n̄kpọ mban̄a mme edu ye nte Jehovah esinamde n̄kpọ, ntre ke idikeme ndiyak ekikere esie akara mme ubiere ye mme edinam nnyịn. Ke  ntem, idem ke mme idaha oro akpan ibet Bible mîdụhe, nnyịn imekeme ndifiọk “se uduak Jehovah edide.”—Ephesus 5:17.

9 Ke uwụtn̄kpọ, Bible inọhọ akpan ibet ndomokiet emi ọdọhọde nnyịn ikûse mme vidio m̀mê mme edinam ekebe ndise oro ẹsiode afai m̀mê oburobụt ido idan̄. Yak kan̄a ise, ndi nnyịn imenen̄ede iyom akpan ibet emi akpande nnyịn ndise mme utọ n̄kpọ oro? Imọfiọk nte Jehovah esede mme utọ n̄kpọ oro. Ikọ esie asian nnyịn in̄wan̄-in̄wan̄ ete: “Ukpọn̄ [Jehovah] asasua owo ekededi eke amade afai.” (Psalm 11:5) Enye ọdọhọ n̄ko ete: “Abasi eyekpe ikpe ye mbon use ye mme esịn efịbe.” (Mme Hebrew 13:4) Ima itie ikere mme ikọ eke odudu spirit emi, imekeme nditịm mfiọk se uduak Jehovah edide. Ke ntem, nnyịn idimaha ndise mme edinam emi ẹwụtde se Abasi nnyịn asuade. Imọfiọk ke esinem Jehovah esịt ke ini nnyịn ifepde mme n̄kpọ oro ẹsabarede owo ke n̄kan̄ ido uwem, emi ererimbot Satan anamde etie nte unọ idem inemesịt oro mîdiọkke. *

10, 11. Ntak emi imekde ndikop uyo Jehovah, ndien didie ke ikpokop uyo esie?

10 Nso idi akpan ntak emi inịmde ewụhọ Abasi? Ntak emi nnyịn ikpadade ekikere Abasi emi nnyịn idiọn̄ọde idu uwem ke usen ke usen-e? Idịghe nte ke nnyịn itre ndinam ndusụk n̄kpọ ke ntak ufen oro ẹkemede ndimia nnyịn, m̀mê man ifep ndiọi utịp emi mbon oro ẹsifụmide ibet Abasi ẹsibọde. (Galatia 6:7) Utu ke oro, nnyịn ida edikop uyo Jehovah nte ọsọn̄urua ifet oro inyenede ndiwụt ke imama enye. Nte eyen esiyomde ete ama imọ, ntre n̄ko ke nnyịn iyom Jehovah ama  nnyịn. (Psalm 5:12) Enye edi Ete nnyịn, ndien nnyịn imama enye. Idụhe n̄kpọ ndomokiet oro anamde ikop inemesịt m̀mê uyụhọ ikan ndifiọk nte ke nnyịn idu orụk uwem oro ‘enyenede unyịme Jehovah.’—Mme N̄ke 12:2.

11 Ke ntem, nnyịn ikopke uyo Abasi mmen̄e mmen̄e; inyụn̄ ibiereke-biere mme ewụhọ Abasi emi idinịmde ye enye emi nnyịn mîdinịmke. * Nnyịn isatke-sat mme ewụhọ Abasi emi ikpenịmde, inịmde ke ini emi etiede nte emem utom, edi ama etie nte imemke nnyịn itre ndinịm. Utu ke oro, nnyịn ‘ikop item ke ofụri esịt.’ (Rome 6:17) Etie nnyịn ke idem nte eketiede andiwet psalm eke Bible, emi ekewetde ete: “Nyenem esịt mban̄a mme ewụhọ fo emi ami mmade.” (Psalm 119:47) Ke akpanikọ, nnyịn imama ndikop uyo Jehovah. Imọfiọk ite ke odot inen̄ede ikop uyo esie, se enye onyụn̄ oyomde nnyịn inam edi oro. (Deuteronomy 12:32) Nnyịn iyom Jehovah ọdọhọ ke nnyịn ima inam kpukpru se imọ iketemede nnyịn, kpa nte Ikọ esie etịn̄de aban̄a Noah. Kaban̄a anam-akpanikọ ete-ekpụk oro, emi akamade Abasi onyụn̄ okopde uyo esie ke ediwak isua, Bible etịn̄ ntem ete: “Noah anam kpukpru se Abasi eketemede enye. Enye anam kpa ntre.”—Genesis 6:22.

