Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Eti Mbụk Emi Otode Abasi!

 UKPEPN̄KPỌ 6

Nso Idotenyịn Idu Inọ Mme Akpan̄kpa?

Nso Idotenyịn Idu Inọ Mme Akpan̄kpa?

1. Nso idotenyịn idu inọ mme akpan̄kpa?

Ke ini Jesus esịmde Bethany emi odude ekpere Jerusalem, Lazarus ufan esie ama akpakpa ofụri usen inan̄. Ntre Jesus asan̄a ye Martha ye Mary, nditọeka akpan̄kpa, aka udi. Ibịghike, mme owo ẹdi ẹdiyọhọ do. Kere nte esịt enemde Martha ye Mary ke ini Jesus anamde Lazarus eset ke n̄kpaKot John 11:21-24, 38-44.

Martha ama ọfọfiọk ke mme akpan̄kpa ẹyeset. Enye ama ọfiọk ke Jehovah ayanam mme akpan̄kpa ẹset ẹfiak ẹdidu uwem ke isọn̄.Kot Job 14:14, 15.

2. Nso isitịbe ke ini owo akpade?

Abasi ọkọdọhọ Adam ete: “Koro afo edide ntan, oyonyụn̄ afiak ke ntan.”GENESIS 3:19.

Ẹkeda ntan ẹbot nnyịn. (Genesis 2:7; 3:19) Spirit idụn̄ke-dụn̄ nnyịn ke idem, edi enenịm nnyịn uwem. Owo ama akpa, kpukpru n̄kpọ ke idem esie ẹkpan̄a. Omokụt do ke Bible ikpepke ite ke owo akpa enyịn ikpaha utọn̄. Ntre ke ekedi ye Lazarus. Ke enye ama ekeset ke n̄kpa, enye iketịn̄ke n̄kpọ ndomokiet iban̄a se iketịbede ke ini imọ ikakpade koro mme akpan̄kpa ifiọkke baba n̄kpọ kiet.Kot Psalm 146:4; Ecclesiastes 9:5, 6, 10.

Ndi Abasi esitụhọde mme owo ke ikan̄ ke mmọ ẹma ẹkekpa? Sia Bible ọdọhọde ke mme akpan̄kpa ifiọkke baba n̄kpọ kiet, ukpepn̄kpọ ikan̄ hell edi nsunsu ukpepn̄kpọ emi abiatde Abasi enyịn̄. Utọ ekikere emi esikam etetek enye esịt.Kot Jeremiah 7:31.

 3. Ndi mme akpan̄kpa ẹkeme nditịn̄ ikọ nnọ nnyịn?

Mme akpan̄kpa ikemeke nditịn̄ ikọ m̀mê ndikop ikọ. (Psalm 115:17) Mme idiọk angel ẹsitịn̄ ikọ ye mme owo, ẹnam nte idi mbon oro ẹkekpan̄ade. (2 Peter 2:4) Jehovah ọdọhọ ikûdodomo ndineme nneme ye mme akpan̄kpa.Kot Deuteronomy 18:10, 11.

4. Mmanie ke ẹdinam ẹset ke n̄kpa?

Ata ediwak owo emi ẹdude ke udi ẹyeset ẹdidu uwem ke isọn̄ emi. Idem ndusụk mbon oro ẹkenamde idiọkn̄kpọ sia mmọ mîkọfiọkke Jehovah ẹyeset n̄ko.Kot Luke 23:43; Utom 24:15.

Mbon oro ẹdinamde ẹset mi ẹyenen̄ede ẹkpep n̄kpọ ẹban̄a Abasi ẹnyụn̄ ẹsụk ibuot ẹnọ Jesus ndiwụt ke imọbuọt idem ye enye. (Ediyarade 20:11-13) Mbon oro ẹdisetde ke n̄kpa inyụn̄ inam nti n̄kpọ ẹyedu uwem ke nsinsi ke isọn̄ emi.Kot John 5:28, 29.

5. Nso ke ediset ke n̄kpa ekpep nnyịn aban̄a Jehovah?

Abasi ndikọnọ Eyen esie edikpa ke ibuot nnyịn anam inyene idotenyịn ke mme owo ẹyeset ke n̄kpa. Ntre Jehovah ada ediset ke n̄kpa owụt nnyịn ima ye mfọnido oro owo mîdotke. Anie ke akpama ndikụt ke ini mme akpan̄kpa ẹdisetde?Kot John 3:16; Rome 6:23.