Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

Usen Ikpe—Nso ke Enye Edi?

Usen Ikpe—Nso ke Enye Edi?

AFO ekere ke Usen Ikpe editie didie? Ediwak owo ẹkere ke ediwak biliọn owo ẹyesan̄a ke adiana ke adiana ẹdida ke iso ebekpo Abasi. Do, ẹyebiere ikpe ẹnọ owo kiet kiet. Ndusụk owo ẹyebọ utịp ndidu uwem inemesịt ke heaven, ke adan̄aemi ẹdibiomde mbon eken ikpe nsinsi ndutụhọ. Nte ededi, Bible owụt ke Usen Ikpe okpụhọde ofụri ofụri ye se ndusụk owo ẹkerede. Ikọ Abasi owụt ke ini emi edi ini idotenyịn ye edifiak n̄wụk, idịghe ini ndịk.

Apostle John etịn̄ ke Ediyarade 20:11, 12 aban̄a nte Usen Ikpe editiede, ete: “Ndien n̄kụt akwa afia ebekpo ye enye emi etiede ke esịt. Isọn̄ ye enyọn̄ ẹnyụn̄ ẹfen̄e ẹkpọn̄ iso esie, owo inyụn̄ ikwe aba itie inọ mmọ. Ndien n̄kụt mme akpan̄kpa, ikpọ ye n̄kpri, nte ẹdade ke iso ebekpo, ẹnyụn̄ ẹkûbọde mme n̄wed. Edi ẹkûbọde n̄wed en̄wen; enye edi n̄wed uwem. Ndien ẹda mme n̄kpọ eke ẹwetde ke n̄wed emi ẹkpe ikpe mme akpan̄kpa nte ekemde ye mme edinam mmọ.” Anie edi Ebiereikpe oro ẹtịn̄de ẹban̄a mi?

Jehovah Abasi edi akakan Ebiereikpe ubonowo. Nte ededi, enye ayak ata ata utom edibiere ikpe ọnọ owo efen. Ke Utom 17:31, apostle Paul ọkọdọhọ ke Abasi “emenịm usen eke enye aduakde ndikpe ikpe nnọ isọn̄ ke edinen ido ebe ke owo emi enye emekde.” Ebiereikpe oro ẹmekde mi edi Jesus Christ emi ẹkenamde eset ke n̄kpa. (John 5:22) Nte ededi, Usen Ikpe emi ọtọn̄ọ ini ewe? Enye ọniọn̄ adan̄a didie?

N̄wed Ediyarade owụt ke Usen Ikpe ọtọn̄ọ ke ekọn̄ Armageddon ama ekebe, ke ẹma ẹkesobo editịm n̄kpọ Satan emi odude ke isọn̄ ẹfep.* (Ediyarade 16:14, 16; 19:19-20:3) Ke ekọn̄ Armageddon okụrede, ẹyekọbi Satan ye mme demon esie ke editụn̄ọ ukpe ke tọsịn isua kiet. Ke ini oro, owo 144,000, emi ẹdide nsan̄a mme ada udeme nnyene ke heaven ẹdidi mme ebiereikpe ẹyenyụn̄ “ẹkara nte ndidem ye Christ ke isua tọsịn kiet.” (Ediyarade 14:1-3; 20:1-4; Rome 8:17) Usen Ikpe idịghe edinam emi ẹnamde usọp usọp ẹkụre ke usen kiet. Enye edibịghi ke isua tọsịn kiet.

Jesus Christ ‘eyekpe ikpe mme odu-uwem ye mme akpan̄kpa’ ke isua tọsịn kiet oro. (2 Timothy 4:1) “Mme odu-uwem” ẹdidi “akwa otuowo” emi ẹbọhọde Armageddon. (Ediyarade 7:9-17) Apostle John n̄ko ama okụt ‘mme akpan̄kpa nte ẹdade ke iso ebekpo’ ubiereikpe. Nte Jesus ọkọn̄wọn̄ọde, ‘mme andidu ke udi editi ẹyekop uyo Christ ẹnyụn̄ ẹwọn̄ọ ẹdi’ ndien emi edidi ke ediset ke n̄kpa. (John 5:28, 29; Utom 24:15) Edi nso ke ẹdida ẹbiere ikpe inọ kpukpru owo?