12. Ini ewe ke n̄kopuyo nnyịn esidat Jehovah esịt?

12 Esitie Jehovah didie ke idem ke ini inyịmede ndikop uyo esie? Ikọ esie ọdọhọ ke nnyịn ‘iyadat enye esịt.’ (Mme N̄ke 27:11) Ndi nnyịn ndikop uyo esinen̄ede anam esịt adat Akakan Ọbọn̄ Andikara ofụri ekondo? Ke akpanikọ esinam—ndien esidi ye eti ntak! Jehovah  ama ọnọ nnyịn ifụre ndimek se imade ke ini okobotde nnyịn. Emi ọwọrọ ke nnyịn imenyene ifụre ndimek n̄kpọ; imekeme ndimek ndikop uyo Abasi m̀mê ndisọn̄ ibuot ye enye. (Deuteronomy 30:15, 16, 19, 20) Ke ini nnyịn imekde ndikop uyo Jehovah ke ofụri esịt, ke ini esịt oro ọyọhọde ye ima Abasi anamde nnyịn ikop uyo Abasi, emi esinam Ete nnyịn eke heaven enen̄ede adat esịt. (Mme N̄ke 11:20) Nnyịn imek n̄ko mfọnn̄kan usụn̄ uwem.

“MME EWỤHỌ ESIE IDOBIKE OWO MBIOMO”

13, 14. Ntak emi ẹkemede ndidọhọ ke ‘mme ewụhọ Abasi idobike owo mbiomo,’ ndien didie ke ẹkpenam emi an̄wan̄a?

13 Apostle John asian nnyịn ata edinem n̄kpọ aban̄a se Jehovah oyomde oto nnyịn, ete: “Mme ewụhọ esie idobike owo mbiomo.” Edisana N̄wed Abasi Ibom esịn 1 John 5:3 ntem: “Mbet esie ibiakke owo idem.” Ibet Jehovah itiehe ekikak ekikak inyụn̄ idiọkke m̀mê ndifefịk owo. * Ibet esie isọn̄ke ikan se mme anana-mfọnmma owo ẹkemede ndinịm.

14 Imekeme ndida uwụtn̄kpọ emi nnam enye an̄wan̄a. Akpan ufan fo ọdọhọ fi an̄wam imọ atan̄ n̄kpọ aka obufa ufọk imọ. Ediwak ekebe ẹdu emi anade ẹtan̄. Ndusụk mmọ ẹfere se owo kiet ekemede ndimen ikpọn̄, edi mbon eken ẹdobi onyụn̄ oyom ẹda owo iba ẹmen. Ufan fo asat mme ekebe oro enye oyomde fi emen. Ndi enye ọkpọdọhọ fi emen mbon emi enye ọfiọkde ke ẹdobi ẹkan fi? Ihih. Enye ikpoyomke n̄kpọ anam fi ke adan̄aemi afo an̄wanade ndin̄wam enye. Ukem ntre, edima Abasi nnyịn emi  ọfọnde ido idọhọke nnyịn inịm mme ewụhọ oro ẹsọn̄de ẹkan nnyịn. (Deuteronomy 30:11-14) Tutu amama enye ididọhọke nnyịn ibiom utọ ndodobi mbiomo oro. Jehovah ọdiọn̄ọ mme mmeme nnyịn, koro “enye etịmde ọfiọk nte ẹbotde nnyịn, emeti ete ke nnyịn idi ntan.”—Psalm 103:14.

