Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

IBUOT EFỊTETA

Baptism ye Itie Ebuana Fo ye Abasi

Baptism ye Itie Ebuana Fo ye Abasi

Didie ke ẹsinịm mme Christian baptism?

Nso ke afo enyene ndinam man odot ndina baptism?

Didie ke owo ayak idem ọnọ Abasi?

Nso idi akpan ntak oro anamde owo ana baptism?

“SESE! Akpa mmọn̄; nso ibiọn̄ọ mi ndina baptism?” Adaidaha ufọkubọn̄ Ethiopia okobụp mbụme oro ke akpa isua ikie. Christian oro ekekerede Philip ama owụt enye ke Jesus edi Messiah oro ẹken̄wọn̄ọde. Se owo Ethiopia oro ekekpepde ke N̄wed Abasi ama enen̄ede otụk enye, ntre enye ama anam n̄kpọ aban̄a se enye ekekpepde. Enye ama ọdọhọ ke imoyom ndina baptism!—Utom 8:26-36.

Adaidaha ufọkubọn̄ Ethiopia eke akpa isua ikie

2 Edieke edide afo ama etịn̄ enyịn ekpep n̄wed emi toto ke ntọn̄ọ ye kiet ke otu Mme Ntiense Jehovah, afo emekeme ndibụp, ‘Nso ibiọn̄ọ mi ndina baptism?’ Etisịm idahaemi, afo ọmọfiọk ke Bible ọn̄wọn̄ọ nsinsi uwem ke Paradise. (Luke 23:43; Ediyarade 21:3, 4) Afo ọmọfiọk n̄ko aban̄a idaha mme akpan̄kpa ye idotenyịn ediset ke n̄kpa. (Ecclesiastes 9:5; John 5:28, 29) Ekeme ndidi afo emesitiene Mme Ntiense Jehovah odụk mme mbono esop onyụn̄ okụt nte mmọ ẹnamde-nam ido ukpono akpanikọ ẹwụt. (John 13:35) Ke edide akpan n̄kpọ akan, anaedi afo ọmọtọn̄ọ ndinyene ọkpọkpọ itie ebuana ye Jehovah Abasi.

3 Didie ke afo ekeme ndiwụt ke imoyom ndinam n̄kpọ Abasi? Jesus ọkọdọhọ mme anditiene enye ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism.” (Matthew 28:19) Jesus ke idemesie ama enịm uwụtn̄kpọ ke ndina baptism ke mmọ̣n̄. Owo ikesịmeke-sịme, m̀mê nditọtọhọ enye mmọ̣n̄ ke ibuot. (Matthew 3:16) Ikọ oro “baptism” oto ikọ Greek emi ọwọrọde “bụk.” Ke ntre, baptism Christian ọwọrọ ndibụk, m̀mê ndinyịni owo ofụri ofụri ke mmọ̣n̄.

4 Ana kpukpru mbon oro ẹyomde ndinyene eti itie ebuana ye Jehovah Abasi ẹna baptism. Baptism owụt an̄wan̄wa nte ke afo omoyom ndinam n̄kpọ Abasi. Enye owụt ke afo amama ndinam uduak Jehovah. (Psalm 40:7, 8) Nte ededi, man odot ndina baptism, odu mme akpan n̄kpọ oro anade anam.

OYOM IFIỌK YE MBUỌTIDEM

5 Afo ọmọtọtọn̄ọ ndinam akpa usio-ukot. Didie? Ebe ke ndinyene ifiọk mban̄a Jehovah Abasi ye Jesus Christ, ebe ke nditiene akpan ndutịm ukpep Bible. (John 17:3) Edi ediwak n̄kpọ ke ẹsụk ẹdodu ndikpep. Oyom mme Christian “ẹyọhọ ye nnennen ifiọk uduak” Abasi. (Colossae 1:9) Ndidụk mbono esop Mme Ntiense Jehovah enen̄ede an̄wam ke afan̄ emi. Edi akpan n̄kpọ ndidụk mme utọ mbono esop oro. (Mme Hebrew 10:24, 25) Ndidụk mme mbono esop kpukpru ini ayan̄wam fi ndikọri ke ifiọk Abasi.

