Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Eti Mbụk Emi Otode Abasi!

 UKPEPN̄KPỌ 13

Nso ke Abasi Aduak Ndinam Ido Ukpono?

Nso ke Abasi Aduak Ndinam Ido Ukpono?

1. Ndi kpukpru ido ukpono ẹfọn?

Mbon oro ẹnyenede eti esịt, emi ẹyomde ndinem Abasi esịt, ẹdu ke kpukpru ido ukpono. Enem ndifiọk nte ke Abasi okụt onyụn̄ enen̄ede ama mmọ. Edi, ndusụk owo ẹnam ediwak ndiọi n̄kpọ ke enyịn̄ ido ukpono. (2 Corinth 4:3, 4; 11:13-15) Mbụk n̄kpọntịbe owụt ke ndusụk ido ukpono ẹsinam edinam oyomonsia, ẹsobo ofụri ekpụk, ẹn̄wana ekọn̄, ẹnyụn̄ ẹsabade nditọwọn̄. Utọ n̄kpọ emi esinen̄ede afịna mbon emi ẹmade Abasi.Kot Matthew 24:3-5, 11, 12.

Ke adan̄aemi ido ukpono akpanikọ ẹdude uwem emi ọnọde Abasi ubọn̄, nsunsu ido ukpono idụhe eti uwem. Mmọ ikpepke se isịnede ke Bible. Mmọ iyakke mme owo ẹdiọn̄ọ Abasi m̀mê se itịbede inọ mme akpan̄kpa. Edi Jehovah Abasi oyom mme owo ẹdiọn̄ọ akpanikọ ẹban̄a imọ.Kot Ezekiel 18:4; 1 Timothy 2:3-5.

2. Nso ke Abasi aduak ndinam ido ukpono?

Esịt enen̄ede enem nnyịn ndifiọk ke ido ukpono ekededi ikemeke ndibian̄a Abasi ndọhọ ke imama enye ke ini edide mmọ ẹma ererimbot Satan. (James 4:4) Ikọ Abasi okot kpukpru nsunsu ido ukpono “Akwa Babylon.” Nsunsu ido ukpono ọkọtọn̄ọ ke Babylon eset ke Ukwọ eyo Noah ama ekebe. Abasi ọmọn̄ ososobo mme ido ukpono emi ẹbian̄ade ẹnyụn̄ ẹfịkde mme owo.Kot Ediyarade 17:1, 2, 5, 16, 17; 18:8.

Enem n̄ko ndifiọk ke Jehovah ifreke kpukpru mbon oro ẹnyenede eti esịt, emi ẹdude ke mme nsunsu ido ukpono ke ofụri ererimbot. Enye ke osion̄o mmọ do ekpep mmọ akpanikọ.Kot Micah 4:2, 5.

 3. Nso ke mbon oro ẹnyenede eti esịt ẹkpenam?

Ido ukpono akpanikọ adadian mme owo ọtọkiet

Jehovah ama mbon oro ẹmade akpanikọ ye edinen ido. Enye ọdọhọ mmọ ẹwọrọ ẹkpọn̄ nsunsu ido ukpono. Mbon oro ẹmade Abasi ẹnyịme ndiwọrọ n̄kpọn̄ nsunsu ido ukpono man ẹnem Abasi esịt.Kot Ediyarade 18:4.

Ke ini mbon oro ẹnyenede eti esịt ẹkekopde eti mbụk oro mme apostle ẹkekwọrọde, mmọ ẹma ẹkop inemesịt. Mmọ ẹma ẹkpep obufa usụn̄ oro Jehovah okoyomde mmọ ẹdu uwem, kpa uwem oro enen̄erede ọnọ owo inemesịt, anam uwem enyene se ọwọrọde onyụn̄ ọnọ idotenyịn. Mmọ ẹma ẹnịm eti uwụtn̄kpọ ẹnọ nnyịn ke ndikanam se mmọ ẹkekopde nnyụn̄ nnịm Jehovah akpa ke uwem mmọ.Kot 1 Thessalonica 1:8, 9; 2:13.

Jehovah esidara mbon oro ẹwọrọde ẹkpọn̄ nsunsu ido ukpono onyụn̄ ada mmọ nte nditọ esie. Edieke anamde se Jehovah ọdọhọde, afo eyedi ufan Abasi onyụn̄ esịne ke ubon esie emi ẹdidude uwem ke nsinsi.Kot Mark 10:29, 30; 2 Corinth 6:17, 18.

4. Didie ke Abasi edinam ofụri ererimbot ẹkop inemesịt?

Nsobo emi ẹdisobode nsunsu ido ukpono edi eti mbụk. Emi ayanam ofụri ererimbot ẹbọ emem. Nsunsu ido ukpono idifiakke ibian̄a mme owo m̀mê nditọ ubahade ke otu ubonowo. Kpukpru owo ẹyediana kiet ẹtuak ibuot ẹnọ ata Abasi kierakiet.Kot Ediyarade 18:20, 21; 21:3, 4.