Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Fiak Tiene Jehovah

 IKPEHE KIET

“Nyoyom Enye Emi Okosopde”

“Nyoyom Enye Emi Okosopde”

Eyenerọn̄ osop usụn̄. Enye oyo ọkpọn̄ otuerọn̄ nte enye osụk atade mbiet. Enye ifiọkke ebiet emi ekpemerọn̄ ye mme erọn̄ eken ẹdude. Eyo ọtọn̄ọ ndikụt. Enye ke oyo ke ebeden̄ emi ndiọi unam ẹyọhọde, ndien idụhe owo emi an̄wamde enye. Edi ẹtise, enye okop uyo ekpemerọn̄ emi enye ọdiọn̄ọde. Ekpemerọn̄ emi efehe edimen enye, ada ọfọn̄ esie awan̄ enye onyụn̄ emen enye ọnyọn̄ ufọk.

JEHOVAH esitịn̄ ediwak ini ke imọ itie nte utọ ekpemerọn̄ oro. Enye ọdọhọ ete: “Ami nyoyom mme erọn̄ mi nnyụn̄ nse mban̄a mmọ.”Ezekiel 34:11, 12.

“Mme Erọn̄ Emi Ami Mbọkde”

Mmanie ẹdi erọn̄ Jehovah? Mmọ ẹdi mbon oro ẹmade Jehovah ẹnyụn̄ ẹtuakde ibuot ẹnọ enye. Bible ọdọhọ ete: “Ẹyak nnyịn inụhọ inyụn̄ ituak ibuot inọ enye; ẹyak nnyịn itọn̄ọ edọn̄ ke iso Jehovah Andinam nnyịn. Koro enye edide Abasi nnyịn, ndien nnyịn idi ikọt emi enye ọbọkde ye erọn̄ ubọk esie.” (Psalm 95:6, 7) Kpa nte ata ata erọn̄ ẹsitienede andikpeme mmọ, esinem ikọt Jehovah nditiene Jehovah emi edide Andikpeme mmọ. Ndi ọwọrọ ke mmọ ẹsitiene Jehovah kpukpru ini? Baba. Ndusụk ini, ikọt Jehovah ‘ẹsisuana’ ẹnyụn̄ ‘ẹsop usụn̄’ nte erọn̄. (Ezekiel 34:12; Matthew 15:24; 1 Peter 2:25) Kpa ye oro, Jehovah isikereke ke owo oro ọkpọn̄de imọ idifiakke itiene imọ.

Ndi ke osụk adada Jehovah nte Andikpeme fi? Didie ke Jehovah ekpeme nnyịn mfịn? Yak ineme usụn̄ ita oro enye anamde emi:

Enye ada Ikọ esie ọbọk nnyịn. Jehovah ọdọhọ ete: “Nyada eti mbiet mbọk mmọ. . . . Mmọ ẹyesụhọde ẹna do ke eti ebietidụn̄, mmọ ẹyenyụn̄ ẹta mbiet eke esehede.” (Ezekiel 34:14) Jehovah esibọk nnyịn ke ndikpep nnyịn nsio nsio n̄kpọ ke nnennen ini. Ndi emeti ibuotikọ ke n̄wed nnyịn, utịn̄ikọ, m̀mê vidio oro Jehovah akadade ọbọrọ akam fo? Ndi emi ikanamke enịm ke Jehovah ekere aban̄a fi?

Enye ekpeme onyụn̄ an̄wam nnyịn. Jehovah ọdọhọ ete: “Nyoyom enye emi okosopde, . . . nyọbọp enye emi obụn̄ọde nnyụn̄ nsọn̄ọ enye emi ọdọn̄ọde idem.” (Ezekiel 34:16) Jehovah esisọn̄ọ ikọt esie idem, akpan akpan mbon oro idem ememde m̀mê mbon oro esịt etịmerede. Enye esin̄wam mbon oro nditọete mmọ ẹnamde se ibụn̄de mmọ esịt. Enye esinyụn̄ oyom mbon oro ẹsopde usụn̄, emi esịt etịmerede ke ntak se mmọ ẹkenamde ke ini edem.

Enye ese aban̄a nnyịn. Jehovah ọdọhọ ete: ‘Ami nyanyan̄a mmọ nsio ke kpukpru ebiet emi ẹkesuande mmọ ẹdọn̄. Nyoyom enye emi okosopde.’ (Ezekiel 34:12, 16) Jehovah ọfiọk ke erọn̄ oro osopde ekeme ndifiak ntiene imọ. Enye ọfiọk ini emi erọn̄ osopde onyụn̄ oyom enye, ndien ke ini enye okụtde erọn̄ oro, enye okop idatesịt. (Matthew 18:12-14) Enye okot ikọt esie “mme erọn̄ mi, mme erọn̄ emi ami mbọkde.” (Ezekiel 34:31) Afo edi kiet ke otu mme erọn̄ Jehovah.

Jehovah ọfiọk ke erọn̄ oro osopde ekeme ndifiak ntiene imọ. Enye esinem esịt ke ini enye okụtde erọn̄ emi osopde

“Da Mbufa Usen Sọk Nnyịn Nte Ekedide ke Eyo Oko”

Ntak emi Jehovah asan̄ade oyom fi onyụn̄ ọdọhọde afiak etiene imọ? Koro enye oyom fi okop inemesịt. Enye ọn̄wọn̄ọ ke ‘iyan̄wan̄a edidiọn̄ iduọk’ mme erọn̄ imọ. (Isaiah 44:3) Se enye etịn̄de emi edi akpanikọ. Afo omokokụt nte un̄wọn̄ọ esie emi osude.

Ti nte esịt akadatde fi ke ini ekedide edifiọk Jehovah. Eketie fi didie ke idem ke ini ọkọfiọkde ke isọn̄ ayakabade edi Paradise ye nte ke Abasi ayanam mme akpan̄kpa ẹset? Ndi emeti nte ekenemde fi ke ini okodụkde n̄kpri ye ikpọ mbono ye ikọt Jehovah? Ndi esịt ikonyụn̄ inemke fi ke ini ọkọkwọrọde ikọ ọnọ owo oro akamade Ikọ Abasi?

Emekeme ndifiak n̄kop inemesịt ntre. Ikọt Abasi ke eset ẹma ẹbọn̄ akam ẹnọ Abasi ẹte: “O Jehovah, fiak da nnyịn nọ idemfo, nnyịn idibiatke ini ndifiak ndi. Da mbufa usen sọk nnyịn nte ekedide ke eyo oko.” (Eseme 5:21) Jehovah ama ọbọrọ akam oro, ndien ikọt esie ẹma ẹfiak ẹtọn̄ọ ndinam n̄kpọ esie ye idatesịt. (Nehemiah 8:17) Jehovah oyonyụn̄ an̄wam fi afiak anam n̄kpọ esie.

Kpa ye oro, imemke utom ndifiak nnyọn̄ ntiene Jehovah. Yak ineme ndusụk n̄kpọ emi ẹkemede ndinam ọsọn̄ fi ndifiak ntiene Jehovah ye nte afo ekemede ndikan mmọ.