Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

Akpanikọ Aban̄ade Ete, Eyen, ye Edisana Spirit

Akpanikọ Aban̄ade Ete, Eyen, ye Edisana Spirit

MBON emi ẹnịmde ukpepn̄kpọ Abasi-Ita-ke-Kiet ẹdọhọ ke owo ita—Ete, Eyen, ye Edisana Spirit—ẹdi Abasi. Ẹdọhọ ke owo mbita emi ẹdi n̄ka, ẹnyene ata ọkpọsọn̄ odudu, inyụn̄ inyeneke ntọn̄ọ. Ntre, nte ukpepn̄kpọ Abasi-Ita-ke-Kiet owụtde, Ete edi Abasi, Eyen edi Abasi, Edisana Spirit onyụn̄ edi Abasi, kpa ye oro Abasi kiet kpọt odu.

Ediwak owo emi ẹnịmde Abasi-Ita-ke-Kiet ke akpanikọ ẹnyịme ke mmimọ ikemeke ndinam ukpepn̄kpọ emi an̄wan̄a. Kpa ye oro, mmọ ẹkeme ndikere ke ukpepn̄kpọ emi odu ke Bible. Odot ẹtịm ẹfiọk nte ke ikọ oro “Abasi-Ita-ke-Kiet” akananam idụhe ke Bible. Edi nte ekikere aban̄ade Abasi-Ita-ke-Kiet odu do? Man ibọrọ mbụme emi, ẹyak nnyịn ise itie N̄wed Abasi kiet emi mme andikpep ukpepn̄kpọ emi ẹsiwakde ndida nsọn̄ọ Abasi-Ita-ke-Kiet.

“IKỌ EKEDI ABASI”

John 1:1 ọdọhọ ete: “Ikọ okodu ke editọn̄ọ, Ikọ okonyụn̄ odu ye Abasi, Ikọ onyụn̄ edi Abasi.” (Edisana Ŋwed Abasi Ibom) Kpa ke ibuot n̄wed emi, apostle John owụt in̄wan̄-in̄wan̄ nte ke “Ikọ” edi Jesus. (John 1:14) Nte ededi, sia ẹdọhọde ke Ikọ edi Abasi, ndusụk owo ẹbiere ẹte ke anaedi Eyen ye Ete ẹdi ubak Abasi kiet.

Ti ete ke ẹkebem iso ẹwet ikpehe Bible emi ke usem Greek. Ekem, mme akabade n̄wed ẹma ẹkabade uwetn̄kpọ usem Greek emi ẹsịn ke mme usem en̄wen. Nte ededi, ediwak mme akabade Bible ikakabakede ubak udịmikọ oro nte “Ikọ ekedi Abasi.” Ntak mîkakabakede enye ntre? Ọkọn̄ọde ke ifiọk emi mmọ ẹkenyenede ẹban̄a usem Greek emi ẹkedade ẹwet Bible, mme akabade n̄wed oro ẹkebiere ẹte ke ẹkpenyene ndikabade ubak udịmikọ oro “Ikọ ekedi Abasi” ke isio isio usụn̄. Ẹkekabade didie? Se uwụtn̄kpọ ifan̄ mi: “Logos [Ikọ] ekebiet abasi.” (A New Translation of the Bible) “Ikọ ekedi abasi.” (The New Testament in an Improved Version) “Ikọ okodu ye Abasi onyụn̄ etie nte enye.” (The Translator’s New Testament) Nte mme edikabade emi ẹwụtde, Ikọ idịghe Abasi ke idemesie.* Utu ke oro, ke ntak akwa idaha esie ke otu mme edibotn̄kpọ Jehovah, ẹtịn̄ ẹban̄a Ikọ nte “abasi.” Mi ikọ oro “abasi” ọwọrọ “ọkpọsọn̄ owo.”

AKPANIKỌ EFEN EFEN

Ata ediwak owo ifiọkke usem Greek emi ẹkedade ẹwet Bible. Ntre afo akpasan̄a didie ọfiọk se ikọ apostle John ekenen̄erede ọwọrọ? Kere ban̄a uwụtn̄kpọ emi ise: Andikpep ekpep nditọ ufọkn̄wed esie n̄kpọ. Ke oro ebede, n̄kpọ oro an̄wan̄a nditọ ufọkn̄wed emi ke nsio nsio usụn̄. Nso ke nditọ ufọkn̄wed ẹkeme ndinam man ẹfiọk m̀mê ewe enen? Mmọ ẹkeme ndiben̄e andikpep ọnọ ntọt efen efen. Eyịghe idụhe nte ke ndibọ ifiọk efen efen ayan̄wam mmọ ẹtịm ẹfiọk se ẹkekpepde oro. Ukem ntre, man ọfiọk se John 1:1 ọwọrọde, afo emekeme ndikụbọde n̄ka Gospel John man okụt n̄kpọ efen emi ẹtịn̄de ẹban̄a idaha Jesus. Ndikpep n̄kpọ efen efen ke ibuot nneme emi ayan̄wam fi esịm nnennen ubiere.

