Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso Idi Etop Bible?

 IKPEHE 5

Abasi Ọdiọn̄ Abraham ye Ubon Esie

Abasi Ọdiọn̄ Abraham ye Ubon Esie

Mbonubon Abraham ẹforo. Abasi ekpeme Joseph ke Egypt

JEHOVAH ama ọfiọk ke edima Eyen imọ oyokụt ndutụhọ onyụn̄ akpa usen kiet. Ntịn̄nnịm ikọ oro odude ke Genesis 3:15 owụk owo mbara aban̄a emi. Didie ke Abasi edinam mme owo ẹdiọn̄ọ nte enye ndiwa Eyen esie edisọn̄de urua iketre? Bible ada se iketịbede inọ ete kiet ye eyen esie ọnọ nnyịn uwụtn̄kpọ. Abasi ama ọdọhọ Abraham awa edima eyen esie Isaac.

Abraham ama enen̄ede enyene mbuọtidem. Ti ete ke Abasi ọkọdọhọ enye ke Andifak m̀mê Mfri edito ubon Isaac. Abraham ama eben̄e idem ndiwa Isaac sia ekenyenede mbuọtidem ke Abasi ekeme ndinam Isaac eset. Edi angel Abasi ikayakke Abraham owot eyen oro. Abasi ama otoro Abraham ke ntak emi enye ekenyịmede ndiwa ata edima eyen esie, onyụn̄ afiak ọsọn̄ọ se Enye ọkọn̄wọn̄ọde ọnọ Abraham.

Isaac ama edinyene nditọ irenowo iba, Esau ye Jacob. Jacob iketiehe nte Esau, enye ama ama mme n̄kpọ eke spirit, ẹma ẹnyụn̄ ẹdiọn̄ enye ke ntak emi. Abasi ama okpụhọde enyịn̄ Jacob, okot Israel, ndien nditọ irenowo 12 oro Israel ekenyenede ẹma ẹkabade ẹdi esien Israel 12. Edi didie ke ubon oro akakabade edi akamba idụt?

Ata ediwak n̄kpọ ama etịbe ke ini ndusụk nditọ emi ẹkesuade Joseph, ekpri eyenete mmọ. Mmọ ẹma ẹnyam enye nte ofụn, ẹnyụn̄ ẹmen enye ẹka Egypt. Edi Abasi ama ọdiọn̄ anam-akpanikọ eren uko oro. Kpa ye oro n̄kpọ mîkememke ye enye, nte ini akakade, Pharaoh emi akakarade Egypt ama ọnọ enye akwa itie. N̄kpọ emi ekedi ke ata eti ini, sia Jacob ama ọdọn̄ ndusụk nditọ esie ẹkedep udia ke Egypt ke ntak akan̄ oro okodude, ndien Joseph ekese enyịn aban̄a udia ke Egypt. Nditọete Joseph ẹma ẹkabade esịt, ndien Joseph ama onyụn̄ efen ọnọ mmọ, mmọ ẹnyụn̄ ẹfiak ẹdiana kiet, ndien Joseph ọdọn̄ mmọ ẹkemen ete mmọ ye mbon eken ẹdi Egypt. Ẹkenọ mmọ ata eti isọn̄ ke Egypt, ke ebiet emi mmọ ẹdikemede nditọt nnyụn̄ mforo. Joseph ama ọdiọn̄ọ ke Abasi anam kpukpru n̄kpọ oro man uduak Esie osu.

Jacob ama ọsọn̄ ini oro, ndien enye okodụn̄ do ke Egypt ke ofụri nyọhọ nsụhọ isua uwem esie onyụn̄ okụt nte ubon esie ọtọtde. Ke ini enye okoyomde ndikpa, enye ama etịn̄ ke Andifak m̀mê Mfri oro ẹken̄wọn̄ọde edidi Andikara emi okopde odudu, ke enye edito ubon Judah eyen esie. Ke ediwak isua ẹma ẹkebe, Joseph ama onyụn̄ etịn̄ ntịn̄nnịm ikọ mbemiso enye akakpade, enye ọkọdọhọ ke usen kiet, Abasi ayada ubon Jacob ọwọrọ ke Egypt.

—Ẹda ẹto Genesis ibuot 20 esịm 50; Mme Hebrew 11:17-22.