Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Eti Mbụk Emi Otode Abasi!

 UKPEPN̄KPỌ 14

Ntak Emi Abasi Enyenede Esop?

Ntak Emi Abasi Enyenede Esop?

1. Ntak emi Abasi akanamde Israel edi esop?

Abasi akanam nditọ Abraham ẹdi idụt m̀mê esop kiet, ọnọ mmọ ibet, onyụn̄ okot mmọ idụt Israel. Enye ama ayak ikọ esie esịn mmọ ke ubọk. Ntre, mmọ ikpọn̄-ikpọn̄ ẹkediọn̄ọ ẹnyụn̄ ẹkpono ata Abasi. (Psalm 147:19, 20) Ndutịm emi ama ada ufọn ọsọk kpukpru mme idụt isọn̄.Kot Genesis 22:18.

Abasi ekemek nditọ Israel ete ẹdi ntiense imọ. Nte n̄kpọ eketiede ye idụt Israel owụt ke n̄kpọ esifọn ye mbon oro ẹkopde item Abasi. (Deuteronomy 4:6) Emi akanam mbon en̄wen ẹkeme ndidiọn̄ọ ata Abasi.Kot Isaiah 43:10, 12.

2. Ntak emi ata mme Christian ẹnamde utom nte esop?

Nsọn̄ibuot Israel ama anam Abasi ọkpọn̄ mmọ, akabade anam n̄kpọ ye esop Christian. (Matthew 21:43; 23:37, 38) Idahaemi, ata mme Christian mfịn ẹdidi mme ntiense ẹnọ Jehovah utu ke nditọ Israel.Kot Utom 15:14, 17.

Jesus ekekpep mme mbet esie ete ẹdiana kiet nte esop ẹtie ntiense ẹnọ Jehovah ẹnyụn̄ ẹnam mme owo ke kpukpru idụt ẹdi mbet imọ. (Matthew 10:7, 11; 24:14; 28:19, 20) Utom emi ọmọn̄ okokụre ke akpatre ini eyo emi. Akpa edi emi Jehovah anamde ata ediwak owo ke nsio nsio idụt ẹdiana kiet ẹtuak ibuot ẹnọ imọ. (Ediyarade 7:9, 10) Ata mme Christian ẹnam utom nte esop man ẹkeme ndisịn udọn̄ nnọ kiet eken nnyụn̄ n̄n̄wam kiet eken. Mmọ ẹsikpep ukem n̄kpọ ke mme mbono esop mmọ ke ofụri ererimbot.Kot Mme Hebrew 10:24, 25.

 3. Didie ke esop Mme Ntiense Jehovah ọkọtọn̄ọ ke eyo nnyịn?

Ke n̄kpọ nte 1870, ekpri otu nditọ ukpepn̄kpọ Bible ẹma ẹdụn̄ọde Bible ẹkụt akpanikọ oro mme ọkwọrọikọ mîkesikpepke aba. Mmọ ẹma ẹkụt ke Jesus ọkọdọhọ mme Christian ẹkwọrọ ikọ. Ntre mmọ ẹma ẹtọn̄ọ ndikwọrọ etop Obio Ubọn̄ Abasi ke ofụri ererimbot. Mmọ ẹketọn̄ọ ndikere Mme Ntiense Jehovah ke 1931.Kot Utom 1:8; 2:1, 4; 5:42.

4. Ẹtịm didie esop Mme Ntiense Jehovah mfịn?

Esop mme Christian emi ẹkedude ke nsio nsio idụt ke eyo mme apostle ẹkesitiene ndausụn̄ mbiowo ifan̄ oro ẹkediọn̄ọde nte otu emi ẹsede ẹban̄a utom mme Christian. Otu emi ẹkesinyụn̄ ẹtiene ndausụn̄ Jesus emi edide Ibuot esop Christian. (Utom 16:4, 5) Kpasụk ntre ke edi mfịn, Mme Ntiense Jehovah ẹtiene ndausụn̄ otu emi ẹsede ẹban̄a utom mmọ ke ofụri ererimbot. Otu emi edi mbiowo ifan̄ oro ẹnen̄erede ẹfiọk Bible. Mmọ ẹse enyịn ke kpukpru n̄kọk itieutom Mme Ntiense Jehovah ke ofụri ererimbot. Mi ke ẹsikabade mme n̄wed ikọ Abasi ke se ibede usem 600, ẹmịn̄, ẹnyụn̄ ẹnọ mmọ ẹka nsio nsio ebiet. Otu emi ẹsida mme n̄kpọ emi ẹkpep esop Mme Ntiense Jehovah emi ebede 100,000 ke ofụri ererimbot Ikọ Abasi. Mbiowo m̀mê mme esenyịn ẹdu n̄ko ke mme esop emi kiet kiet. Irenowo emi ẹkpeme otuerọn̄ Abasi ke ima.Kot 1 Peter 5:2, 3.

Ẹtịm esop Mme Ntiense Jehovah ntem man mmọ ẹkwọrọ eti mbụk ẹnyụn̄ ẹnam mme owo ẹdi mbet Christ. Nnyịn isinyụn̄ ikwọrọ ikọ ke ufọk ke ufọk nte mme apostle ẹkesikwọrọde. (Utom 20:20) Nnyịn imesinyụn̄ ika ikekpep Bible ye owo ekededi emi amade akpanikọ. Idịghe esop kpọt ke nnyịn idi, edi idi ata ubon emi inyenede edima Ete. Nnyịn idi nditọeka emi ẹmade kiet eken. (2 Thessalonica 1:3) Ndidu ke esop oro enemde Abasi esịt nnyụn̄ n̄n̄wam mme owo anam ikọt Jehovah ẹdi mbon oro ẹkopde inemesịt ẹkan ke isọn̄ emi.Kot Psalm 33:12; Utom 20:35.

 

Kpep N̄kpọ En̄wen

Nso Orụk Mme Owo ke Mme Ntiense Jehovah Ẹdi?

Mme Ntiense Jehovah ifan̄ ke afo ọdiọn̄ọ? Nso ke enen̄ede ọdiọn̄ọ aban̄a nnyịn?