Be ka se isịnede

Be ka se isịnede

Mme Ntiense Jehovah

Mek usem Efịk

 SE ẸWETDE ẸDIAN

Edikọm Ọfọn̄ Etakubom, Umekowo, ye Edinam Utom Obio

Edikọm Ọfọn̄ Etakubom, Umekowo, ye Edinam Utom Obio

Edikọm ọfọn̄ etakubom. Mme Ntiense Jehovah ẹnịm ke ndinụhọ nnọ m̀mê ndikọm ọfọn̄ etakubom, emi ẹsiwakde ndinam ke ini ẹkwọde ikwọ ufreidụt, edi edinam ido ukpono emi owụtde ke idịghe Abasi edi Andinyan̄a, edi ke ukara m̀mê mme andikara idụt oro ẹdi andinyan̄a. (Isaiah 43:11; 1 Corinth 10:14; 1 John 5:21) Edidem Nebuchadnezzar emi akakarade Babylon eset ekedi kiet ke otu utọ mme andikara oro. Okopodudu edidem emi ama obot akwa mbiet onyụn̄ enyịk kpukpru mbon oro enye akakarade ete ẹtuak ibuot ẹnọ mbiet oro ke ini ẹdibrede ikwọ, emi etiede nte ikwọ ufreidụt, man anam mme owo ẹnen̄ede ẹkụt ubọn̄ esie ye ifịk oro enye enyenede aban̄a ido ukpono. Edi nditọ Hebrew ita—Shadrach, Meshach, ye Abednego—ikamaha ndituak ibuot nnọ mbiet oro kpa ye oro ẹkedọhọde ke ẹyewot owo ekededi oro mîdituakke ibuot inọ mbiet oro.—Daniel, ibuot 3.

Carlton Hayes emi edide ewet mbụkeset ekewet ete ke eyo nnyịn ke “ọfọn̄ etakubom edi akpan idiọn̄ọ ido ukpono emi ẹkotde ufreidụt, onyụn̄ edi ata akpan n̄kpọ emi ẹtuakde ibuot ẹnọ. Irenowo ẹsiyarade itam ke ini ẹmende ọfọn̄ etakubom ẹbe; ndien mme ewet uto ẹsiwet uto, nditọwọn̄ ẹnyụn̄ ẹkwọ ikwọ ẹda ẹtoro ọfọn̄ etakubom.” Enye ama adian do ete ke ufreidụt enyene “edisana usen” esiemmọ, utọ nte October 1, emi idụt nnyịn ekenyenede ukaraidem, enyene “ndisana owo ye iren  uko,” onyụn̄ enyene “mme temple” m̀mê ọtọ ubon ọfọn̄ etakubom. Ke akwa edinam kiet ke Brazil, etubom ekọn̄ Brazil ama ọdọhọ ete: “Ẹkpono ẹnyụn̄ ẹtuak ibuot ẹnọ ọfọn̄ etakubom . . . ukem nte ẹsikponode idụt emana owo.” The Encyclopedia Americana ọdọhọ ete: “Ọfọn̄ etakubom edi edisana kpa nte cross edide edisana.”

N̄wed emi ọdọhọ n̄ko ke ndondo emi ete ke ikwọ ufreidụt “edi ikwọ oro ẹdade ẹtoro idụt, esinyụn̄ awak ndisịne eben̄e oro ẹben̄ede ndausụn̄ ye ukpeme Abasi ẹnọ mbio obio m̀mê mme andikara.” Ke ntre, mme asan̄autom Jehovah iduehe ndida mme edinam ufreidụt, emi ẹsịnede edikọm ọfọn̄ etakubom ye edikwọ ikwọ ufreidụt, nte edinam ido ukpono. Ke nditịm ntịn̄, n̄wed oro The American Character ama etịn̄ nte nditọ Mme Ntiense Jehovah mîsimaha ndikọm ọfọn̄ etakubom m̀mê ndita un̄wọn̄ọ edida nnọ idụt mmọ ke mme ufọkn̄wed United States, ekem ọdọhọ ete: “N̄kponn̄kan Esopikpe amada ediwak ikpe ọsọn̄ọ nte ke un̄wọn̄ọ ofụri usen emi ẹsitade mi ẹdi mme edinam ido ukpono.”

Okposụkedi emi ikọt Jehovah mîsitieneke inam mme edinam emi mmọ ẹdade nte se mîkemke ye N̄wed Abasi mi, mmọ isikpanke mbon en̄wen ẹte ẹkûnam. Mmọ ẹnyụn̄ ẹfiọk ke ọfọn̄ etakubom edi idiọn̄ọ idụt, ẹnyụn̄ ẹfiọk ke ukara ẹdi “mme odudu oro ẹkponde ẹkan,” emi ẹnamde utom nte mme “asan̄autom Abasi.” (Rome 13:1-4) Ntem, Mme Ntiense Jehovah ẹsinam item emi ọdọhọde ẹbọn̄ akam “ẹban̄a ndidem ye kpukpru mmọ emi ẹdude ke ikpọ itie.” Edi uduak edi “man nnyịn ikpaka iso idu uwem ifụre ye emem ye ọyọhọ uten̄e Abasi ye nsịnifịk.”—1 Timothy 2:2.

