Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

IBUOT EFỊTENAN̄

Nịm Idem ke Ima Abasi

Nịm Idem ke Ima Abasi

Nso ke ndima Abasi ọwọrọ?

Didie ke nnyịn ikeme ndinịm idem ke ima Abasi?

Didie ke Jehovah esidiọn̄ mbon oro ẹnịmde idem ke ima esie?

KERE nte asan̄ade ke usụn̄ ke usen oyobio. Enyọn̄ enen̄ede ekịm. Emịnen̄mịnen̄ ọtọn̄ọ ndisiaha, obuma otop, ekem ata akamba edịm ọtọn̄ọ ndidep. Afo efehe ke mbrenyịn oyom ebiet ndidak ibuot. Do, ke mbenusụn̄ oro afo okụt ufọk. Enye ọsọn̄ idem, asat, onyụn̄ eye. Afo akpada ufọk oro ke ọsọn̄urua n̄kpọ didie ntem!

Eren oro edịbede man ọbọhọ oyobio

Ndi afo ayanam Jehovah edi ebiet ubọhọ fo ke ntịme ntịme ini emi?

2 Nnyịn idu uwem ke ini oro etiede ntịme ntịme. Mme idaha ererimbot ẹtetịm ẹdiọk. Edi ebiet ubọhọ odu, kpa itie oro nnyịn ikemede ndibọhọ unọmọ ke nsinsi. M̀mọ̀n̄ edi oro? Kere ban̄a se Bible ekpepde: “Nyọdọhọ Jehovah, nte, Ubọhọ mi, ye ọkpọsọn̄ ebiet mi; Abasi mi, nyọbuọt idem mi ye enye.”—Psalm 91:2.

3 Kam kere! Jehovah, Andibot ye Andikara ekondo, ekeme ndidi ebiet ubọhọ nnyịn. Enye ekeme ndikpeme nnyịn, koro enye okopde odudu akan owo m̀mê n̄kpọ ekededi emi ekemede ndinọ nnyịn unan. Idem ọkpọkọm ẹnọnọ nnyịn unan, Jehovah ekeme ndikọk nnyịn. Didie ke ikeme ndinam Jehovah edi ebiet ubọhọ nnyịn? Oyom ibuọt idem nnyịn ye enye. Ke adianade do, Ikọ Abasi eteme nnyịn ete: “Ẹnịm idem mbufo ke ima Abasi.” (Jude 21) Ih, oyom inịm idem nnyịn ke ima Abasi, ikade iso inyene ima ima itie ebuana ye Ete nnyịn eke heaven. Do, imekeme nditịm nnịm ke enye edi ebiet ubọhọ nnyịn. Edi, didie ke ikeme ndinyene utọ itie ebuana oro?

FIỌK NYỤN̄ NAM N̄KPỌ BAN̄A IMA ABASI

4 Man inịm idem ke ima Abasi, oyom nnyịn ifiọk nte Jehovah owụtde ima oro enye amade nnyịn. Kere ban̄a ndusụk ukpepn̄kpọ Bible oro n̄wed emi an̄wamde fi ndifiọk. Nte Andibot, Jehovah ọmọnọ nnyịn isọn̄ emi nte inem inem ebietidụn̄. Enye anam akpakịp udia, mmọn̄, mme oto-obot inyene, ndiye unam, ye ndiye n̄kann̄kụk ọyọhọ isọn̄. Nte Andinyene Bible, Abasi ayarade enyịn̄ esie ye mme edu esie ọnọ nnyịn. Akan oro, Ikọ esie owụt ke enye ọkọdọn̄ edima Eyen esie edi isọn̄, ye nte ke enye ekenyịme Jesus okụt ndutụhọ onyụn̄ akpa ke ibuot nnyịn. (John 3:16) Ndien nso ke enọ oro ọwọrọ ọnọ nnyịn? Enye ọnọ nnyịn idotenyịn kaban̄a utịbe utịbe ini iso.