15. Ntak emi nnyịn ikpenịmde ke mme ewụhọ Jehovah ẹdi ke ufọn nnyịn-e?

15 Ke akpanikọ, mme ewụhọ Jehovah idobike owo mbiomo; mmọ ẹkam ẹnen̄ede ẹdi ke ufọn nnyịn. (Isaiah 48:17) Moses ọkọdọhọ nditọ Israel eset ete: “Jehovah owụk nnyịn ete inam kpukpru mme ewụhọ emi inyụn̄ ibak Jehovah Abasi nnyịn man ọfọn ye nnyịn ke nsinsi, man nnyịn idu uwem, kpa nte edide mfịn emi.” (Deuteronomy 6:24) Imekeme n̄ko ndinịm nte ke Jehovah ọnọ nnyịn mme ibet esie ke ntak emi enye oyomde n̄kpọ ọfọn ye nnyịn ke nsinsi. Ke akpanikọ, enye ekpekeme didie ndinam nnyịn ibak? Jehovah edi Abasi emi enyenede akakan ọniọn̄. (Rome 11:33) Ntem, enye ọfiọk se itịmde ifọn ye nnyịn. Jehovah n̄ko edi Abasi ima. (1 John 4:8) Ima emi edide ata akpan edu esie anam enye etịn̄ onyụn̄ anam kpukpru se enye anamde. Ima anam enye ọnọ kpukpru mme ewụhọ emi enye ọnọde mme asan̄autom esie.

16. Kpa ye odudu idiọk ererimbot emi ye anana-mfọnmma ikpọkidem nnyịn, ntak emi nnyịn ikpedide mbon n̄kopuyo?

16 Emi iwọrọke ke emem utom ndikop uyo Abasi. Ana in̄wana ibiọn̄ọ odudu idiọk ererimbot emi ‘esịnede ke idak odudu andidiọk.’ (1 John 5:19) Ana in̄wana n̄ko ye anana-mfọnmma ikpọkidem nnyịn, emi esinamde ọdọn̄ nnyịn ndibiat mme ibet Abasi. (Rome 7:21-25) Edi ima oro imade Abasi esinam ikan. Jehovah esidiọn̄ mbon oro ẹkopde uyo ẹnọ enye man ẹwụt ke imama enye. Enye esinọ “mbon oro ẹkopde uyo esie  nte andikara” edisana spirit esie. (Utom 5:32) Spirit oro esinam nnyịn ision̄o nti mfri—kpa mme ọsọn̄urua edu oro ẹkemede ndin̄wam nnyịn idi mbon n̄kopuyo.—Galatia 5:22, 23.

17, 18. (a) Nso ke ididụn̄ọde ke n̄wed emi, ndien nte inamde emi, nso ke nnyịn ikpeti? (b) Nso ke idineme ke ibuotikọ oro etienede?

17 Ke n̄wed emi, iyodụn̄ọde mme edumbet ye mme idaha ido uwem oro Jehovah enịmde ye ediwak n̄kpọ efen oro ẹbuanade ke uduak esie. Nte inamde emi, odu ndusụk akpan n̄kpọ emi anade iti. Ẹyak iti ke Jehovah inyịkke-nyịk nnyịn inịm ibet ye mme edumbet esie; enye oyom n̄kopuyo oro otode esịt. Ẹyak ikûfre ke Jehovah ọdọhọ idu uwem ke usụn̄ oro idibọde edidiọn̄ idahaemi inyụn̄ inyene nsinsi uwem ke ini iso. Ẹyak inyụn̄ ida n̄kopuyo ofụri esịt nnyịn nte ọsọn̄urua ifet ndiwụt Jehovah adan̄a nte imade enye.

18 Jehovah ọnọ nnyịn ubieresịt man ifiọk se ifọnde ye se idiọkde. Nte ọyọhọ ibuot iba ke n̄wed emi edinemede, oyom inọ ubieresịt nnyịn ukpep man enye ekeme ndida nnyịn usụn̄ nte ọfọnde.

^ ikp. 9 Se Ibuot 6 ke n̄wed emi man okụt se ẹnemede ẹban̄a nte ẹkpemekde eti unọ idem inemesịt.

^ ikp. 11 Ndiọi spirit ẹkam ẹkeme ndikop uyo mmen̄e mmen̄e. Ke ini Jesus okowụkde mme demon ẹwọn̄ọ ke idem mbon emi ẹkenyenede demon, mmọ ẹma ẹfiọk ke Jesus enyene odudu ẹnyụn̄ ẹkop uyo ẹnọ enye kpa ye oro ẹkenamde emi mmen̄e mmen̄e.—Mark 1:27; 5:7-13.

^ ikp. 13 Ikọ Greek oro ẹkabarede “idobike” ke 1 John 5:3 ke ẹkabade “ndiọi” ke Utom 20:29, 30, ndien enye aban̄a ibak ibak mbon mfiakedem emi ‘ẹtịn̄de ukwan̄ ikọ’ man ẹbian̄a mbon en̄wen.