Edisịn n̄wed mmek mbon ukara. Ata mme Christian ẹfiọk ke mbon en̄wen ẹnyene unen ndisịn n̄wed nnọ owo. Mmọ isikpanke mme owo ndinam emi, ẹsinyụn̄ ẹsụk ibuot ẹnọ ukara emi ẹmekde. Edi mmọ isitieneke isịn idem ke mbubehe ukara ekededi. (Matthew 22:21; 1 Peter 3:16) Nso ke Christian akpanam ke mme idụt emi ẹdọhọde ke ana kpukpru owo ẹsịn n̄wed ẹnọ owo m̀mê ke ebiet emi ẹsinen̄erede ẹyat esịt ye mbon oro mîtieneke ika ebiet emi ẹsisịnde n̄wed ẹnọ owo? Ke ini Christian etide ke Shadrach, Meshach, ye Abednego ẹma ẹtiene ẹka Unaisọn̄  Dura, emi ekeme ndinam Christian emi odude ke ukem idaha oro etiene aka itie emi ẹsisịnde n̄wed ẹnọ owo, edieke ubieresịt esie ayakde. Edi ana enye ekpeme mbak editiene esịn idem ke mbubehe ukara. Enye ekpenyene nditi edumbet itiokiet emi:

  1. Mme anditiene Jesus ‘idịghe ubak ererimbot.’—John 15:19.

  2. Mme Christian ẹda ke ibuot Christ ye Obio Ubọn̄ esie.—John 18:36; 2 Corinth 5:20.

  3. Ukpụhọde idụhe ke se ẹkpepde ke esop mme Christian, mmọ ẹnyụn̄ ẹma kiet eken nte Christ amade mme owo, emi onyụn̄ anam mmọ ẹdiana kiet.—1 Corinth 1:10; Colossae 3:14.

  4. Mbon oro ẹmekde owo ẹsịn ke ukara ẹtiene ẹnyene nduduọhọ ke se enye anamde.—Kere ban̄a mme edumbet oro ẹdude ke 1 Samuel 8:5, 10-18 ye 1 Timothy 5:22.

  5. Jehovah akada nte ke Israel ẹsịn imọ ke ini mmọ ẹkeyomde owo edi edidem mmimọ.—1 Samuel 8:7.

  6. Ana mme Christian ẹnyene ifụre nditịn̄ mban̄a ukara Obio Ubọn̄ Abasi nnọ mme owo emi ẹdude ke kpukpru n̄ka ukaraidem.—Matthew 24:14; 28:19, 20; Mme Hebrew 10:35.

Edinam utom obio. Ke ndusụk idụt, ukara ẹsidọhọ mbon oro mîmaha nditiene ndụk ekọn̄ ẹnam utom ke obio ke ndusụk ini. Ke ini isobode utọ idaha emi, ikpenyene ndibọn̄ akam mban̄a n̄kpọ emi, imonyụn̄ ikeme ndineme n̄kpọ emi ye ekemmọ Christian oro ọkọride esịm ọyọhọ idaha, ekem ida ubieresịt nnyịn inam ubiere ekekem ye se ifiọkde iban̄a n̄kpọ emi.—Mme N̄ke 2:1-5; Philippi 4:5.

Ikọ Abasi ọdọhọ ‘isụk ibuot inyụn̄ ikop item inọ ukara ye mme enyene-odudu nte mme andikara, iben̄e idem ndinam kpukpru nti utom, inyene eti ibuot.’ (Titus 3:1, 2) Nte isụk ikerede iban̄a emi, imekeme ndibụp idem nnyịn mme mbụme emi: ‘Ndi ndinam utom obio oro ukara ọdọhọde nnam mi ediwọrọ ke mmesịn idem ke mbubehe ererimbot emi, m̀mê anam nsịn idem ke nsunsu ido ukpono?’ (Micah 4:3, 5; 2 Corinth 6:16, 17) ‘Ndi ndinam utom emi ayanam ọsọn̄ mi ndinen̄ede nnam n̄kpọ Abasi m̀mê edikam ọbọbiọn̄ọ mi ofụri ofụri ndinam enye?’ (Matthew 28:19, 20; Ephesus 6:4; Mme Hebrew 10: 24, 25) ‘Ke n̄kan̄ eken, ndi ndinam utom emi ọyọnọ mi ifet ndinen̄ede nnam mme utom Christian mi, m̀mê ayakam ayak mi nnam utom ukwọrọikọ uyọhọ ini?’—Mme Hebrew 6:11, 12.

Edieke ubieresịt Christian ayakde enye anam utom obio utu ke ndika n̄kpọkọbi, mme Christian eken ẹkpenyene ndikpono ubiere esie. (Rome 14:10) Edi edieke enye ọdọhọde ke imọ idikemeke ndinam utom obio, mme Christian eken ẹnyene ndisụk n̄kpokpono ubiere esie oro n̄ko.—1 Corinth 10:29; 2 Corinth 1:24.