5 Idotenyịn nnyịn kaban̄a ini iso ọkọn̄ọ n̄ko ke n̄kpọ efen oro Jehovah anamde ọnọ nnyịn. Jehovah omowụk Obio Ubọn̄ heaven, kpa Obio Ubọn̄ Messiah. Enye ọyọsọp ndida utịt nsọk kpukpru orụk ndutụhọ, onyụn̄ anam isọn̄ akabade edi paradise. Kam kere! Nnyịn imekeme ndidu do ke emem ye inemesịt ke nsinsi. (Psalm 37:29) Kan̄a ke emi, Abasi ọnọ nnyịn ndausụn̄ ke nte ikemede ndinyene mfọnn̄kan usụn̄ uwem. Enye n̄ko ọnọ nnyịn ifet ndibọn̄ akam, kpa usụn̄ unyene nneme oro anade in̄wan̄. Emi edi sụk ibat ibat ke otu usụn̄ oro Jehovah amade ubonowo ke ofụri ofụri onyụn̄ amade fi ọkpọkpọ.

6 Akpan mbụme oro anade afo obụp idemfo edi: Didie ke ami ndinam n̄kpọ mban̄a ima Jehovah? Ediwak owo ẹyedọhọ ẹte, “Ana nnyụn̄ mma Jehovah n̄ko.” Nte afo etiene ọdọhọ ntre? Jesus ọkọdọhọ ke ibet emi okpon akan: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.” (Matthew 22:37) Ke akpanikọ, afo emenyene ediwak ntak ndima Jehovah Abasi. Edi, nte afo ndikekere ke imenyene utọ ima oro edi n̄kukụre se ibuanade ke ndima Jehovah Abasi ke ofụri esịt, ofụri ukpọn̄, ye ofụri ekikere?

N̄kpasịp apple

7 Nte ẹtịn̄de ke Bible, ndima Abasi okpon akan n̄kpọ oro ẹkerede-kere. Ke nditịm ntịn̄, okposụkedi anade ikere ke imama Jehovah, utọ ekikere oro akam edi ntọn̄ọ ata ima Abasi. Oyom ẹtọ n̄kpasịp apple man ẹnyene eto oro on̄wụmde apple. Nte ededi, edieke okpoyomde apple, nte okpokop uyụhọ edieke owo ọkpọnọde fi n̄kpasịp apple kpọt? Ke akpanikọ, ukpukopke! Ukem ntre, ndikekere ke imama Jehovah Abasi edi ntọn̄ọ kpọt. Bible ekpep ete: “Koro emi edi se ndima Abasi ọwọrọde, ete nnyịn inịm ibet esie; ndien ibet esie idobike owo mbiomo.” (1 John 5:3) Man edi ata ima, ana ima oro imade Abasi on̄wụm nti mfri. Ẹnyene ndinanam enye n̄wụt.—Matthew 7:16-20.

8 Nnyịn iwụt ke imama Abasi ke ini inịmde mme ibet esie inyụn̄ idade mme edumbet esie isịn ke edinam. Oro inen̄ekede isọn̄ utom. Utu ke ndidi mbiomo, Jehovah anam mme ibet esie man ẹn̄wam nnyịn ndidu eti uwem oro ọnọde uyụhọ ye inemesịt. (Isaiah 48:17, 18) Edieke idude uwem ke n̄kemuyo ye ndausụn̄ Jehovah, nnyịn iyowụt Ete nnyịn eke heaven ke imenen̄ede ima kpukpru se enye anamde ọnọ nnyịn. Ke mfụhọ, ata esisịt ibat owo ke ererimbot mfịn ẹsiwụt utọ esịtekọm oro. Nnyịn iyomke ndinana esịtekọm nte ndusụk mbon eyo Jesus. Owo akpamfia duop ke Jesus akanam ẹsana, edi kiet kpọt akafiak ọkọkọm enye. (Luke 17:12-17) Ke akpanikọ, nnyịn iyom nditie nte owo kiet oro okowụtde esịtekọm, utu ke nditie nte owo usụkkiet eken oro mîkowụtke esịtekọm!