Ndinyene nnennen ifiọk Ikọ Abasi edi akpan usio-ukot oro anamde owo odot ndina baptism

Ukpepn̄kpọ Bible

6 Nte ededi, iyomke ọfiọk kpukpru n̄kpọ ke Bible mbemiso odotde ndina baptism. Adaidaha ufọkubọn̄ Ethiopia oro ikọfiọkke kpukpru n̄kpọ, edi ama oyom ẹn̄wam enye ọfiọk ndusụk ikpehe ke N̄wed Abasi. (Utom 8:30, 31) Ukem ntre, afo ke enyenyene ekese ndikpep. Ke nditịm ntịn̄, afo udutreke ndikpep n̄kpọ mban̄a Abasi tutu amama. (Ecclesiastes 3:11) Nte ededi, mbemiso anade baptism, oyom afo ọfiọk onyụn̄ enyịme mme akpan ukpepn̄kpọ Bible. (Mme Hebrew 5:12) Utọ ukpepn̄kpọ oro esịne nditịm mfiọk idaha mme akpan̄kpa ye nte enyịn̄ Abasi ye Obio Ubọn̄ esie ẹdide akpan n̄kpọ.

7 Edi ndinyene ifiọk kpọt ikemke, koro “ke mbuọtidem mîdụhe owo ikemeke nditịm nnem [Abasi] esịt.” (Mme Hebrew 11:6) Bible asian nnyịn ete ke ini ndusụk owo ke Corinth eset ẹkekopde etop oro mme Christian ẹkekwọrọde, mmọ ẹma “ẹtọn̄ọ ndinịm ke akpanikọ ẹnyụn̄ ẹna baptism.” (Utom 18:8) Ke ukem usụn̄ oro, ndikpep Bible ekpenyene ndinam fi enyene mbuọtidem nte ke enye edi Ikọ Abasi oro ẹkedade odudu spirit Abasi ẹwet. Ndikpep Bible ekpenyene ndin̄wam fi enyene mbuọtidem ke mme un̄wọn̄ọ Abasi ye ke odudu oro uwa Jesus enyenede ndinyan̄a fi.—Joshua 23:14; Utom 4:12; 2 Timothy 3:16, 17.

NDIBUANA AKPANIKỌ BIBLE YE MBON EN̄WEN

8 Nte mbuọtidem fo ọkọride, afo udukemeke nditre nditịn̄ se afo ekpepde nnọ mbon en̄wen. (Jeremiah 20:9) Eyenen̄ede ọdọn̄ fi ndineme ye mbon en̄wen mban̄a Abasi ye mme uduak esie.—2 Corinth 4:13.

Mbuọtidem ekpenyene ndinụk fi ndineme se enịmde ke akpanikọ ye mbon en̄wen

Eren kiet ke eneme se enye enịmde ke akpanikọ ye owo en̄wen

9 Afo emekeme nditọn̄ọ nneme akpanikọ Bible ye mbon en̄wen ke ndida mbufiọk nnyene nneme ye iman fo, mme ufan fo, mbọhidụn̄ fo, ye nsan̄autom fo. Nte ini akade, afo oyoyom nditiene Mme Ntiense Jehovah mbuana ke utom ukwọrọikọ oro ẹdiomide-diomi. Adan̄a oro, neme n̄kpọ emi ye Ntiense oro ekpepde fi Bible. Edieke ẹkerede ke omodot ndibuana ke an̄wan̄wa utom ukwọrọikọ, ẹyenam ndutịm man afo ye owo oro esikpepde fi n̄kpọ ẹsobo ye mbiowo iba ke esop.

10 Emi ayanam fi etịm emehe ye ndusụk mbiowo Christian, emi ẹkpemede otuerọn̄ Abasi. (Utom 20:28; 1 Peter 5:2, 3) Edieke mbiowo emi ẹkụtde ke afo ọmọfiọk onyụn̄ enịm mme akpan ukpepn̄kpọ Bible ke akpanikọ, ke uwem fo odu ke n̄kemuyo ye mme edumbet Abasi, ke omonyụn̄ enen̄ede oyom ndidi kiet ke otu Mme Ntiense Jehovah, mmọ ẹyenam fi ọfiọk ke omodot ndibuana ke an̄wan̄wa utom ukwọrọikọ nte asuanetop eti mbụk oro mînaha baptism.

