Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

Ndi Se Abasi Akaduakde Edi Emi?

Ndi Se Abasi Akaduakde Edi Emi?

KOT n̄wedmbụk n̄kpọntịbe ekededi. Se ekebe ndise, mîdịghe kpan̄ utọn̄ nọ mbụk n̄kpọntịbe ke ekebe ukopikọ. Ata ediwak mbụk ẹsiban̄a ubiatibet, ekọn̄, ye edinam oyomonsia! Kere ban̄a mme mfịna oro afo esinyenede. Ekeme ndidi udọn̄ọ m̀mê n̄kpa owo ima anam fi enen̄ede okop mfụhọ. Ekeme nditie fi ke idem nte eketiede eti owo oro Job, emi ọkọdọhọde ke imọ ‘ima ikụt ukụt.’—Job 10:15.

Bụp idemfo:

  • Ndi se Abasi akaduakde ọnọ mi ye ofụri ubonowo edi emi?
  • M̀mọ̀n̄ ke n̄keme ndikụt un̄wam ndiyọ mme mfịna mi?
  • Ndi idotenyịn odu ke nnyịn iyokụt emem ke isọn̄ tutu amama?

Bible ọbọrọ mme mbụme emi ke usụn̄ oro ọnọde uyụhọ.

BIBLE EKPEP KE ABASI AYANAM MME UKPỤHỌDE EMI KE ISỌN̄.

Akanieren emi afiakde akabade akparawa

“Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:4


Ekpri eyenan̄wan emi edide mbụn̄ọ ekeme ndifiak mfehe itọk

“Mbụn̄ọ eyenek nte edop.”—Isaiah 35:6


Eren emi edide nnan afiak okụt usụn̄

“Enyịn ẹyen̄wan̄a mme nnan.”—Isaiah 35:5


N̄wan kiet okop inemesịt ndikụt owo emi enye amade afiakde edidu uwem

‘Kpukpru mme andidu ke udi editi ẹyewọn̄ọ ẹdi.’—John 5:28, 29


Ekpri eyeneren emi ọkọdọn̄ọde afiak okop nsọn̄idem

“Andidụn̄ ididọhọke ite, Ndọdọn̄ọ.”—Isaiah 33:24


In̄wan̄ ibokpot

“Uwak ibokpot ẹyedu ke isọn̄.”—Psalm 72:16


BỌ UFỌN TO SE BIBLE EKPEPDE

Irenowo iba ke ẹkpep Bible

Kûsọsọp udọhọ ke se ẹtịn̄de emi ẹdi ikpîkpu ekikere. Abasi ọn̄wọn̄ọ ndinam mme n̄kpọ emi, ndien Bible etịn̄ nte Enye edinamde oro.

Edi Bible anam se ikande sụk editetịn̄. Enye owụt fi usụn̄ oro afo ekemede ndikop ata inemesịt ke uwem idem idahaemi. Da esisịt ini kere ban̄a mme editịmede esịt ye mme mfịna oro afo enyenede. Mmọ ẹkeme ndisịne unana okụk, mme mfịna ubon, unana nsọn̄idem, m̀mê owo ima ndikpa. Bible ekeme ndin̄wam fi ndise mban̄a mme mfịna mfịn, onyụn̄ ekeme ndidọn̄ fi esịt ke ndibọrọ mme utọ mbụme nte:

  • Ntak emi nnyịn ibọde ufen-e?
  • Ikeme didie ndiyọ mme editịmede esịt ke uwem?
  • Ikeme didie ndinam uwem ubon nnyịn etetịm enem?
  • Nso isitịbe inọ nnyịn ke ini nnyịn ikpade?
  • Ndi nnyịn iyafiak ikụt mbon ima nnyịn oro ẹkekpade tutu amama?
  • Didie ke nnyịn ikeme nditịm mfiọk nte ke Abasi oyosu mme un̄wọn̄ọ esie kaban̄a ini iso?

Afo ndikot n̄wed emi owụt ke afo amama ndifiọk se Bible ekpepde. N̄wed emi ayan̄wam fi. Afo oyokụt ke mme ikpehe ekikere ẹnyene mme mbụme ke idakisọn̄. Ata ediwak owo ẹma mbụme ye ibọrọ oro ẹsidade ke ini ẹnemede nneme Bible ye Mme Ntiense Jehovah. Nnyịn imodori enyịn ke afo n̄ko ayama. Abasi akpakam ọdiọn̄ fi nte afo okopde inem ye uyụhọ oto edidụn̄ọde se Bible enen̄erede ekpep!

MEHE YE BIBLE FO

Bible

N̄wed ye leta 66 ẹnam Bible. Ẹbahade mmọ ẹdọn̄ ke mme ibuot ye mme ufan̄ikọ man ẹkeme ndisọp n̄kûbọde itie oro ẹyomde. Ke ini ẹsiakde mme itie N̄wed Abasi ke n̄wed emi, akpa nọmba oro ẹwetde ẹdian enyịn̄ itien̄wed oro edi ibuot n̄wed Bible, ndien efen oro etienede edi ufan̄ikọ. Ke uwụtn̄kpọ, itien̄wed emi “2 Timothy 3:16” ọwọrọ udiana n̄wed Timothy, ibuot 3, ufan̄ikọ 16.

Afo ọyọsọsọp emehe ye Bible ke ndise mme itien̄wed oro ẹsiakde ẹsịn ke n̄wed emi. Ndien, ntak mûtọn̄ọke ndutịm edikot Bible eke usen ke usen-e? Ke okotde ibuotn̄wed ita esịm ition ke usen, afo emekeme ndikot ofụri Bible mma ke isua kiet.

Kpep N̄kpọ En̄wen

Ẹsikpep Owo Bible Didie?

Mme owo ke ofụri ererimbot ẹdiọn̄ọ ke Mme Ntiense Jehovah ẹsikpep owo Bible ke mfọn. Se nte mmọ ẹsinamde.