Ke uwụtn̄kpọ, kere ban̄a se John akakade iso ewet ke ibuot 1, ufan̄ikọ 18: “Akananam baba owo kiet ikwe [Ata Ọkpọsọn̄] Abasi.” Nte ededi, mme owo ẹma ẹkụt Jesus, emi edide Eyen, koro John ọdọhọ ete: “Ikọ [Jesus] akabade edi obụkidem onyụn̄ odụn̄ ye nnyịn (nnyịn inyụn̄ ikụt ubọn̄ esie).” (John 1:14, Edisana Ŋwed Abasi Ibom) Didie, ndien, ke Eyen ekpedi ubak Ata Ọkpọsọn̄ Abasi? John ama ọdọhọ n̄ko ete ke Ikọ okodu “ye Abasi.” Edi didie ke owo okpodu ye owo ndien ke ukem ini oro edi owo emi enye odude kiet do? Akan oro, nte ẹwetde ke John 17:3, Jesus anam an̄wan̄a ke imọ ye Ete imọ eke heaven idi ata nsio nsio owo. Enye okot Ete esie “ata Abasi kierakiet.” Ndien ke ekperede utịt Gospel esie, John emen ikọ esịn ke ufọk ke ndidọhọ ete: “Ẹwet mmọ emi ẹnịm man mbufo ẹkpenịm ke akpanikọ ẹte Jesus edi Christ, Eyen Abasi.” (John 20:31) Tịm fiọk ete owo ikotke Jesus Abasi, edi ẹkot enye Eyen Abasi. Udiana ntọt emi ẹnọde mi ke Gospel John owụt nte John 1:1 akpan̄wan̄ade owo. Jesus, emi edide Ikọ, edi “abasi,” emi ọwọrọde nte ke enye enyene akwa idaha edi iwọrọke ke enye edi ukem ye Ata Ọkpọsọn̄ Abasi.

SỌN̄Ọ AKPANIKỌ EMI

Tọn̄ọ ntak kere ban̄a uwụtn̄kpọ andikpep oro ke ufọkn̄wed ye nditọ ufọkn̄wed. Yak idọhọ ke ndusụk nditọ ufọkn̄wed ẹsụk ẹnyenyene eyịghe, idem ke andikpep ama akafiak anam se enye ekekpepde an̄wan̄a. Nso ke mmọ ẹkpenam? Mmọ ẹkeme ndika mbịne andikpep en̄wen n̄kọdọhọ enye anam ukpepn̄kpọ oro an̄wan̄a mmimọ. Edieke ọyọhọ andikpep iba emi ọsọn̄ọde se akpa andikpep eketịn̄de, ekese nditọ ufọkn̄wed oro idinyeneke eyịghe aba. Ukem ntre, edieke se John andiwet Bible eketịn̄de aban̄a itie ebuana emi odude ke ufọt Jesus ye Ata Ọkpọsọn̄ Abasi mîtịmke in̄wan̄a fi, afo emekeme ndika mbịne owo efen emi ekewetde Bible n̄koyom ntọt efen efen. Ke uwụtn̄kpọ, kere ban̄a se Matthew ekewetde. Kaban̄a utịt editịm n̄kpọ emi, enye ewet ke Jesus ọkọdọhọ ete: “Kaban̄a usen ye hour oro baba owo kiet ifiọkke, mme angel ke heaven ifiọkke, Eyen inyụn̄ ifiọkke, ke mîbọhọke Ete ikpọn̄.” (Matthew 24:36) Didie ke mme ikọ emi ẹsọn̄ọ ke Jesus idịghe Ata Ọkpọsọn̄ Abasi?

Jesus ọdọhọ ete ke ifiọk Ete okpon akan eke Eyen. Nte ededi, edieke Jesus ekpedide ubak Ata Ọkpọsọn̄ Abasi, enye ọkpọfiọk se Ete esie ọfiọkde. Ntre, ndien, Eyen ye Ete ikemeke ndidi n̄ka. Edi, ndusụk owo ẹkeme ndidọhọ: ‘Jesus ekenyene uduot iba. Enye etịn̄ ikọ ke itie emi nte owo.’ Edi idem edieke oro ekpedide akpanikọ, nso kaban̄a edisana spirit? Edieke edisana spirit edide ukem Abasi nte Ete, ntak emi Jesus mîdọhọke ke edisana spirit ọfiọk se Ete ọfiọkde?

Nte afo akade iso ke ukpepn̄kpọ Bible fo, afo eyetịm emehe ye ediwak itie efen ke Bible emi ẹnemede n̄kpọ emi. Mmọ ẹsọn̄ọ akpanikọ aban̄ade Ete, Eyen, ye edisana spirit.—Psalm 90:2; Utom 7:55; Colossae 1:15.


*  Ke oyomde ndifiọk mme ibet usem Greek oro ẹnyenede n̄kpọ ndinam ye John 1:1, se page 26-29 ke ediye uduot ekpri n̄wed oro Nte Afo Ekpenyene Ndinịm Abasi-Ita-ke-Kiet ke Akpanikọ? emi Mme Ntiense Jehovah ẹsiode.

← Se ibuot n̄wed oro etịn̄de aban̄a

Kpep N̄kpọ En̄wen