11 Ke n̄kan̄ eken, ekeme ndiyom anam mme ukpụhọde ke usụn̄ uwem ye mme edu fo man odot ndibuana ke an̄wan̄wa utom ukwọrọikọ. Emi ekeme ndisịne nditre mme n̄kpọ oro afo ẹsidịbede-dịbe anam. Ntre, mbemiso ọdọhọde ke iyom ndidi asuanetop oro mînaha baptism, ana afo etre ndinam akwa idiọkn̄kpọ, utọ nte oburobụt ido idan̄, ukpammịn, ye edida ibọk ke idiọk usụn̄.—1 Corinth 6:9, 10; Galatia 5:19-21.

EDIKABADE ESỊT YE EDINAM UKPỤHỌDE

12 Ana anam mme n̄kpọ efen mbemiso odotde ndina baptism. Apostle Peter ọkọdọhọ ete: “Ẹkabade esịt ẹnyụn̄ ẹwọn̄ọde ẹkpọn̄ [akani usụn̄ uwem] man ẹsọhi mme idiọkn̄kpọ mbufo ẹfep.” (Utom 3:19) Ndikabade esịt edi nditua n̄kpọfiọk ofụri esịt ke se akanamde. Enen̄ede oyom owo akabade esịt edieke enye okodude oburobụt uwem, edi oyom owo n̄ko akabade esịt edieke usụn̄ uwem esie mîketịmke isana. Ntak-a? Koro kpukpru owo ẹdi mme anam idiọkn̄kpọ emi ẹyomde Abasi efen ọnọ mmimọ. (Rome 3:23; 5:12) Mbemiso ekekpepde Bible, afo ukufiọkke uduak Abasi. Ntre, akpakanam didie odu uwem ekekem ye uduak esie? Ke ntem, oyom edikabade esịt.

13 Ana edikabade esịt asan̄a ye edinam ukpụhọde, m̀mê ‘ediwọn̄ọde n̄kpọn̄’ akani usụn̄ uwem. Ana anam se ikande editua n̄kpọfiọk. Oyom afo ọkpọn̄ akani usụn̄ uwem fo onyụn̄ ọsọn̄ọ ebiere idahaemi ndinam se ifọnde. Edikabade esịt ye edinam ukpụhọde ẹdi mme n̄kpọ oro afo enyenede ndinam mbemiso anade baptism.

NDIYAK IDEMFO NNỌ̣

14 Odu akpan n̄kpọ efen oro anade anam mbemiso anade baptism. Ana ayak idemfo ọnọ Jehovah Abasi.

15 Ke ini ọbọn̄de akam ofụri esịt ayak idemfo ọnọ Jehovah, afo ọn̄wọn̄ọ ndinọ enye san̄asan̄a utuakibuot ke nsinsi. (Deuteronomy 6:15) Edi ntak oyomde owo anam emi-e? Ọfọn, yak idọhọ ke erenowo ọtọn̄ọ uyomima ye n̄wan. Adan̄a nte enye okụtde ke n̄wan oro enyene nti edu, ntre ke enye editetịm ama n̄wan oro. Nte ini akade, odot ndikere ke enye oyobụp eyenan̄wan emi ndọ. Ke akpanikọ, ndidọ ndọ ediwọrọ ndinyene mme mbiomo efen efen. Edi ima oyonụk enye ndinam akpan usio-ukot emi.

16 Ke ama ekedi edifiọk onyụn̄ ama Jehovah, oro oyonụk fi ndinam n̄kpọ esie ke ofụri esịt. Owo ekededi oro oyomde nditiene Jesus Christ, kpa Eyen Abasi, enyene ‘ndikan̄ idemesie.’ (Mark 8:34) Nnyịn ikan̄ idem nnyịn ke nditịm n̄kpeme mbak mme ọkpọkpọ udọn̄ ye utịtmbuba edibiọn̄ọ nnyịn ndinọ Abasi ọyọhọ ọyọhọ nsụkibuot. Ntre, mbemiso anade baptism, ana edinam uduak Abasi edi ata akpan n̄kpọ ke uwem fo.—1 Peter 4:2.

NDIKAN NDỊK EDIKPU

17 Ndusụk owo ẹsimen̄e ndiyak idem nnọ Jehovah ke ntak ndịk oro mmọ ẹkopde nditọn̄ọ akpan usio-ukot emi. Mmọ ẹkeme ndifehe ndinam ibat nnọ Abasi nte mme Christian oro ẹyakde idem ẹnọ. Sia ẹkopde ndịk nte ke imekeme ndikpu ndinam akpanikọ nnọ Jehovah, mmọ ẹkere ke ifọnke ndiyak idem nnọ enye.

