Jehovah ọnọ Edidem Solomon esịt ọniọn̄; ndien nditọ Israel ẹnyene ediwak emem ẹnyụn̄ ẹnen̄ede ẹforo ke ini ukara Solomon

UWEM ekpetie didie edieke ofụri idụt ye andikara idụt oro ẹtienede item Jehovah nte Ọbọn̄ Andikara mmọ ẹnyụn̄ ẹkop uyo esie? Isua 40 oro Edidem Solomon akakarade Israel ọbọrọ mbụme emi.

Mbemiso David akpa, enye ama emek Solomon eyen esie ndida itie ubọn̄ imọ. Abasi ama ọdọhọ Solomon ke ndap ete eben̄e imọ se enye amama. Solomon ekeben̄e ọniọn̄ ye ifiọk man ekpe ikpe mme owo nte enende onyụn̄ owụtde eti ibuot. Emi ama enem Jehovah esịt, anam enye ọnọ Solomon ọniọn̄ ye eti ibuot. Jehovah ama onyụn̄ ọn̄wọn̄ọ ndinọ enye inyene, ubọn̄, ye uwak isua uwem edieke enye akade iso okop uyo imọ.

Solomon ama ọwọrọ etop ke ntak emi ekebierede ikpe ke ọniọn̄. Isan̄ kiet iban iba ẹma ẹnyan̄a nsekeyen kiet, enye emi ete imọ inyene, enye oko ete imọ inyene. Solomon ama ọdọhọ ẹda ikwa ẹdibahade eyen oro iba ẹkpọn̄ n̄kan̄ kiet ẹnọ owo mmọ kiet kiet. Kiet ke otu mmọ ama enyịme, edi ata eka eyen oro ama ekpe ubọk ete ẹyak eyen oro ẹnọ mma enye eken. Do ke Solomon ekedikụt nte ke mma oro ọkọdọhọde ẹkûwot eyen oro ekedi ata eka esie ndien ayak eyen oro ọnọ enye. Ibịghike ofụri Israel ẹma ẹdikop mbụk ubiereikpe emi ẹnyụn̄ ẹdiọn̄ọ ke Abasi ọkọnọ enye ọniọn̄.

Kiet ke otu akakan n̄kpọ emi Solomon akanamde ekedi ndibọp temple Jehovah ke Jerusalem—akaka ufọk emi Israel ẹdikade ikatuak ibuot inọ Abasi. Ke ini ẹkeyakde temple oro ẹnọ, Solomon ama ọbọn̄ akam ete: “Sese, enyọn̄ ye ata enyọn̄ ikemke fi, [n̄wan̄wadise] ufọk emi n̄kọbọpde.”—1 Ndidem 8:27.

Etop Solomon ama esịm mme idụt eken, tutu ke Sheba emi odude ke Arabia. Ọbọn̄ an̄wan Sheba ama emen isan̄ edi ndise ubọn̄ ye uforo Solomon nnyụn̄ ndomo ifiọk Solomon nse. Ọniọn̄ Solomon ye uforo ofụri Israel ama otụk ọbọn̄ an̄wan emi tutu enye otoro Jehovah ke ndidori utọ enyene-ọniọn̄ edidem emi ke ebekpo. Ke akpanikọ, edidiọn̄ Jehovah akanam ukara Solomon ọwọrọ etop onyụn̄ enyene emem akan ke ofụri mbụk Israel eset.

Edi Solomon iketieneke ọniọn̄ Jehovah ke ofụri uwem esie. Enye ama ofụmi ibet Abasi onyụn̄ ọdọ ata ediwak iban, emi ndusụk ẹkekponode isen abasi. Iban esie ẹma ẹwọn̄ọde esịt esie sụn̄sụn̄ ẹkpọn̄ Jehovah ẹnam enye okokpono ndem. Jehovah ama ọdọhọ Solomon ete ke imọ iyawai enye ndusụk ubọn̄ ke ubọk ibọ. Abasi ọkọdọhọ ke ntak David ete Solomon edinam ẹyak ekpri ikpehe ẹnọ ubon esie. Kpa ye oro Solomon mîkokopke aba uyo Abasi, Jehovah ama osụk osu un̄wọn̄ọ Obio Ubọn̄ oro enye akanamde ye David.

Ẹda ẹto 1 Ndidem ibuot 1 esịm 11; 2 Chronicle ibuot 1 esịm 9; Deuteronomy 17:17.