Jesus asiak mme n̄kpọ oro ẹdiwụtde ke imọ imọtọn̄ọ ndikara, ye nte ke editịm n̄kpọ emi ekpere utịt

KE INI mme apostle Jesus inan̄ ẹkedude ke Obot Olive, ẹda ẹkụt Jerusalem ye temple esie, mmọ ẹma ẹbụp Jesus ẹban̄a ndusụk n̄kpọ oro enye eketịn̄de. Ibịghike Jesus ọkọdọhọ ke ẹyesobo temple Jerusalem oro. Ndien enye ama ebebem iso asian mmọ aban̄a “utịt editịm n̄kpọ emi.” (Matthew 13:40, 49) Idahaemi mme apostle ẹbụp enye ẹte: “Nso idinyụn̄ idi idiọn̄ọ edidu fo ye eke utịt editịm n̄kpọ emi?”—Matthew 24:3.

Jesus ama asian mmọ se iditịbede mbemiso ẹsobode Jerusalem. Edi se enye eketịn̄de ikaban̄ake nsobo Jerusalem kpọt. Nte ini akade, ntịn̄nnịm ikọ esie oro oyosu ke ofụri ererimbot. Jesus ama asiak ediwak n̄kpọ oro ẹditịbede ke ererimbot nte idiọn̄ọ. Idiọn̄ọ emi edinam mbon oro ẹdude ke isọn̄ ẹdiọn̄ọ ke Jesus ọtọn̄ọ ndikara ke heaven. Ke nditịn̄ ke usụn̄ en̄wen, idiọn̄ọ emi ediwụt ke Jehovah Abasi anam Jesus edi Edidem ke Obio Ubọn̄ Messiah oro ẹken̄wọn̄ọde toto ko. Idiọn̄ọ emi oyonyụn̄ owụt ke Obio Ubọn̄ oro ọmọn̄ ọsọsọp osio idiọkido efep onyụn̄ anam ubonowo ẹnyene ata emem. Mme n̄kpọ oro Jesus eketịn̄de ke ẹdida idiọn̄ọ ini oro editịm n̄kpọ emi—oro edi, ido ukpono, ukara, ye ndiọi owo—ẹdibede ifep, man obufa editịm n̄kpọ ọtọn̄ọ.

Jesus ama etịn̄ ete ke ini emi imọ idikarade ke heaven, idụt ayadaha an̄wana ye idụt, akan̄ oyodu, ikpọ unyekisọn̄ ye ediwak udọn̄ọ ẹyenyụn̄ ẹdu mi ke isọn̄. Ubiatibet ọyọtọt. Ata mme mbet imọ ẹyekwọrọ eti mbụk Obio Ubọn̄ Abasi ke ofụri isọn̄. Kpukpru n̄kpọ emi ẹdida ẹkesịm “akwa ukụt,” orụk eke akanam mîdụhe.—Matthew 24:21.

Mme anditiene Jesus ẹdinam didie ẹdiọn̄ọ ke akwa ukụt ọmọn̄ ọtọn̄ọ? Jesus ọkọdọhọ ete: “Ẹkpep n̄kpọ emi ẹto eto fig.” (Matthew 24:32) Ke ini eto fig asiahade ikọn̄, mme owo ẹdiọn̄ọ ke ndaeyo ekpere. Kpasụk ntre n̄ko, ke ini ẹkụtde nte kpukpru se Jesus eketịn̄de emi ẹtịbede, ẹyediọn̄ọ ke utịt ekpere. Ete ikpọn̄ ọfiọk usen ye nnennen ini emi akwa ukụt oro editọn̄ọde, owo en̄wen ndomokiet ifiọkke. Ntak edi oro Jesus ọkọnọde mme mbet esie item ete: “Ẹdu ke edidemede, koro mbufo mîfiọkke edikem ini.”—Mark 13:33.

—Ẹda ẹto Matthew ibuot 24 ye 25; Mark ibuot 13; Luke ibuot 21.

^ ikp. 14 Edieke oyomde ntọt efen aban̄a ntịn̄nnịm ikọ Jesus, se page 86-95 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.