Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

Enyịn̄ Abasi—Nte Ẹkotde Enye ye Se Enye Ọwọrọde

Enyịn̄ Abasi—Nte Ẹkotde Enye ye Se Enye Ọwọrọde

ẸKABADE Psalm 83:18 didie ke Bible fo? Edisana Ŋwed Abasi Ibom akabade ufan̄ikọ emi ntem: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.” Ediwak edikabade Bible efen ẹsịn itien̄wed emi ke ukem usụn̄ oro. Nte ededi, ediwak edikabade idaha enyịn̄ oro Jehovah, utu ke oro mmọ ẹda mme utọ udorienyịn̄ nte “Ọbọn̄” m̀mê “Nsinsi-Nsinsi.” Nso ke ẹkpeda ke ufan̄ikọ emi? Ndi ẹkpeda udorienyịn̄ m̀mê enyịn̄ oro Jehovah?

Enyịn̄ Abasi ke usem Hebrew

Enyịn̄ Abasi ke abisi usem Hebrew

Ufan̄ikọ emi etịn̄ aban̄a enyịn̄. Ndien san̄asan̄a enyịn̄ odu mi ke akpa usem Hebrew emi ẹkedade ẹwet ekese n̄wed Bible. Ẹwet enye ntem יהוה (YHWH) ke abisi usem Hebrew. Ke ikọ Efịk, usụn̄ oro ẹmehede ndiwet enyịn̄ oro edi “Jehovah.” Ndi enyịn̄ oro odu ke ufan̄ikọ Bible kiet kpọt? Baba. Enye odu ke akpa uwetn̄kpọ N̄wed Abasi Usem Hebrew ekpere ndisịm utịm ike-7,000!

Enyịn̄ Abasi edi akpan n̄kpọ adan̄a didie? Kere ban̄a akam uwụtn̄kpọ oro Jesus Christ ọkọbọn̄de. Enye ọtọn̄ọ ntem: “Ete nnyịn emi odude ke heaven, yak ẹnam enyịn̄ fo asana.” (Matthew 6:9) Ke ukperedem, Jesus ama ọbọn̄ akam ọnọ Abasi ete: “Ete, nọ enyịn̄ fo ubọn̄.” Ke ibọrọ, Abasi ama etie ke heaven ọdọhọ ete: “Mma nnọ enye ubọn̄, nyonyụn̄ ntọn̄ọ ntak nnọ enye ubọn̄.” (John 12:28) Nte an̄wan̄ade, enyịn̄ Abasi edi ata akpan enyịn̄. Do, ntak emi ndusụk mme akabade n̄wed ẹsiode enyịn̄ emi ẹfep ke Bible oro mmọ ẹkabarede ẹnyụn̄ ẹdade mme udorienyịn̄ ẹsịn ke itie esie?

Etie nte akpan ntak iba ẹdu. Akpa, ediwak owo ẹdọhọ ke owo ikpokotke enyịn̄ oro sia owo mîdiọn̄ọke idahaemi nte ẹkesikotde enyịn̄ oro ke akpa. Ẹkesida mme anana-uyo abisi ẹwet usem Hebrew eset. Ke ntre, idụhe owo ndomokiet mfịn emi ọkpọdọhọde ke imenen̄ede idiọn̄ọ nte mme owo ke mme ini Bible ẹkesikotde YHWH. Nte ededi, nte emi ọkpọbiọn̄ọ nnyịn ndikot enyịn̄ Abasi? Ke eyo Bible, ekeme ndidi ẹkesikot enyịn̄ oro Jesus nte Yeshua m̀mê Yehoshua—edi owo ndomokiet itịmke idiọn̄ọ. Kpa ye oro, mme owo ke ofụri ererimbot mfịn ẹkot enyịn̄ oro Jesus ke nsio nsio usụn̄, ẹkotde enye ke usụn̄ oro mmọ ẹmehede ke usem mmọ. Mmọ imen̄eke ndikot enyịn̄ oro n̄kukụre koro mmọ mîdiọn̄ọke nte ẹkesikotde enye ke akpa isua ikie. Ukem ntre, edieke afo akade esenidụt, afo emekeme ndikop ke ẹkot enyịn̄ fo ke ata isio isio usụn̄ ke usem efen. Ntem, owo nditre ndidiọn̄ọ nte ẹkesikotde enyịn̄ Abasi ke eset idịghe ntak nditre ndikot enyịn̄ oro.

Ọyọhọ ntak iba oro ẹsiwakde ndinọ, emi anamde ẹsio enyịn̄ Abasi ẹfep ke Bible enyene ebuana ye ido eset oro mme Jew ẹkenyenede ke anyan ini. Ediwak mmọ ẹnịm ke akpanikọ ẹte ke owo ikpedehe-dei ikot enyịn̄ Abasi. Etie nte edinịm ke akpanikọ emi ọtọn̄ọ oto ukwan̄ usụn̄ oro ibet Bible emi etienede mi an̄wan̄ade ndusụk owo: “Kûmen enyịn̄ Jehovah Abasi fo utomo ke se mîdịghe akpanikọ: koro Jehovah mîdiyakke otomo enyịn̄ esie ke se mîdịghe akpanikọ, ọbọhọ.”—Exodus 20:7.

