Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Nso ke Bible Enen̄ede Ekpep?

SE ẸWETDE ẸDIAN

1914—Akpan Isua ke Ntịn̄nnịm Ikọ Bible

1914—Akpan Isua ke Ntịn̄nnịm Ikọ Bible

NDITỌ ukpepn̄kpọ Bible ẹma ẹbem iso ẹtan̄a ke ata ediwak isua nte ke mme akpan n̄kpọntịbe ẹyeda itie ke isua 1914. Nso n̄kpọ ikenyene nditịbe, ndien nso iwụt ke isua 1914 ekedi ata akpan isua?

Nte ẹwetde ke Luke 21:24, Jesus ọkọdọhọ ete: “Mme idụt ẹyedịghi Jerusalem ke ikpat, tutu edimek ini mme idụt [“ini mme Gentile,” Edisana Ŋwed Abasi Ibom] ọyọhọ.” Jerusalem ekedi ibuot obio ukara idụt mme Jew—kpa ifụm ukara emi ndidem ẹtode ubon Edidem David ẹketiede. (Psalm 48:1, 2) Nte ededi, ndidem emi ẹma ẹkpụhọde ye mme andikara idụt eken. Mmọ ẹketie ke “ebekpo Jehovah” nte mme andida ke ibuot Abasi. (1 Chronicles 29:23) Ntre Jerusalem akada aban̄a itie ukara Jehovah.

Nte ededi, ini ewe, ndien didie ke ‘mme idụt ẹketọn̄ọ ndidịghi’ itie ukara Abasi? Emi eketịbe ke isua 607 M.E.N. ke ini mbon Babylon ẹkekande Jerusalem. Owo iketiehe aba ke “ebekpo Jehovah,” ndien udịm ndidem emi ẹtode ke ubon David ama etre. (2 Ndidem 25:1-26) Nte ẹdika iso ‘ẹdịghi’ mmọ ke nsinsi? Baba, koro ntịn̄nnịm ikọ Ezekiel emi akaban̄ade Zedekiah, kpa akpatre edidem ke Jerusalem, ọkọdọhọ ete: “Ẹmesio mitre ẹfep, ẹnyụn̄ ẹyarade anyanya.…Idinyụn̄ idụhe, tutu enye emi [enyenede unen, NW] edi; ndien nyada nnọ enye.” (Ezekiel 21:26, 27) Owo emi enyenede “unen” ndiyara anyanya ubọn̄ ubon David edi Christ Jesus. (Luke 1:32, 33) Ntre ‘edidịghi’ oro ekenyene nditre ke ini Jesus akabarede edi Edidem.

Ini ewe ke akpan n̄kpọntịbe oro edida itie? Jesus ama owụt nte ke ẹnịm ini oro mme Gentile ẹdikarade ẹketre. Mbụk emi odude ke Daniel ibuot 4 an̄wam nnyịn ndibat ndiọn̄ọ nte ini oro ediniọn̄de eketre. Enye etịn̄ aban̄a ntịn̄nnịm ikọ emi enyenede n̄kpọ ndinam ye ndap oro Edidem Nebuchadnezzar eke Babylon akadabade. Enye ama okụt ata akamba eto emi ẹkekpide ẹduọk. Ibio etak eto emi ikekemeke ndikọri sia ẹkedade ubọpn̄kpọ ukwak ye okpoho ẹbọp enye. Angel kiet ọkọdọhọ ete: ‘Yak ini itiaba ẹnyụn̄ ẹbe enye.’—Daniel 4:10-16.

Ke Bible, ẹsida eto ndusụk ini ẹtịn̄ ikọ ẹban̄a itie edikara. (Ezekiel 17:22-24; 31:2-5) Ke ntre, edikpi ndamban̄a eto oro nduọk ada aban̄a nte ẹdisịbede itie edikara Abasi ẹfep, emi ndidem ẹketiede ke ibuot esie ẹkara ke Jerusalem. Nte ededi, n̄kukụt oro ama anam an̄wan̄a nte ke ‘ẹdidịghi Jerusalem’ ke ekpri ini—ke ufan̄ ‘ini itiaba.’ Ini emi ọniọn̄ adan̄a didie?

Ediyarade 12:6, 14 owụt ke ini ita ye ubak ẹdi “usen tọsịn kiet ikie iba ye ata.” Ntem, ‘ini itiaba’ edidi ini ita ye ubak nam awak ke itie iba, m̀mê usen 2,520. Edi mme Gentile iketreke ‘ndidịghi’ ukara Abasi ke usen 2,520 ama ekebe tọn̄ọ nte ẹkesobo Jerusalem. An̄wan̄a, ndien, nte ke ntịn̄nnịm ikọ oro ada ini oro ọkọniọn̄de akan oro. Nte ekemde ye Numbers 14:34 ye Ezekiel 4:6, emi ẹtịn̄de ẹban̄a “usen ke ibuot isua,” ‘ini itiaba’ oro edi isua 2,520.

Isua 2,520 oro ọkọtọn̄ọ ke October 607 M.E.N., ke ini mbon Babylon ẹkekande Jerusalem ẹnyụn̄ ẹdororede edidem emi okotode ubon David ẹfep ke ebekpo esie. Ini oro eketre ke October 1914. Ini oro ke “edimek ini mme idụt” eketre, ndien ini oro ke ẹkemenede Jesus Christ ẹdori ke ebekpo nte Edidem ke heaven.*Psalm 2:1-6; Daniel 7:13, 14.

Kpa nte Jesus ekebemde iso etịn̄, “edidu” esie nte Edidem eke heaven ọyọhọ ye ikpọ n̄kpọntịbe ererimbot—ekọn̄, akan̄, unyek-isọn̄, ye mme idiọk udọn̄ọ. (Matthew 24:3-8; Luke 21:11) Mme utọ n̄kpọntịbe oro ẹsọn̄ọ ẹwụt nte ke 1914 ekenen̄ede edi ini emi Obio Ubọn̄ Abasi eke heaven akamanade, ndien ke ini oro ekedi ntọn̄ọ “mme akpatre usen” eke idiọk editịm n̄kpọ emi.—2 Timothy 3:1-5.


*  Ọtọn̄ọde ke October 607 M.E.N. esịm October 1 M.E.N. edi isua 606. Sia owo mîkenyeneke 0 isua M.E.N., ọtọn̄ọde ke October 1 M.E.N. esịm October 1914 E.N. edi isua 1,914. Ke imende isua 606 ye isua 1,914 idian kiet, nnyịn inyene isua 2,520. Ke oyomde ntọt aban̄a iduọ Jerusalem ke isua 607 M.E.N., se ibuotikọ emi “Chronology” ke Insight on the Scriptures, emi Mme Ntiense Jehovah ẹsiode.

“INI ITIABA”
Isua 2,520
Isua 606 ye ọfiọn̄ ita
October 607 M.E.N. sịm
December 31, 1 M.E.N
Isua 1,913 ye ọfiọn̄ usụkkiet
January 1, 1 E.N. sịm
October 1914
607

“Mme idụt ẹyedịghe Jerusalem ke ikpat”

Ẹsobo Jerusalem
←M.E.N. E.N.→ 1914

“Enye emi enyenede unen edi”

Jesus Christ edi Edidem

← Se ibuot n̄wed oro etịn̄de aban̄a