9 Ndien ewe ibet Jehovah ke nnyịn inyene ndinịm? Imeneme ata ediwak ke otu mmọ ke n̄wed emi, edi ẹyak idụn̄ọde ndusụk mmọ. Ndinịm ibet Abasi ayan̄wam nnyịn inịm idem ke ima Abasi.

ẸNEN̄EDE ẸSAN̄A ẸKPERE JEHOVAH

10 Ndikpep n̄kpọ mban̄a Jehovah edi akpan usio-ukot ke ndinen̄ede nsan̄a n̄kpere enye. Enye edi edinam oro owo mîkpetreke. Edieke afo okpodude ke an̄wa ke okoneyo ke ini akarika ewebe ikan̄, ndi akpayak ikan̄ oro enịme? Baba-o. Afo akpaka iso ndidọn̄ ifia man ikan̄ oro aka iso asak. Emi ekeme ndinịm fi uwem! Ukem nte ifia esinamde ikan̄ aka iso asak, kpa ntre ke “ifiọk Abasi” anam ima oro imade Jehovah etetịm ọsọn̄.—Mme N̄ke 2:1-5.

Ukem nte ikan̄, oyom ọkọ ifiọk man ima oro amade Jehovah etetịm ọsọn̄

Eren oro ewebede ikan̄

11 Jesus okoyom mme anditiene imọ ẹka iso ẹnyene ufiop ufiop ima ẹnọ Jehovah ye ọsọn̄urua Ikọ akpanikọ Esie. Ke ama ekeset ke n̄kpa, Jesus ama ekpep owo iba ke otu mbet esie ndusụk ntịn̄nnịm ikọ ke N̄wed Abasi Usem Hebrew oro ẹkesude enye ke idem. Didie ke emi okotụk mmọ? Mmọ ẹma ẹtịn̄ ke ukperedem ẹte: “Nte esịt ikofiopke nnyịn ke ini enye ekenemede nneme ye nnyịn ke usụn̄, nte enye akatatde N̄wed Abasi ọnọ nnyịn ọyọhọ ọyọhọ?”—Luke 24:32.

12 Ke akpa ini oro afo ọkọfiọkde se Bible enen̄erede ekpep, ndi ama okụt ke esịt ama ọtọn̄ọ ndinem fi, ke ama esịn ifịk, onyụn̄ ama Abasi? Ke akpanikọ ama anam oro. Esitie ediwak owo ntre ke idem. Se idide akpan n̄kpọ idahaemi edi ndika iso nnam ima oro ofiop onyụn̄ ọkọri. Nnyịn iyomke nditiene ido eyo emi. Jesus ama ebem iso etịn̄ ete: “Ima ediwak owo ẹyebịt.” (Matthew 24:12) Nso ke ekeme ndinam man ima emi afo amade Jehovah ye Bible okûbịt?

13 Ka iso ndikpep n̄kpọ mban̄a Jehovah Abasi ye Jesus Christ. (John 17:3) Tie kere ban̄a se ekpepde ke Ikọ Abasi, obụpde idemfo ete: ‘Nso ke emi ekpep mi aban̄a Jehovah Abasi? Nso ntak efen ke se n̄kpepde emi ọnọ mi ndima Jehovah ke ofụri esịt, ekikere, ye ukpọn̄?’ (1 Timothy 4:15) Utọ editie n̄kere oro ayanam ima oro amade Jehovah etetịm ọsọn̄.

14 Usụn̄ efen oro ekemede ndinam ima oro enyenede ọnọ Jehovah aka iso ọsọn̄ edi ndibọn̄ akam kpukpru ini. (1 Thessalonica 5:17) Ke Ibuot 17 ke n̄wed emi, nnyịn ima ikpep ke akam edi ọsọn̄urua enọ emi otode Abasi. Kpa nte itie ebuana owo esikọride ke ini ẹnemede nneme ifụre ifụre kpukpru ini, kpa ntre ke itie ebuana nnyịn ye Jehovah edinyene ufiop ye inem ke ini ibọn̄de akam inọ enye kpukpru ini. Edi akpan n̄kpọ ete nnyịn ikûdede iyak akam nnyịn etie eto eto—edi ikpîkpu ikọ oro ẹtịn̄de ẹfiak ẹtịn̄ ediwak ini, emi mînyeneke odudu ndomokiet m̀mê se ọwọrọde. Oyom itịn̄ ikọ inọ Jehovah kpa nte eyen enemede nneme ye ima ima ete esie. Nte ededi, oyom itịn̄ ikọ ye ukpono, edi inam ntre ifụre ifụre, ke esịt akpanikọ, ye ke ofụri esịt. (Psalm 62:8) Ih, ọkpọkpọ ukpepn̄kpọ Bible ye akam ofụri esịt ẹdi akpan ikpehe utuakibuot nnyịn, ndien mmọ ẹn̄wam nnyịn ndinịm idem nnyịn ke ima Abasi.

