Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

Jesus Christ—Messiah Emi Ẹken̄wọn̄ọde

Jesus Christ—Messiah Emi Ẹken̄wọn̄ọde

MAN an̄wam nnyịn idiọn̄ọ enye emi Messiah edide, Jehovah Abasi ama ọnọ ediwak mme prọfet emi ẹkewetde Bible odudu spirit ndinọ ọyọhọ mbụk aban̄ade emana, utom, ye n̄kpa Andinyan̄a emi ẹken̄wọn̄ọde mi. Ofụri ntịn̄nnịm ikọ Bible emi ẹma ẹsu Jesus Christ ke idem. Mmọ ẹnen ẹnyụn̄ ẹdọn̄ọ ọyọhọ ntọt ke usụn̄ emi akpade owo idem. Ke ndinam emi an̄wan̄a, yak ineme ntịn̄nnịm ikọ ifan̄ oro ẹban̄ade mme n̄kpọ oro ẹditịbede ke ini emana ye ini uyen Messiah.

Prọfet Isaiah ama ebem iso etịn̄ ete ke Messiah edito ke ubon Edidem David. (Isaiah 9:7) Jesus okonyụn̄ amana odụk ubon David.—Matthew 1:1, 6-17.

Micah, owo efen emi ekedide prọfet Abasi, ama ebem iso etịn̄ ete ke nte ini akade eyen emi ayakabade edi edidem ye nte ke enye edimana ke “Beth-lehem Ephrathah.” (Micah 5:2) Ke ini emi Jesus akamanade, obio iba ẹkedu ke Israel emi ẹkekerede Bethlehem. Kiet okodu ekpere Nazareth ke edere edere ikpehe idụt oro, ndien enye eken ekekpere Jerusalem ke Judah. Ẹkesikot Bethlehem emi ekperede Jerusalem, Ephrathah. Jesus akamana ke obio oro, kpa nte ẹkebemde iso ẹtịn̄!—Matthew 2:1.

Ntịn̄nnịm ikọ efen ke Bible ama owụt ke ẹyekot Eyen Abasi “oto ke Egypt edi.” Ẹma ẹmen Jesus ke ini edide nsek ẹka Egypt. Ẹkemen enye ẹkpọn̄ do ke Herod ama akakpa, ntem anamde ntịn̄nnịm ikọ oro osu.—Hosea 11:1; Matthew 2:15.

Ke chart oro [“Mme Ntịn̄nnịm Ikọ Emi Ẹban̄ade Messiah”], mme itie N̄wed Abasi emi ẹdude ke idak ibuotikọ oro “Ntịn̄nnịm Ikọ” ẹneme ọyọhọ mbụk ẹban̄ade Messiah. Mbọk men emi domo ye mme itie N̄wed Abasi emi ẹdude ke idak ibuotikọ oro “Edisu.” Ndinam ntre eyetịm ọsọn̄ọ mbuọtidem emi afo enyenede nte ke Ikọ Abasi edi akpanikọ.

Ke adan̄aemi afo odụn̄ọrede mme itie N̄wed Abasi emi, ti ete ẹkewet mme ntịn̄nnịm ikọ emi ke ediwak isua ikie mbemiso Jesus akamanade. Jesus ọkọdọhọ ete: “Ana kpukpru se ẹkewetde ẹban̄a mi ke ibet Moses ye mme Prọfet ye mme Psalm ẹsu.” (Luke 24:44) Nte afo ekemede ndikụt ke Bible fo, mmọ ke akpanikọ ẹma ẹsu ọyọhọ ọyọhọ!

MME NTỊN̄NNỊM IKỌ EMI ẸBAN̄ADE MESSIAH
N̄KPỌNTỊBE NTỊN̄NNỊM IKỌ EDISU
Amana odụk esien Judah Genesis 49:10 Luke 3:23-33
N̄wan eke mîfiọkke erenowo aman enye Isaiah 7:14 Matthew 1:18-25
Ọwọrọ oto ubon Edidem David Isaiah 9:7 Matthew 1:1, 6-17
Jehovah ọdọhọ ke enye edi Eyen imọ Psalm 2:7 Matthew 3:17
Owo ikenịmke enye ke akpanikọ Isaiah 53:1 John 12:37, 38
Awat ke ass odụk Jerusalem Zechariah 9:9 Matthew 21:1-9
N̄kpet n̄kpet nsan̄a ada enye ọnọ Psalm 41:9 John 13:18, 21-30
Ẹda ẹnọ ke mbak silver 30 Zechariah 11:12 Matthew 26:14-16
Isioroke uyo ke iso mme andidori enye ikọ Isaiah 53:7 Matthew 27:11-14
Ẹsịn afia ẹban̄a ekụra esie Psalm 22:18 Matthew 27:35
Ẹsụn̄i ke adan̄aemi ọkọn̄ọde ke eto Psalm 22:7, 8 Matthew 27:39-43
Owo ibụn̄ke baba ọkpọ esie kiet Psalm 34:20 John 19:3336
Ẹbụk ye mbon inyene Isaiah 53:9 Matthew 27:57-60
Ẹnam eset mbemiso abiarade Psalm 16:10 Utom 2:2427
Ẹmenede ẹkenịm ke ubọk nnasia Abasi Psalm 110:1 Utom 7:56

← Se ibuot n̄wed oro etịn̄de aban̄a