N̄wed Mme N̄ke esịne item emi owụtde owo usụn̄ uwem, oro ẹdade spirit Abasi ẹwet—ndien Solomon ewet ediwak item oro

NDI Jehovah akara ke ọniọn̄? Akpan usụn̄ kiet ndibọrọ mbụme oro edi ndise item emi enye esinọde. Ndi item esie esifọn? Ndi ndinam item Abasi esifori uwem owo? Enyene-ọniọn̄ Edidem Solomon ama ewet ata ediwak n̄ke. Mme n̄ke emi ẹtụk kpukpru ikpehe uwem. Kere ban̄a ndusụk mmọ.

Ndibuọt idem ke Abasi. Owo ikemeke ndidi ufan Jehovah edieke enye mînyeneke mbuọtidem. Solomon ekewet ete: “Buọt idem fo ye Jehovah ke ofụri esịt fo; ndien kûberi edem ke asian fo. Diọn̄ọ enye ke kpukpru usụn̄ fo, ndien enye eyenen̄ede usụn̄ fo enịm.” (Mme N̄ke 3:5, 6) Ndiyom ndausụn̄ Abasi nnyụn̄ n̄kop uyo esie ofori uwem owo, ndien emi owụt ke imọbuọt idem ye enye. Utọ usụn̄ uwem oro anam Abasi adat esịt onyụn̄ ọnọ Jehovah se enye edidade ibọrọ ata oro Satan, kpa asua Abasi, akamiade.—Mme N̄ke 27:11.

Ndinam n̄kpọ ke ọniọn̄ ye mme owo. Item oro Abasi ọnọde mme ebe, ibanndọ, ye nditọ ẹnen̄ede ẹnyene ufọn mfịn. Abasi eteme mme ebe ete: “Dara n̄wan uyen fo,” ndien emi ọwọrọ ke ana enye anam akpanikọ ọnọ n̄wan esie. (Mme N̄ke 5:18-20) Ibanndọ ẹyekụt se Mme N̄ke etịn̄de aban̄a enyene-ido an̄wan emi ebe ye nditọ esie ẹmade. (Mme N̄ke, ibuot 31) Nditọ ẹyenyụn̄ ẹkụt ebiet emi ẹdọhọde mmọ ẹkop item mme ete ye eka mmọ. (Mme N̄ke 6:20) N̄wed Bible emi owụt n̄ko nte ọfọnde ndinyene nti ufan, koro owo ndidian̄ade ntie ke idemesie anam enye edi ibụk. (Mme N̄ke 18:1) Mme ufan nnyịn ẹkeme ndinam inam eti n̄kpọ m̀mê idiọkn̄kpo, ntre ana ida ọniọn̄ imek mme ufan.—Mme N̄ke 13:20; 17:17.

Nditịm nse mban̄a idem. N̄wed Mme N̄ke ọnọ nti item aban̄a nte ẹkpetrede ukpammịn, ndinyene nti edu nnyụn̄ ntre ndiọi ido, nnyụn̄ nnam utom ọkpọsọn̄. (Mme N̄ke 6:6; 14:30; 20:1) Enye owụt ke ndiberi edem ke ifiọk owo nnyụn̄ n̄kpa edem n̄wụt ifiọk Abasi ayada n̄kpa edi. (Mme N̄ke 14:12) Mme N̄ke esịn udọn̄ ọnọ nnyịn ndikpeme esịt nnyịn man idibiara, onyụn̄ eti nnyịn nte ke ‘uwem oto esịt.’—Mme N̄ke 4:23.

Ediwak miliọn owo ke ofụri ekondo ẹkụt ke ndinam utọ item oro ofori uwem owo. Emi anam mmọ ẹnyịme Jehovah nte Andikara mmọ.

—Ẹda ẹto n̄wed Mme N̄ke.