Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 113: Paul ke Rome

Mbụk 113: Paul ke Rome

SESE mme n̄kpọkọbi ke ubọk Paul, n̄ko sese owo ekọn̄ Rome ekpemede enye. Paul edi owo n̄kpọkọbi ke Rome. Enye ke ebet tutu Caesar mbon Rome ebiere se edinamde ye enye. Ke enye edide owo n̄kpọkọbi, ẹyak mme owo ẹkese enye.

Usen ita ke Paul osịmde Rome, enye ọdọn̄ ẹkot ndusụk ọwọrọiso mme Jew edise enye. Oto do, ediwak mme Jew ke Rome ẹdi. Paul ọkwọrọ ọnọ mmọ aban̄a Jesus ye obio ubọn̄ Abasi. Ndusụk ẹnịm ke akpanikọ ẹkabade mme Christian, edi mmọ eken inịmke.

Paul ke n̄kpọkọbi

Paul n̄ko ọkwọrọ ikọ ọnọ nsio nsio mbon ekọn̄ oro ẹnamde utom ndikpeme enye. Ke isua iba oro ẹnịmde enye mi nte owo n̄kpọkọbi Paul ọkwọrọ ikọ ọnọ kpukpru owo enye ekemede. Oto do, idem ufọk Caesar ẹkop eti mbụk Obio ubọn̄, ndien ndusụk mmọ ẹkabade mme Christian.

Edi anie owo edi esenowo emi ke okpokoro ewetde n̄kpọ? Nte ekpekere owo enye edide? Ih, edi Timothy. Timothy n̄ko ama odu ke n̄kpọkọbi ke ndikwọrọ mban̄a Obio ubọn̄, edi enye afiak enyene ifụre. Ndien enye edi mi ndin̄wam Paul. Nte ọmọfiọk se Timothy ewetde? Yak ise.

Nte emeti mme obio Phi·lip′pi ye Eph′e·sus ke Mbụk 110? Paul akan̄wam ẹtọn̄ọ mme esop Christian ke mme obio oro. Idahaemi, ke enye odude ke n̄kpọkọbi, Paul ẹwet mme n̄wed ọnọ mme Christian emi. Mme n̄wed oro ẹdu ke Bible, ndien ẹkot mmọ N̄wed Mbon Eph′e·sụs ye N̄wed Mbon Phi·lip′pi. Paul ke asian Timothy ke emi se ekpewetde ọnọ mme Christian ufan mmọ ke Phi·lip′pi.

Mbon Phi·lip′pi ẹfọn ido ẹkaha ye Paul. Mmọ ẹma ẹnọ enọ ẹsọk enye mi ke n̄kpọkọbi, ntre, Paul ke ọkọm mmọ aban̄a oro. E·paph·ro·di′tus edi owo akadade enọ oro edi. Edi enye ama ọdọn̄ọ etieti ekpere ndikpa. Ke emi idem ọsọn̄ enye ndien enye eben̄e idem ndinyọn̄. Enye eyemen leta emi otode Paul ye Timothy ke ini enye afiakde ọnyọn̄ Phi·lip′pi.

Ke adan̄emi odude ke n̄kpọkọbi, Paul ewet mme leta efen nnyịn inyenede ke Bible. Kiet edi eke mme Christian ke obio Co·los′sae. Nte ọmọfiọk se ẹkotde enye? N̄wed Mbon Co·los′sae. Eken edi leta idem owo ẹnọde eti ufan ẹkotde Phi·le′mon, emi n̄ko odụn̄de ke Co·los′sae. N̄wed oro aban̄a isụn̄utom Phi·le′mon, O·nes′i·mus.

O·nes′i·mus ama efehe ọkpọn̄ Phi·le′mon edi Rome. Ke ndusụk usụn̄, O·nes′i·mus ama ọfiọk aban̄a Paul ndidu ke n̄kpọkọbi mi. Enye ama edi ndise, ndien Paul ama ọkwọrọ ikọ ọnọ O·nes′i·mus. Iwiwa, O·nes′i·mus n̄ko akabade Christian. Ke emi, O·nes′i·mus okop mbọm nte ekefehede. Ntre, nte ọmọfiọk se Paul ewetde ke leta emi ọnọ Phi·le′mon?

Paul ọdọhọ Phi·le′mon efen O·nes′i·mus. Paul ewet, ‘Ami ke mfiak nnọ enye etiene fi,’ ‘Edi ke emi, enye idịghe sụk ofụn fo kpọt. Enye edi n̄ko eti eyenete Christian.’ Ke O·nes′i·mus afiakde aka Co·los′sae, enye emen mme leta iba ẹmi, kiet adade ọsọk mbon Co·los′sae ndien eken, Phi·le′mon. Nnyịn imekeme ndikere nte esịt enemde Phi·le′mon ke enye ọfiọkde ete ofụn esie akabade Christian.

Ke Paul ewetde n̄wed ọnọ mbon Phi·lip′pi ye Phi·le′mon, enye n̄ko enyene ata nti mbụk. Paul ọdọhọ mbon Phi·lip′pi ete, ‘Ami ke ndọn̄ Timothy ke ọtọ mbufo. Edi ami n̄ko nyedise mbufo, ibịghike.’ Ndien enye ewet ọnọ Phi·le′mon: ‘Tịm itie nọ mi ndidu do.’

Ke ẹsanade Paul ẹyak, enye ekese nditọ ete Christian esie iren ye iban ke ediwak ebiet. Edi ekem, ẹfiak emụm Paul nte owo n̄kpọkọbi ke Rome. Isan̄ emi, enye ọfiọk ete ẹmọn̄ ẹwot imo. Ntre enye ewet ọnọ Timothy onyụn̄ ọdọhọ enye ọsọp edi. Paul ọdọhọ, ‘Mma nnam akpanikọ nnọ Abasi, ndien Abasi eyenọ mi utịp.’ Isua ifan̄ ke ẹma ẹkewot Paul, ẹfiak ẹsobo Jerusalem, isan̄ emi ke ubọk mbon Rome.

Edi ekese efen ẹdu ke Bible. Jehovah Abasi anam apostle John ewet mme akpatre n̄wed esie, ẹsịnede n̄wed Eriyarare. N̄wed Bible emi etịn̄ aban̄a ini iso. Yak ikpep ke emi se ini iso akamade.

Utom Mme Apostle 28:16-31; N̄wed Mbon Philippi 1:13; 2:19-30; 4:18-23; Mme Hebrew 13:23; Philemon 1-25; N̄wed Mbon Colossae 4:7-9; 2 N̄wed Timothy 4:7-9.



Mme Mbụme

  • Mmanie ke Paul ọkwọrọ ikọ ọnọ ke ini ẹkọbide enye ke Rome?
  • Ke ndise emi, anie edi esenowo emi ke okpokoro, ndien nso ke enye anam ọnọ Paul?
  • Anie edi Epaphroditus, ndien nso ke enye ada ọnyọn̄ Philippi?
  • Ntak emi Paul ewetde leta ọnọ Philemon, eti ufan esie?
  • Nso ke Paul anam ke ini ẹsanade enye ẹyak, ndien nso itịbe inọ enye nte ini akade?
  • Anie ke Jehovah ada ewet mme akpatre n̄wed Bible, ndien nso ke n̄wed Ediyarade etịn̄ aban̄a?

Mme mbụme efen