KOP IDATESỊT KE UTUAKIBUOT FO

15 Ọkpọkpọ ukpepn̄kpọ Bible ye akam ẹdi mme usụn̄ oro nnyịn ikemede nditie ke idem nnyịn ntuak ibuot. Nte ededi, ẹyak nnyịn idahaemi ikere iban̄a ikpehe utuakibuot kiet oro isinamde an̄wan̄wa: edineme mme n̄kpọ oro nnyịn inịmde ke akpanikọ ye mbon en̄wen. Nte afo ama ọtọn̄ọ ndineme ndusụk akpanikọ Bible ye mbon en̄wen? Ke edide ntre, afo emenyene akwa ifet. (Luke 1:74) Ke ini itịn̄de mme akpanikọ oro ikpepde iban̄a Jehovah Abasi inọ mbon en̄wen, nnyịn inam ata akpan utom oro ẹnọde kpukpru ata mme Christian—kpa utom edikwọrọ eti mbụk Obio Ubọn̄ Abasi.—Matthew 24:14; 28:19, 20.

16 Apostle Paul ekese utom ukwọrọikọ esie nte ọsọn̄urua n̄kpọ, okotde enye n̄kpọuto. (2 Corinth 4:7) Ndineme mban̄a Jehovah Abasi ye mme uduak esie edi mfọnn̄kan utom oro afo ekemede ndinam. Enye edi utom oro ẹnamde ẹnọ mfọnn̄kan Eteufọk, ndien enye ọnọ nnyịn akakan ufọn. Ke ndibuana ke utom emi, afo an̄wam mbon oro ẹnyenede esịt akpanikọ ndisan̄a n̄kpere Ete nnyịn eke heaven, nnyụn̄ ndu ke usụn̄ oro adade esịm nsinsi uwem! Ewe utom ekeme ndinọ uyụhọ oro okponde akan emi? Ke adianade do, ndinọ ikọ ntiense mban̄a Jehovah ye Ikọ esie anam mbuọtidem fo ọkọri onyụn̄ ọsọn̄ọ ima emi amade enye. N̄ko, Jehovah enen̄ede ama ukeme emi afo esịnde. (Mme Hebrew 6:10) Ndika iso nnam utọ utom oro an̄wam fi ndinịm idem ke ima Abasi.—1 Corinth 15:58.

17 Edi akpan n̄kpọ nditi nte ke oyom isịn ifịk inam utom edikwọrọ Obio Ubọn̄. Bible ọdọhọ ete: “Kwọrọ ikọ, sịn ifịk nam emi.” (2 Timothy 4:2) Ntak oyomde inen̄ede isịn ifịk idahaemi-e? Ikọ Abasi asian nnyịn ete: “Akwa usen Jehovah emekpere, emekpere, oyonyụn̄ ọsọp eti-eti.” (Zephaniah 1:14) Ke akpanikọ, ini emi Jehovah edidade ofụri editịm n̄kpọ emi ikesịm utịt ke edi usọp usọp. Ana ẹdụri mme owo utọn̄! Oyom mmọ ẹfiọk ke ini edi emi ndimek Jehovah nte andikara mmimọ. Utịt oro ‘idibehe ini.’—Habakkuk 2:3.

