Daniel ebem iso etịn̄ aban̄a Obio Ubọn̄ Abasi ye ini emi Messiah edidide. Ẹsobo Babylon

DANIEL, ata uyen nsọn̄ọnda, okodu ke ntan̄mfep ke Babylon mbemiso ẹkesobode Jerusalem. Mbon oro ẹma ẹnọ enye ye nditọ Jew ifan̄ eken ifụre, kpa nditọ oro ẹketan̄de ẹka Babylon ke ini ẹkesobode obio ubọn̄ Judah. Ke ofụri ini oro Daniel okodude ke Babylon, Abasi ama enen̄ede ọdiọn̄ enye, anyan̄a enye osio ke obube mme liọn, onyụn̄ owụt enye n̄kukụt emi aban̄ade ini iso. Akakan ntịn̄nnịm ikọ esie akaban̄a Messiah ye ubọn̄ Esie.

Ẹsian Daniel ini Messiah edidide. Ẹma ẹsian Daniel ini emi ikọt Abasi ẹkpedoride enyịn “Messiah Ọbọn̄” ndidi—urua 69 oro urua kiet edide isua itiaba. Ẹditọn̄ọ ndibat ini emi ke ẹma ẹkenọ ewụhọ ẹte ẹtọn̄ọ ntak ẹbọp ibibene Jerusalem. Urua kiet esidi usen itiaba; edi urua enye emi edi isua itiaba. Ẹkenọ ewụhọ oro ediwak isua ke Daniel ama akakpa, oro edi, ke isua 455 M.E.N. Ọtọn̄ọde ke ini oro, “urua” 69 oro edidide isua 483, editre ke isua 29 E.N. Ikpehe oro etienede eyetịn̄ se iketịbede isua oro. Daniel ama okụt n̄ko nte ke “ẹyesịbe” Messiah ẹfep, m̀mê ẹwot enye man enye osio isop idiọkn̄kpọ.—Daniel 9:24-26.

Messiah edidi Edidem ke heaven. Daniel ama okụt akakan n̄kukụt aban̄a heaven, enye ama okụt Messiah emi ẹkekotde “eyen owo,” nte asan̄ade aka ebekpo Jehovah. Jehovah ama ọnọ Messiah “ubọn̄, ye ukpono, ye itie-edidem.” Ubọn̄ oro eyebịghi ke nsinsi. Daniel ama ekpep aduai-owo-idem n̄kpọ efen aban̄a Obio Ubọn̄ Messiah—mbon en̄wen emi enye okokotde “edisana ikọt Ata Edikon̄” ẹyetiene Edidem Messiah ẹkara ke Obio Ubọn̄ emi.—Daniel 7:13, 14, 27.

Obio Ubọn̄ oro oyosobo mme ukara ererimbot emi. Abasi ama an̄wam Daniel asiak ndap emi akakpade Nebuchadnezzar edidem Babylon, idem. Edidem oro ama okụt akaka mbiet emi ibuot esie ekedide gold, ubọk ye ikpanesịt esie ẹdi silver, idịbi ye ifụhi esie ẹdi okpoho, idịbi ukot esie edi ukwak, ndien isọn̄ ikpat esie edi ukwak ye mbateso. Itiat emi ẹkesiakde ẹsio ke obot ọtọ mbiet oro ke ukot onyụn̄ anuak enye tutu enye akabade mbio. Daniel ama etịn̄ ete ke mbak idem mbiet oro ẹda ẹban̄a nsio nsio ukara ererimbot emi, ọtọn̄ọde ke Babylon oro ekedide ibuot o-gold. Daniel ama okụt ke Obio Ubọn̄ Abasi eyedisịm ke ini akpatre ukara idiọk ererimbot emi osụk akarade. Enye ayanuak kpukpru ukara ererimbot emi. Ndien enye ayada ke nsinsi.—Daniel, ibuot 2.

Daniel ama odu uwem esịm ini emi ẹkesobode Babylon. Edidem Cyrus akakan obio oro kpa nte mme prọfet Abasi ẹkebemde iso ẹtịn̄. Esisịt ini ke oro ebede, ẹma ẹsana mme Jew ẹyak man mmọ ẹnyọn̄ obio mmọ—ke ata nnennen ini, oro edi, isua 70 oro ẹkedọhọde ke obio mmọ edina ndon. Mme anam-akpanikọ andikara, mme oku, ye mme prọfet ẹma ẹn̄wam mme Jew ẹfiak ẹbọp Jerusalem ye temple Jehovah. Nso iditịbe ndien ke isua 483 oro ama ekebe?

—Ẹda ẹto n̄wed Daniel.