Nte n̄kukụt apostle John owụtde, ‘ẹma ẹkûbọde mme n̄wed,’ ẹnyụn̄ “ẹda mme n̄kpọ eke ẹwetde ke n̄wed emi ẹkpe ikpe mme akpan̄kpa nte ekemde ye mme edinam mmọ.” Ndi mme n̄wed emi ẹdi n̄wetnnịm n̄kpọ emi aban̄ade se mme owo ẹkenamde mbemiso ẹkpade? Baba, ikpe oro idikọn̄ọke ke se mme owo ẹkenamde mbemiso mmọ ẹkpade. Nnyịn isan̄a didie ifiọk emi? Bible ọdọhọ ete: “Ikpe idiọkn̄kpọ etebe owo emi ama akakpa.” (Rome 6:7) Oro edi ndidọhọ ke owo iditịghi aba idiọkn̄kpọ mbon oro ẹnamde ẹset ẹfiak ẹdidu uwem. Ke ntre anaedi mme n̄wed oro ẹdi mme n̄kpọ efen oro Abasi ediyomde ẹnam. Man ẹdu uwem ke nsinsi, mbon oro ẹbọhọde Armageddon ye mbon oro ẹsetde ke n̄kpa ẹnyene ndinịm mbet Abasi, emi esịnede mbufa mbet efen ekededi emi Jehovah edinọde ke tọsịn isua kiet oro. Ke ntre, ẹdibiere ikpe inọ mme owo itiene se mmọ ẹnamde ke Usen Ikpe.

Usen Ikpe oro ọyọnọ ediwak biliọn owo akpa ifet mmọ ndikpep n̄kpọ mban̄a uduak Abasi nnyụn̄ nnam n̄kpọ ekekem ye uduak emi. Emi ọwọrọ ke akamba utom unọ ukpep oyodu ini oro. Ke akpanikọ, ‘mme andidụn̄ ererimbot ẹyekpep se inende.’ (Isaiah 26:9) Nte ededi, idịghe kpukpru owo ẹdinyịme ndinam uduak Abasi. Isaiah 26:10 ọdọhọ ete: “Ọkpọfọn ido ye idiọk owo, enye idikpepke se inende; enye ayanam ukwan̄-n̄kpọ ke isọn̄ mmọ eke ẹnende, idinyụn̄ ikwe ubom Jehovah.” Ẹyesobo ndiọi owo emi ke nsinsi ke Usen Ikpe oro.—Isaiah 65:20.

Ke utịt Usen Ikpe oro, mbon oro ẹbọhọde ‘ẹyedidu uwem’ ọyọhọ ọyọhọ nte mme mfọnmma owo. (Ediyarade 20:5) Ke Usen Ikpe oro, ẹyenam ubonowo ẹfiak ẹkedu ke akpa mfọnmma idaha oro mmọ ẹkedude. (1 Corinth 15:24-28) Do ẹyedomo mme owo akpatre udomo. Ẹyekpọhọde Satan ke n̄kpọkọbi emi ẹkekọbide enye ẹnyụn̄ ẹnọ enye akpatre ifet man odomo nditụn mme owo usụn̄. (Ediyarade 20:3, 7-10) Mbon oro ẹdin̄wanade ẹbiọn̄ọ enye ẹyekụt nte un̄wọn̄ọ Bible emi osude ọyọhọ ọyọhọ: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ke akpanikọ, Usen Ikpe ayada edidiọn̄ ọsọk kpukpru mbon oro ẹnamde akpanikọ!


*  Kaban̄a Armageddon, mbọk se Insight on the Scriptures, Eboho 1, page 594-595, 1037-1038, ye ibuot 20 ke n̄wed Tuak Ibuot nọ Ata Abasi Kierakiet. Mme Ntiense Jehovah ẹsio n̄wed mbiba emi.

← Se ibuot n̄wed oro etịn̄de aban̄a

Kpep N̄kpọ En̄wen

ENYỌN̄-UKPEME

Nso ke Utịt Ọwọrọ?

Ndi ọmọfiọk ke se Bible etịn̄de aban̄a utịt idịghe idiọk mbụk, akam edi eti mbụk?