Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Eti Mbụk Emi Otode Abasi!

 UKPEPN̄KPỌ 5

Ntak Emi Abasi Okobotde Isọn̄ Emi?

Ntak Emi Abasi Okobotde Isọn̄ Emi?

1. Ntak emi Abasi okobotde isọn̄ emi?

Jehovah okobot isọn̄ emi ọnọ owo. Ntre, isọn̄ edi ebietidụn̄ nnyịn. Ke Abasi ama okobot Adam ye Eve, enye ikọdọhọke mmọ ẹtọt ẹyọhọ heaven sia Abasi ama obobot mme angel ndidụn̄ ke heaven. (Job 38:4, 7) Edi Abasi okobot Adam esịn ke ediye paradise emi ẹkekotde In̄wan̄ Eden. (Genesis 2:15-17) Jehovah ama ọnọ enye ye nditọ oro enye edibonde ifet ndidu uwem ke nsinsi ke isọn̄.Kot Psalm 37:29; 115:16.

Ini oro, In̄wan̄ Eden kpọt ekedi Paradise. Abasi ọkọdọhọ Adam ye Eve ẹnyene nditọ, ẹtọt ẹyọhọ isọn̄, ẹnyụn̄ ẹnam enye edi paradise. (Genesis 1:28) Owo idisoboke isọn̄ emi tutu amama. Nnyịn idisụk idụn̄ mi.Kot Psalm 104:5.

2. Ntak emi isọn̄ mîdịghe paradise idahaemi?

Adam ye Eve ẹma ẹsọn̄ ibuot ye Abasi, ntre Abasi ama ebịn mmọ osio ke In̄wan̄ Eden. Nte ikasan̄ade itaba Paradise edi oro, ndien idụhe owo ndomokiet ke isọn̄ emi, emi ekemede ndinam ifiak inyene Paradise oro. Bible ọdọhọ ete: “Ẹmeyak isọn̄ ẹsịn idiọkowo ke ubọk.”Job 9:24.Kot Genesis 3:23, 24.

Ndi Jehovah efre se enye akaduakde ọnọ owo? Baba! Enye edi Ata Ọkpọsọn̄ Abasi emi uduak esie mîkemeke ndikpu. (Isaiah 45:18) Enye ayanam ubonowo ẹfiak ẹkedu ke Paradise nte enye akaduakde.Kot Psalm 37:11, 34.

3. Nso ke ẹdinam man Paradise afiak odu ke isọn̄ emi?

Paradise ayafiak odu ke isọn̄ emi ke ini ukara Jesus, kpa Edidem emi Abasi emekde. Jesus ayasan̄a ye mme angel Abasi edisobo kpukpru mbon emi mîsụkke ibuot inọ Abasi  ke ekọn̄ Armageddon. Ekem, enye ọyọkọbi Satan ke tọsịn isua kiet. Edi n̄kpọ idinamke ikọt Abasi koro Jesus eyekpeme mmọ. Mmọ ẹyedu uwem ke nsinsi ke Paradise ke isọn̄ emi.Kot Ediyarade 20:1-3; 21:3, 4.

4. Ini ewe ke ufen editre?

Ini ewe ke Abasi edisio idiọkn̄kpọ ifep ke isọn̄ emi? Jesus ama ọnọ “idiọn̄ọ” oro edinamde ifiọk ke utịt ekpere. Nte n̄kpọ etiede idahaemi ke ererimbot etie nte ke ẹmọn̄ ẹkpan̄a ẹma, edi oro akam owụt ke nnyịn idu uwem ke “akpatre ini editịm n̄kpọ emi.”Kot Matthew 24:3, 7-14, 21, 22.

Jesus eyetre kpukpru ufen ke isọn̄ ke isua tọsịn kiet oro enye editiede ke heaven ikara isọn̄ emi. (Isaiah 9:6, 7; 11:9) Enye ayanam utom nte Akwa Oku onyụn̄ ọsọhi kpukpru idiọkn̄kpọ mbon oro ẹmade Abasi efep. Ntre, Abasi ayada Jesus osio udọn̄ọ, usọn̄, ye n̄kpa efep ke isọn̄ emi.Kot Isaiah 25:8; 33:24.

5. Mmanie ẹdidu ke Paradise oro itịn̄de iban̄a mi?

Afo oyokụt mbon oro ẹmade Abasi ẹnyụn̄ ẹkpepde ndinam se inemde enye esịt ke Ufọkmbono Obio Ubọn̄

Mbon oro ẹkopde item Abasi ẹdidu ke Paradise emi. (1 John 2:17) Jesus ọkọdọhọ mme anditiene enye ẹkeyom mbon nsụhọdeidem ẹkpep mmọ se ẹkpenamde man Abasi ama mmọ. Jehovah ke etịm ata ediwak owo idem ke ofụri ererimbot ndidu uwem ke isọn̄ emi ke obufa ererimbot esie. (Zephaniah 2:3) Ke ẹkpep mme owo nte ẹkpedide nti ebe ye nti ete, nti ibanndọ ye nti eka ke mme Ufọkmbono Obio Ubọn̄ Mme Ntiense Jehovah. Nditọ ke ẹdiana ye mme ete ye eka ẹkpono Abasi, kpukpru mmọ ke ẹnyụn̄ ẹkpep nte ikemede ndibọ ufọn nto eti mbụk emi.Kot Micah 4:1-4.