Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso Idi Etop Bible?

 IKPEHE 9

Nditọ Israel Ẹyom Edidem

Nditọ Israel Ẹyom Edidem

Saul, akpa edidem Israel, ọsọn̄ ibuot. David emi Abasi ọn̄wọn̄ọde ndinam ebekpo esie ebịghi ke nsinsi, ada itie esie

KE Samson ama akakpa, Samuel ekedi prọfet ye ebiereikpe ke Israel. Nditọ Israel ẹma ẹyịre enye ete ke mmimọ iyom nditie nte mme idụt eken, ke iyom edidem akara mmimọ. Okposụkedi emi n̄kpọ emi akayatde Jehovah esịt, enye ama ọdọhọ Samuel anam se mmọ ẹkeben̄ede. Abasi ama emek osụhọde idem owo emi ekekerede Saul ete edi edidem. Edi nte ini akakade, Edidem Saul ama ọtọn̄ọ ndikohode idem nnyụn̄ nsọn̄ ibuot. Jehovah ama esịn enye onyụn̄ ọdọhọ Samuel emek owo efen—ekpri akparawa emi ekekerede David. Edi ediwak isua ẹyebe mbemiso David ọtọn̄ọ ndikara.

Etie nte David okosụk edi uyen ini emi enye akakade ndise nditọete esie emi ẹkedude ke udịmekọn̄ Saul. Ata anyan owo kiet emi ekekerede Goliath ama anam nsia oyomo ofụri udịmekọn̄ emi. Owo emi ama osụn̄i mmọ ye Abasi mmọ. N̄kpọ emi ama ayat David esịt etieti tutu enye enyịme ndin̄wana ye owo oro. Enye akakama utop-itiat ye itiat ifan̄ kpọt aka ndin̄wana ye owo emi ọkọniọn̄de nte eyop. Ke ini owo oro okosụn̄ide enye, David ama ọdọhọ enye ke n̄kpọekọn̄ imọ akan n̄kpọekọn̄ esie, sia idade enyịn̄ Jehovah Abasi idi ndin̄wana ye enye! David akada itiat kiet kpọt owot anyan owo oro onyụn̄ ada ofụt Goliath ebịghi enye ibuot. Ndịk ama anam mbonekọn̄ Philistine ẹfen̄e.

Saul ama enen̄ede okop inemesịt ke se David akanamde emi onyụn̄ emek enye etubom ekọn̄ esie. Edi nte ini akakade, nte David ekesikande ke ekọn̄ ama anam Saul efịbe enye. David ama efehe man Saul idiwot enye onyụn̄ oyo ke ediwak isua. Kpa ye ofụri emi, David okosụk okpokpono Saul sia edide enye ama ọdiọn̄ọ ke Jehovah Abasi ekemek Saul nte edidem. Ke akpatre, Saul ama akpa ke ekọn̄. Ndien David ama akabade edi edidem ye unana ubiatini, nte Jehovah ọkọn̄wọn̄ọde.

“Nyonyụn̄ nnam ebekpo ubọn̄ esie ọsọn̄ ada ke nsinsi.”—2 Samuel 7:13

Ke ini David ekedide edidem, ama enen̄ede ọdọn̄ enye ndibọp temple nnọ Jehovah. Edi Jehovah ama ọdọhọ enye ke eyen esie edibọp temple inọ imọ. Solomon eyen David ọkọbọp temple oro. Edi Abasi ama ọdiọn̄ David onyụn̄ anam ediomi ye enye ete ke ubon esie ẹyenyene ndidem emi mîdinyeneke mbiet. Ndien ke akpatre, Andifak m̀mê Mfri oro ẹken̄wọn̄ọde ke In̄wan̄ Eden, edito ubon esie. Enye edidi Messiah emi ọwọrọde “Enye Oro Ẹyetde Aran,” emi Abasi emekde. Jehovah ama ọn̄wọn̄ọ ete ke Messiah emi edidi Andikara ke Obio Ubọn̄ emi edibịghide ke nsinsi.

David ama enen̄ede okop inemesịt, onyụn̄ etịm ata ediwak n̄kpọ ubọpufọk ye ọsọn̄urua ukwak obon man ẹda ẹbọp temple. Abasi ama ọnọ enye spirit ada ewet ediwak psalm. Enye ọkọdọhọ ke ini enye okoyomde ndikpa ete: “Spirit Jehovah ada mi etịn̄ ikọ, uyo esie onyụn̄ odu mi ke edeme.”—2 Samuel 23:2.

Ẹda ẹto 1 ye 2 Samuel; 1 Chronicle; Isaiah 9:7; Matthew 21:9; Luke 1:32; John 7:42.