Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Eti Mbụk Emi Otode Abasi!

 UKPEPN̄KPỌ 9

Nso ke Akpanam man Ubon Fo Ẹkop Inemesịt?

Nso ke Akpanam man Ubon Fo Ẹkop Inemesịt?

1. Ntak emi ndọ emi ekemde ye ibet anamde ubon ẹkop inemesịt?

Jehovah emi edide Abasi inemesịt, emi onyụn̄ oyomde mme ubon ẹkop inemesịt, ọnọ nnyịn eti mbụk. (1 Timothy 1:11) Jehovah ọkọtọn̄ọ ndọ. Ndọ emi ekemde ye ibet anam ubon ẹkop inemesịt sia enye anam ẹkeme ndibọk nditọ nte ọfọnde. Mme Christian ẹkpenyene ndisịn ndọ mmọ ke n̄wed ukara nte ukara ẹdọhọde.Kot Luke 2:1, 4, 5.

Jehovah oyom ndọ ebịghi adan̄a didie? Enye oyom ndọ ebịghi ke nsinsi. Jehovah iyomke mme ọdọ ndọ ẹkpọn̄ kiet eken ẹbịne owo en̄wen. (Mme Hebrew 13:4) Enye asasua usiondọ. (Malachi 2:16) Efịbe edi n̄kukụre n̄kpọ emi ekemede ndinam Jehovah ayak Christian adian̄ade ndọ ọkọdọ owo en̄wen.Kot Matthew 19:3-6, 9.

2. Didie ke ebe ye n̄wan ẹkpenam n̄kpọ ye kiet eken?

Jehovah okobot erenowo ye n̄wan ke usụn̄ emi mmọ mbiba ẹkemde ye kiet eken. (Genesis 2:18) Sia ebe edide ibuot ufọk, edi utom esie ndinọ ubon udia, ọfọn̄, ebietidụn̄, ye mme n̄kpọ eken nnyụn̄ n̄kpep mmọ n̄kpọ mban̄a Abasi. Enye ekpenyene ndima n̄wan esie n̄kan idem esie. Ebe ye n̄wan ẹkpenyene ndima nnyụn̄ n̄kpono kiet eken. Sia mîdụhe eke mîsinamke ndudue, ebe ye n̄wan ẹkpenyene ndikpep ndifen nnọ kiet eken koro emi edi akpan n̄kpọ kiet emi anamde ẹkop inemesịt ke ndọ.Kot Ephesus 4:31, 32; 5:22-25, 33; 1 Peter 3:7.

3. Ndi akpana ẹsuan ndọ emi inemesịt mîdụhe?

Edieke edide afo ye ebe fo ẹmenyene mfịna, ẹnen̄ede ẹsịn ifịk ẹma kiet eken. (1 Corinth 13:4, 5) Bible idọhọke ke  ndidian̄ade ntie ekeme ndikọk mfịna ndọ.Kot 1 Corinth 7:10-13.

4. Nditọ, Jehovah oyom n̄kpọ etie didie ye mbufo?

Jehovah oyom mbufo ẹkop inemesịt. Enye ọnọ mbufo mfọnn̄kan item oro edinamde mbufo ẹkop inemesịt. Enye oyom mbufo ẹdia ufọn ifiọk ete ye eka mbufo ẹnyụn̄ ẹkpep n̄kpọ ẹto se mmọ ẹkụtde ke uwem. (Colossae 3:20) Jehovah n̄ko oyom mbufo ẹnam se imọ ye Eyen imọ idọhọde sia emi edinamde mbufo ẹkop inemesịt.Kot Ecclesiastes 11:9–12:1; Matthew 19:13-15; 21:15, 16.

5. Mme ete ye eka, nso ikeme ndinam nditọ mbufo ẹkop inemesịt?

Ana mbufo ẹsịn idem ẹnam utom man ẹnọ nditọ mbufo udia, ebietidụn̄, ye ọfọn̄. (1 Timothy 5:8) Edi man nditọ mbufo ẹkop inemesịt, oyom mbufo ẹkpep mmọ ndima Abasi nnyụn̄ n̄kpebe enye. (Ephesus 6:4) Nte mbufo ẹmade Abasi ekeme ndinam nditọ mbufo ẹma enye nde. Ndida Bible nteme nditọ mbufo se ẹkpenamde ekeme ndinam mmọ ẹdi nti nditọ.Kot Deuteronomy 6:4-7; Mme N̄ke 22:6.

Nditoro nnyụn̄ nsịn udọn̄ nnọ nditọwọn̄ esin̄wam mmọ. Ana ẹnen̄ede mmọ ẹnyụn̄ ẹtụnọ mmọ n̄ko. Emi idiyakke mmọ ẹnam mme n̄kpọ oro ẹdinamde mmọ ẹkûkop inemesịt. (Mme N̄ke 22:15) Edi ikpanaha ẹfiomo nditọ ke ini ẹtụnọde mmọ.Kot Colossae 3:21.

Mme Ntiense Jehovah ẹsio mme n̄wed emi ẹkemede ndin̄wam mme ete ye eka ye nditọ mmọ. Kpukpru se idude ke n̄wed emi ẹto Bible.Kot Psalm 19:7, 11.