Ibet emi ama akpan ndikot enyịn̄ Abasi ke idiọk usụn̄. Edi nte enye akpan edikot enyịn̄ Abasi ukpono ukpono? Baba. Kpukpru mbon oro ẹkewetde Bible usem Hebrew (“Akani Testament”) ẹkedi irenowo oro ẹnamde akpanikọ ẹnyụn̄ ẹdade Ibet oro Abasi ọkọnọde nditọ Israel eset ẹdu uwem. Edi, mmọ ẹma ẹsikot enyịn̄ Abasi kpukpru ini. Ke uwụtn̄kpọ, mmọ ẹma ẹsịn enyịn̄ oro ke ediwak psalm oro otu mme andituak ibuot ẹkesikwọde ke ọkpọsọn̄ uyo. Jehovah Abasi ama akam eteme mme andituak ibuot nnọ enye ete ẹseme ẹkot enyịn̄ imọ, ndien mbon oro ẹkenamde akpanikọ ẹma ẹnam item oro. (Joel 2:32; Utom 2:21) Ntem, mme Christian mfịn imen̄eke ndikot enyịn̄ Abasi ukpono ukpono, nte Jesus akanamde.—John 17:26.

Mme akabade Bible ẹnam akwa ndudue ke nditan̄ mme udorienyịn̄ ndọn̄ ke itie enyịn̄ Abasi. Mmọ ẹnam mme owo ẹkere ke Abasi etie nsannsan ye esen esen, ke adan̄aemi Bible esịnde udọn̄ ọnọ mme owo ‘nditie ufan ye Jehovah.’ (Psalm 25:14) Kere ban̄a ata n̄kpet n̄kpet ufan fo. Afo ekpenen̄ede ekpere enye didie edieke akananam afo mûdiọn̄ọke enyịn̄ esie? Ukem ntre, edieke ẹdịpde mme owo enyịn̄ Abasi, Jehovah, mmọ ẹdinam didie ẹsan̄a ẹkpere Abasi? N̄ko-n̄ko, ke ini mme owo mîkotke enyịn̄ Abasi, mmọ n̄ko ifiọkke se utịbe enyịn̄ oro ọwọrọde. Nso ke enyịn̄ Abasi ọwọrọ?

Abasi ke idemesie ama anam se enyịn̄ esie ọwọrọde an̄wan̄a Moses anam-akpanikọ asan̄autom esie. Ke ini Moses okobụpde m̀mê Abasi ekere didie, Jehovah ọkọbọrọ ete: “Ami nyakabade ndi se ndikabarede ndi.” (Exodus 3:14, NW) Edikabade eke Rotherham ọdọhọ: “Nyakabade Ndi se ededi oro mmade.” Ntre Jehovah ekeme ndikabade ndi se ededi oro enye oyomde man enye anam mme uduak esie.

Nso ke afo akpanam edieke afo ekpekemede ndikabade ndi se ededi oro afo oyomde ndikabade ndi? Nso ke akpanam ọnọ mme ufan fo? Edieke kiet ke otu mmọ ọkpọduọde akamba udọn̄ọ, afo akpakabade edi ata ọnọ-usọbọ onyụn̄ ọnọ enye usọbọ. Edieke ufan fo efen okposobode ntakurua, afo akpakabade edi owo inyene emi ọfọnde ido onyụn̄ afak enye osio ke nnama esie. Nte ededi, akpanikọ edi nte ke afo ukemeke ndikabade ndi ediwak n̄kpọ oro okpoyomde ndikabade ndi. Ntre ke edi ye kpukpru nnyịn. Nte afo ekpepde Bible, idem ayakpa fi ndikụt nte Jehovah akabarede edi se ededi oro enye oyomde man anam mme uduak esie. Ndien enye esikop inemesịt ndida odudu esie nnam n̄kpọ ke ufọn mbon oro ẹmade enye. (2 Chronicles 16:9) Mbon oro mîfiọkke enyịn̄ esie idiọn̄ọke ediye ikpehe edu Jehovah emi.

An̄wan̄a, ndien, nte ke akpana enyịn̄ oro Jehovah odu ke Bible. Ndifiọk se enyịn̄ oro ọwọrọde nnyụn̄ nda enye ifụre ifụre ke utuakibuot nnyịn eyenen̄ede an̄wam nnyịn ndisan̄a n̄kpere Jehovah, kpa Ete nnyịn eke heaven.*


*  Ke oyomde ntọt efen efen aban̄a enyịn̄ Abasi, se enyịn̄ oro ọwọrọde, ye mme ntak oro anade ẹda enyịn̄ oro ke utuakibuot, se ediye uduot ekpri n̄wed oro Enyịn̄ Abasi Oro Edibịghide ke Nsinsi, emi Mme Ntiense Jehovah ẹsiode.

← Se ibuot n̄wed oro etịn̄de aban̄a

Kpep N̄kpọ En̄wen

Abasi Ekere Didie?

Bible ọdọhọ ke Abasi edi Ata Ọkpọsọn̄ m̀mê Abasi Ibom, Andibot, ye Ọbọn̄. Edi ata enyịn̄ esie odu ke Bible ebe utịm ike-7,000.