18 Nte afo ekpepde ndima Jehovah, oro oyonụk fi ndiyak idem nnọ enye, nnyụn̄ nsịn ofụri ukeme ndidu uwem ekekem ye uyakidem emi. (Ecclesiastes 5:4) Ke ama akayak idem ọnọ, eyịghe idụhe nte ke afo oyoyom ‘ndisan̄a nte odotde Jehovah nnem enye esịt ọyọhọ ọyọhọ.’ (Colossae 1:10) Ke ntak ima oro amade Abasi, afo udûkereke ke ndinam uduak esie enen̄ede ọsọn̄. Nte eyịghe mîdụhe, afo eyenyịme ye apostle John emi ekewetde ete: “Koro emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.”—1 John 5:3.

19 Iyomke afo edi mfọnmma mbemiso ayakde idem ọnọ Abasi. Jehovah ọfiọk mme mmeme fo, ndien akananam enye iyomke anam se ikande ukeme fo. (Psalm 103:14) Enye oyom afo okụt unen, ndien enye ayan̄wam fi. (Isaiah 41:10) Afo emekeme nditịm nnịm nte ke Jehovah “eyenen̄ede usụn̄ fo enịm” edieke ọbuọtde idem ye enye ke ofụri esịt.—Mme N̄ke 3:5, 6.

NDIYARADE UYAKIDEM FO EBE KE NDINA BAPTISM

20 Ndikere mme n̄kpọ oro inemede mi ekeme ndin̄wam fi ayak idem ọnọ Jehovah ke akam. Ana kpukpru mbon oro ẹnen̄erede ẹma Abasi ‘ẹtan̄a mbuọtidem mmọ an̄wan̄wa man ẹnyene edinyan̄a.’ (Rome 10:10) Didie ke afo ekeme ndinam oro?

Nte amayak idemfo ọnọ Abasi ke akam?

Eren kiet ke ọbọn̄ akam

21 Dọhọ esenyịn oro etiede ibuot ke esop mbufo ke imoyom ndina baptism. Enye oyodiomi ye ndusụk mbiowo man ẹdụn̄ọde mme mbụme oro ẹsịnede mme akpan ukpepn̄kpọ Bible ye afo. Edieke mbiowo emi ẹnyịmede ke afo omodot ndina baptism, mmọ ẹyedọhọ fi ke emekeme ndina baptism.* Ẹsinọ utịn̄ikọ oro ẹfiakde ẹdụn̄ọde se baptism ọwọrọde ke utọ idaha oro. Nte usụn̄ kiet ‘nditan̄a mbuọtidem mmọ an̄wan̄wa,’ etịn̄ikọ esibụp mbon oro ẹyomde ndina baptism mmemmem mbụme iba.

22 Baptism oro anam ẹdiọn̄ọ ke afo ama ayak idem ọnọ Abasi, ndien ke edi kiet ke otu Mme Ntiense Jehovah idahaemi. Ẹsibụk mbon baptism ofụri ofụri ke mmọn̄ man ọnọ an̄wan̄wa uyarade nte ke mmọ ẹma ẹyak idem ẹnọ Jehovah.

SE BAPTISM FO ỌWỌRỌDE

23 Jesus ọkọdọhọ ke ẹyenịm mme mbet imọ baptism “ke enyịn̄ Ete ye Eyen ye edisana spirit.” (Matthew 28:19) Emi ọwọrọ ke owo oro anade baptism ọfiọk onyụn̄ enyịme odudu oro Jehovah ye Jesus Christ ẹnyenede. (Psalm 83:18; Matthew 28:18) Enye n̄ko ọfiọk ufọn ye utom oro edisana spirit, m̀mê anamutom odudu Abasi anamde.—Galatia 5:22, 23; 2 Peter 1:21.

Baptism ọwọrọ edikpa n̄kpọn̄ akani usụn̄ uwem nnyịn nnyụn̄ ndu uwem ndinam uduak Abasi

Ẹnịm eren kiet baptism

24 Nte ededi, baptism idịghe ikpịkpu edibụk owo ke mmọ̣n̄. Enye ada aban̄a ata akpan n̄kpọ. Ndibụhọ ke mmọ̣n̄ ọwọrọ ke afo amakpa ọkpọn̄ akani usụn̄ uwem fo. Ndiwọrọ ke mmọn̄ owụt ke idahaemi afo odu uwem man anam uduak Abasi. Ti n̄ko ete ke afo ayak idem ọnọ Jehovah, uyakke unọ utom, edinam, owo, m̀mê esop. Uyakidem fo ye baptism ẹdi ntọn̄ọ ata n̄kpet n̄kpet itie ufan ye Abasi, oro edi, ndinyene ntotụn̄ọ itie ebuana ye enye.—Psalm 25:14.

