Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

Nso ke Sheol ye Hades Ẹdi?

Nso ke Sheol ye Hades Ẹdi?

KE MME akpa usem emi ẹkedade ẹwet Bible, ikọ Hebrew oro sheʼohl′ ye ikọ Greek emi hai′des emi ẹwọrọde ukem n̄kpọ ẹdu awak ebe utịm ike-70. Ikọ mbiba emi ẹnyene n̄kpọ ndinam ye n̄kpa. Ẹkabade mme ikọ emi ke ndusụk Bible nte “udi,” “hell,” m̀mê “obube.” Nte ededi, ata ediwak usem inyeneke mme ikọ oro ẹwụtde nnennen nnennen se ikọ Hebrew ye ikọ Greek emi ẹwọrọde. Ntre mme ikọ emi “Sheol” ye “Hades” ke ẹda ke Edikabade eke Obufa Ererimbot. Nso ke mme ikọ emi ẹwọrọ? Ẹyak nnyịn ise nte ẹdade mmọ ẹtịn̄ ikọ ke nsio nsio itie ke Bible.

Ecclesiastes 9:10 ọdọhọ ete: ‘Baba edinam, baba uduak, baba ifiọk, baba mbufiọk idụhe ke Sheol emi afo akade do.’ Ndi emi ọwọrọ ke Sheol ada aban̄a itie udi oro nnyịn ikobụkde owo ima nnyịn? Baba. Ke ini Bible etịn̄de aban̄a itie ubụkowo, m̀mê udi, enye isikotke mmọ sheʼohl′ ye hai′des, utu ke oro enye esida mme ikọ Hebrew ye Greek efen etịn̄ aban̄a mmọ. (Genesis 23:7-9; Matthew 28:1) N̄ko, Bible idaha ikọ oro “Sheol” itịn̄ iban̄a udi oro ẹbụkde ediwak owo ọtọkiet, utọ nte udi oro ubon ẹnyenede ndida mbụk mbonubon mmọ m̀mê udi oro ẹbụkde ediwak mbon efen ọtọkiet.—Genesis 49:30, 31.

“Sheol” edi nso orụk ebiet, ndien? Ikọ Abasi owụt ke “Sheol,” m̀mê “Hades,” ada aban̄a se ikande idem akamba itie oro ẹbụkde ediwak owo. Ke uwụtn̄kpọ, Isaiah 5:14 owụt nte Sheol “okponde udọn̄ aka iso, onyụn̄ an̄wan̄ade inua esie akaha.” Okposụkedi Sheol ama ekememen anana-ibat mme akpan̄kpa, kpukpru ini enye esiyom mme akpan̄kpa efen efen. (Mme N̄ke 30:15, 16) Enye okpụhọde ye itie ubụkowo ekededi emi enyenede adan̄a ke ibat owo oro ẹkemede ndibụk do, koro ‘Sheol isiyụhọke.’ (Mme N̄ke 27:20, NW) Oro edi ndidọhọ ke akananam Sheol iyọhọke. Enye n̄ko inyeneke adan̄a. Ke ntre, Sheol, m̀mê Hades, idịghe ata ata itie emi odude ke akpan ebiet kiet. Utu ke oro, enye edi itie ekededi oro mbon emi ẹkpade ẹsibụhọde, kpa ndamban̄a itie oro ata ediwak mme akpan̄kpa ẹdude.

Se Bible ekpepde aban̄a ediset ke n̄kpa an̄wam nnyịn ndifiọk n̄kpọ efen efen mban̄a se “Sheol” ye “Hades” ẹwọrọde. Ikọ Abasi ọdọhọ ke mme akpan̄kpa oro ẹdude ke Sheol ye Hades ẹyeset.* (Job 14:13; Utom 2:31; Ediyarade 20:13) Ikọ Abasi owụt n̄ko ke idịghe mbon oro ẹnamde n̄kpọ Jehovah kpọt ẹdu ke Sheol, m̀mê Hades, edi ediwak mbon oro mîkanamke n̄kpọ esie ẹdu do n̄ko. (Genesis 37:35; Psalm 55:15) Mmọdo Bible ekpep ete ke “ndinen owo ye mme anam ukwan̄n̄kpọ ẹyeset ke n̄kpa.”—Utom 24:15.


*  Ke edide isio, ẹdọhọ ke mme akpan̄kpa oro owo mîdinamke ẹset idụhe ke Sheol, m̀mê Hades, edi ẹdu “ke Gehenna.” (Matthew 5:30; 10:28; 23:33) Gehenna idịghe ata ata ebiet kpa nte Sheol ye Hades mîdịghe.

← Se ibuot n̄wed oro etịn̄de aban̄a