18 Jehovah oyom nnyịn itiene ata mme Christian ituak ibuot inọ imọ. Oro anam Ikọ esie ọdọhọde ete: “Ẹyak nnyịn ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk owo edide, edi isịn udọn̄ inọ kiet eken, ẹnyụn̄ ẹdọdiọn̄ ẹnam ntre adan̄a nte mbufo ẹkụtde ẹte usen oro ke asan̄a ekpere.” (Mme Hebrew 10:24, 25) Ke ini nnyịn isopde idem ye ekemmọ mme andinịm ke akpanikọ ke mme mbono esop Christian, nnyịn imesinyene inem inem ifet nditoro nnyụn̄ ntuak ibuot nnọ edima Abasi nnyịn. Nnyịn n̄ko imesisịn udọn̄ inọ kiet eken, inyụn̄ inam kiet eken ọkọri.

19 Nte nnyịn isan̄ade ye mbon oro ẹkponode Jehovah, nnyịn iyọsọn̄ọ mbọbọ ima ye itie ufan ke esịt esop. Edi akpan n̄kpọ nnyịn ndidomo ndikụt nti edu ke idem mbon en̄wen ukem nte Jehovah esikụtde nti edu ke idem nnyịn. Kûyom mfọnmma uto ekemmọ mme andinịm ke akpanikọ. Ti ete ke kpukpru owo isinamke ukem n̄kọri ke n̄kan̄ eke spirit, n̄ko ke kpukpru nnyịn imesinam ndudue. (Colossae 3:13) Domo ndinam ufan ye mbon oro ẹnen̄erede ẹma Jehovah, ndien afo ọyọkọri ke n̄kan̄ eke spirit. Ke akpanikọ, ndidiana ye nditọ̣ete fo eke spirit n̄kpono Jehovah ayan̄wam fi ndinịm idem ke ima Abasi. Didie ke Jehovah esidiọn̄ mbon oro ẹsọn̄ọde ẹda ẹtuak ibuot ẹnọ enye ẹnyụn̄ ẹnịmde idem ke ima Abasi?

NDINYANADE MBỊNE “ATA UWEM”

20 Jehovah ọnọ ikọt esie oro ẹnamde akpanikọ uwem, edi nso utọ uwem? Ọfọn, idahaemi nte uwem enen̄ede enem fi? Ata ediwak nnyịn imekeme ndidọhọ “ih.” Kamse nnyịn ke in̄wek ofụm, ke idia n̄kpọ, ke inyụn̄ in̄wọn̄ n̄kpọ. Ke akpanikọ nnyịn ke idia uwem. Ndien ke ini inen̄erede ikop inemesịt, nnyịn imakam ikeme ndidọhọ, “Emi edi ata uwem!” Edi, ke nditịm ntịn̄, Bible owụt ke owo ndomokiet inyeneke ata uwem mfịn.

Ubon oro ẹdarade ke Paradise

Jehovah oyom fi enyene “ata uwem.” Ndi ayama ndinyene?

21 Ikọ Abasi eteme nnyịn ete ‘isọn̄ọ imụm ata uwem ikama.’ (1 Timothy 6:19) Ikọ oro owụt ke “ata uwem” edi n̄kpọ emi nnyịn idoride enyịn ndinyene ke ini iso. Ke akpanikọ, ke ini nnyịn ididide mfọnmma, nnyịn iyenen̄ede idu ata uwem, sia ididude uwem nte Abasi okoyomde ẹdu ke editọn̄ọ. Ke ini ididụn̄de ke paradise isọn̄ ye ọyọhọ nsọn̄idem, emem, ye inemesịt, nnyịn ke akpatre iyenyene “ata uwem,” oro edi nsinsi uwem. (1 Timothy 6:12) Ndi oro idịghe utịbe utịbe idotenyịn?

