Jehovah amia Egypt ufen, ndien Moses ada nditọ Israel ọwọrọ ke isọn̄ Egypt. Abasi ọnọ Moses Ibet ọnọ nditọ Israel

NDITỌ Israel ẹma ẹdụn̄ ke Egypt ediwak isua, ẹtọt, ẹwak ẹnyụn̄ ẹforo etieti. Edi obufa Pharaoh ama ada ukara. Enye ikọdiọn̄ọke Joseph. Pharaoh enye emi ama ọdiọk, onyụn̄ otụhọde mme owo. Ndịk ama anam enye ndikụt nditọ Israel ẹwakde ntre, ntak edi oro enye ekesịnde mmọ ke ufụn onyụn̄ ọnọ uyo ete ẹtomo kpukpru nsek nditọ irenowo mmọ ẹdọn̄ ke Akpa Nile. Edi mma kiet ama enyene uko emen nsekeyen esie esịn ke akpasa ekedịp ke otu nnyanyan̄a. Adiaha Pharaoh ama okokụt eyen oro, osio enye enyịn̄ Moses, onyụn̄ emen enye ọkọbọk ke ufọk ubọn̄ Egypt.

Ke ini Moses ekedide isua 40, enye ama odụk mfịna ke ini akakade ndinyan̄a eyen Israel emi ekedide ofụn nsio ke ubọk eyen Egypt oro ekedide eteutom esie. Moses ama efehe okodụn̄ nte esen ke ata anyan ebiet. Ke ini enye ekedide isua 80, Jehovah ama ọdọhọ enye afiak aka Egypt ọkọdọhọ Pharaoh ayak ikọt imọ ẹnyọn̄ọ.

Pharaoh ikenyịmeke. Abasi ama amia Egypt ufen duop ke ntak emi. Kpukpru ini oro Moses akakade ọkọdọhọ Pharaoh asana ikọt Abasi ayak ẹnyọn̄ọ man Abasi etre ndimia mmọ ufen, Pharaoh ama ọsọn̄ obotitọn̄, inyụn̄ ibatke Moses ye Jehovah ke n̄kpọ. Ke akpatre, ọyọhọ ufen duop ama owot kpukpru akpan ke Egypt, ke ẹbede akpan mbon oro ẹkekopde uyo Jehovah ẹyet iyịp erọn̄ uwa ke obubọk enyịnusụn̄ mmọ. Angel Abasi oro okowotde kpukpru akpan eken ama ebe ọkpọn̄ mme ufọk oro. Nte ini akakade, nditọ Israel ẹma ẹsinịm usọrọ Passover kpukpru isua man ẹti edinyan̄a emi.

Pharaoh ama ọdọhọ Moses ye kpukpru nditọ Israel ẹwọn̄ọ ke Egypt sia akpan esie ama akakpa. Mmọ ẹma ẹsọsọp ẹtịm idem ẹsan̄a ke udịm ẹwọrọ. Edi Pharaoh ama atua n̄kpọfiọk nte enye akayakde mmọ ẹnyọn̄ọ. Enye ama ada ediwak mbonekọn̄ esie awat ke chariot ebịne mmọ. Eketie nte ke nditọ Israel idibọhọke ke ini mmọ ẹkedude ke mben Ididuot Inyan̄. Edi Jehovah ama anam Ididuot Inyan̄ abahade, ndien nditọ Israel ẹsan̄a ke nsatisọn̄ ẹbe! Ke ini mbon Egypt ẹkebụmerede ẹdụk inyan̄ oro man ẹkemụm nditọ Israel, Abasi ama anam mmọn̄ oro ọtọ ofụk mmọ, Pharaoh ye kpukpru udịmekọn̄ esie ẹma ẹtak ke inyan̄ oro.

Ekem, Jehovah ama anam ediomi ye nditọ Israel ke ini mmọ ẹkedude ekpere Obot Sinai. Abasi ama ada Moses ọnọ Israel ibet oro ẹdikpemede mmọ onyụn̄ ada mmọ usụn̄ ke kpukpru ikpehe uwem. Edieke mmọ ẹdikade iso ẹnịm mme ibet Abasi emi ketket, Jehovah oyodu ye mmọ onyụn̄ ada mmọ ọdiọn̄ mme idụt en̄wen.

Edi ata ediwak nditọ Israel ẹma ẹyat Jehovah esịt ke ntak unana mbuọtidem mmọ. Ntem, Jehovah ama anam emana oro oyo isua 40 ke wilderness. Ekem Moses ama ọdọhọ anam-akpanikọ Joshua ada nditọ Israel usụn̄. Mmọ nditọ Israel ẹma ẹben̄e idem ndien ndidụk isọn̄ oro Abasi ọkọn̄wọn̄ọde ndinọ Abraham.

—Ẹda ẹto Exodus; Leviticus; Numbers; Deuteronomy; Psalm 136:10-15; Utom 7:17-36.