25 Baptism inọhọ nsọn̄ọ ke owo enyene edinyan̄a. Apostle Paul ekewet ete: “Ẹka iso ẹsan̄a ke ndịk ye nnyekidem ẹnam edinyan̄a mbufo ọwọrọ usụn̄.” (Philippi 2:12) Baptism edi sụk ntọn̄ọ. Mbụme edi, Didie ke afo ekeme ndinịm idemfo ke ima Abasi? Akpatre ibuot n̄wed emi ọyọbọrọ mbụme emi.

SE BIBLE EKPEPDE

  • Baptism Christian edi ndibụk owo ofụri ofụri ke mmọ̣n̄, idịghe ndisesịme owo mmọ̣n̄.—Matthew 3:16.
  • Mme usio-ukot oro ẹdade ẹkesịm baptism ẹdi edinyene ifiọk ye mbuọtidem, ekem edikabade esịt, edinam ukpụhọde, ye ediyak idem nnọ Abasi.—John 17:3; Utom 3:19; 18:8.
  • Man ayak idem ọnọ Jehovah, ana akan̄ idemfo, ukem nte mme owo ẹkekan̄de idemmọ man ẹtiene Jesus.—Mark 8:34.
  • Baptism ada aban̄a edikpa n̄kpọn̄ akani usụn̄ uwem nnyụn̄ ndu uwem ndinam uduak Abasi.—1 Peter 4:2.

*  Ẹsinịm mme owo baptism ke n̄kpri ye ikpọ mbono Mme Ntiense Jehovah eke isua ke isua.


Mme Mbụme Ukpepn̄kpọ

1. Ntak emi adaidaha ufọkubọn̄ Ethiopia ọkọdọhọde ẹnịm imọ baptism-e?

2. Ntak emi afo ekpenen̄erede ekere aban̄a ndina baptism-e?

3. (a) Nso ewụhọ ke Jesus ọkọnọ mme anditiene enye? (b) Didie ke ẹnịm owo baptism ke mmọ̣n̄?

4. Edina baptism ke mmọn̄ owụt nso?

5. (a) Nso idi akpa usio-ukot ke ndidot ndina baptism? (b) Ntak emi mme mbono esop Christian ẹdide akpan n̄kpọ?

6. Nso udomo ifiọk Bible ke ana afo enyene mbemiso odotde ndina baptism?

7. Nso odudu ke edikpep Bible ekpenyene ke uwem fo?

8. Nso idinụk fi ndineme se afo ekpepde ye mbon en̄wen?

9, 10. (a) Afo ọkpọtọn̄ọ ndineme mme akpanikọ Bible ye mmanie? (b) Nso ke akpanam edieke oyomde nditiene mbuana ke utom ukwọrọikọ oro Mme Ntiense Jehovah ẹdiomide?

11. Mme ukpụhọde ewe ke ẹkeme ndiyom ndusụk owo ẹnam mbemiso ẹdotde ndibuana ke an̄wan̄wa utom ukwọrọikọ?

12. Ntak ẹyomde edikabade esịt-e?

13. Nso ke edinam ukpụhọde ọwọrọ?

14. Ewe akpan n̄kpọ ke ana anam mbemiso anade baptism?

15, 16. Ndiyak idem nnọ Abasi ọwọrọ nso, ndien nso isinụk owo ndinam emi?

17. Ntak emi ndusụk owo ẹsimen̄ede ndiyak idem nnọ Abasi-e?

18. Nso ikeme ndinụk fi ayak idem ọnọ Jehovah?

19. Ntak mûkpufeheke ndiyak idem nnọ Abasi-e?

20. Ntak ẹyomde ẹyarade uyakidem nnọ Jehovah?

21, 22. Didie ke ekeme ‘nditan̄a mbuọtidem fo an̄wan̄wa’?

23. Ndina baptism “ke enyịn̄ Ete ye Eyen ye edisana spirit” ọwọrọ nso?

24, 25. (a) Baptism ada aban̄a nso? (b) Ewe mbụme oyom ibọrọ?