22 Didie ke nnyịn ikeme ‘ndisọn̄ọ mmụm ata uwem n̄kama’? Kpa ke udọn̄ikọ oro, Paul ama esịn udọn̄ ọnọ mme Christian ete “ẹfọn ido” ẹnyụn̄ “ẹyọhọ ye nti utom.” (1 Timothy 6:18) Nte an̄wan̄ade, ekese enen̄ede ọkọn̄ọ ke nte nnyịn idade akpanikọ oro ikpepde ke Bible isịn ke edinam. Edi, ndi ikọ Paul ọkọwọrọ ke nnyịn idot ndinyene “ata uwem” ebe ke ndinam nti utom? Baba-o, sia utịbe utịbe idotenyịn emi enen̄ede ọkọn̄ọ ke ndinyene “mfọnido Abasi oro owo mîdotke.” (Rome 5:15) Nte ededi, Jehovah ama ndinọ mbon oro ẹsọn̄ọde ẹda ye enye utịp. Enye oyom fi odu “ata uwem.” Utọ inem inem ye emem emem nsinsi uwem oro ke ana ebet mbon oro ẹnịmde idemmọ ke ima Abasi.

23 Ọyọfọn nnyịn owo kiet kiet ibụp idem nnyịn ite, ‘Ndi ami ke n̄kpono Abasi ke usụn̄ emi enye owụtde ke Bible?’ Edieke ibọrọ nnyịn ke usen ke usen edide ih, do nnyịn idu ke nnennen usụn̄. Nnyịn imekeme nditịm nnịm nte ke Jehovah edi ebiet ubọhọ nnyịn. Enye ayanyan̄a mme anam-akpanikọ ikọt esie ke mme ntịme ntịme akpatre usen eke idiọk editịm n̄kpọ emi. Jehovah ayanam nnyịn n̄ko ibọhọ idụk ubọn̄ ubọn̄ obufa editịm n̄kpọ emi ekperede idahaemi. Nso akwa inemesịt ke nnyịn idinyene ntem ndikụt utọ ini oro! Ndien nso inemesịt ke nnyịn idikop ntem ndifiọk nte ke ima inam eti ubiere ke mme akpatre usen emi! Edieke afo anamde utọ ubiere oro, afo eyenyene “ata uwem” ke nsinsi nsinsi, ukem nte Jehovah Abasi okoyomde!

SE BIBLE EKPEPDE


Mme Mbụme Ukpepn̄kpọ

1, 2. M̀mọ̀n̄ ke ikeme ndikụt ebiet ubọhọ mfịn?

3.Didie ke ikeme ndinam Jehovah edi ebiet ubọhọ nnyịn?

4, 5. Nso idi ndusụk usụn̄ oro Jehovah owụtde ima oro enye amade nnyịn?

6. Didie ke akpanam n̄kpọ aban̄a ima oro Jehovah amade fi?

7. Ndi ndima Abasi edi sụk n̄kpọ oro ekerede-kere? Nam an̄wan̄a.

8, 9. Didie ke ikpowụt ima ye esịtekọm oro inyenede inọ Abasi?

10. Nam an̄wan̄a ntak emi edide akpan n̄kpọ ndika iso n̄kpep n̄kpọ mban̄a Jehovah Abasi.

11. Didie ke ukpepn̄kpọ Jesus okotụk mme anditiene enye?

12, 13. (a) Ke otu ediwak mbon oro ẹdude mfịn, nso itịbe inọ ima oro ẹnyenede ẹnọ Abasi ye Bible? (b) Nso ke ikpanam man ima nnyịn okûbịt?

14. Didie ke akam ekeme ndin̄wam nnyịn ika iso ndima Jehovah?

15, 16. Ntak oro nnyịn ikpenen̄erede ise utom edikwọrọ Obio Ubọn̄ nte ọsọn̄urua n̄kpọ ye n̄kpọuto?

17. Ntak oyomde isịn ifịk inam utom ukwọrọikọ Christian idahaemi-e?

18. Ntak emi nnyịn ikpetienede ata mme Christian ituak ibuot inọ Jehovah?

19. Nso ke nnyịn ikeme ndinam man isọn̄ọ mbọbọ ima ke esịt esop Christian?

20, 21. Nso idi “ata uwem,” ndien ntak emi enye edide utịbe utịbe idotenyịn-e?

22. Didie ke afo ekeme ‘ndisọn̄ọ mmụm ata uwem n̄kama’?

23. Ntak edide akpan n̄kpọ ndinịm idem ke ima Abasi?

Kpep N̄kpọ En̄wen

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?