Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 110: Timothy—Obufa Andin̄wam Paul

Mbụk 110: Timothy—Obufa Andin̄wam Paul

AKPARAWA oro afo okụtde mi ye apostle Paul edi Timothy. Timothy odụn̄ ye ubon esie ke Lys′tra. Eka esie ekere Eu′nice ndien ekaeka esie, Lo′is.

Ọyọhọ ikata edi emi Paul akade Lys′tra. N̄kpọ nte isua kiet mbemiso, Paul ye Bar′na·bas ẹma ẹdi mi akpa ini ke isan̄ ukwọrọikọ. Ndien Paul afiak edi ye ufan esie Silas.

Timothy ye Paul

Nte ọmọfiọk se Paul ọdọhọde Timothy? ‘Nte akpama ndisan̄a ye ami ye Silas?’ enye obụp. ‘Nnyịn ikpoyom un̄wam fo ke ndikwọrọ ikọ nnọ mme owo ke mme anyan ebiet.’

‘Ih,’ Timothy ọbọrọ, ‘N̄kpama ndika.’ Ntre ibịghike, Timothy ọkpọn̄ ubon esie asan̄a ye Paul ye Silas. Edi mbemiso nnyịn ikpep iban̄a isan̄ mmọ, yak ifiọk se itịbede inọ Paul. Osịm n̄kpọ nte isua 17 tọn̄ọ Jesus okowụt enye idem ke usụn̄ akade Damascus.

Ti, Paul ekedi Damascus ndikọbọ mme mbet Jesus, edi ke emi enye edi mbet ke idemesie! Ekem, usụk mme asua ẹdiomi ndiwot Paul koro mmọ mimaha enye ekpep aban̄a Jesus. Edi mme mbet ẹn̄wam Paul ọbọhọ. Mmọ ẹsịn enye ke akpasa ẹsụk ke an̄wa ibibene obio.

Ekem Paul aka Antioch ndikwọrọ ikọ. Edi mi ke ẹkot mme anditiene Jesus mme Christian ke akpa ini. Ẹdọn̄ ndien Paul ye Bar′na·bas ẹto Antioch ẹka isan̄ ukwọrọikọ ke ata anyan idụt. Kiet ke otu mme obio mmọ ẹkade edi Lys′tra, obio Timothy.

Ke emi, n̄kpọ nte isua kiet ebede, Paul afiak ke Lys′tra ke udiana isan̄ esie. Ke Timothy adahade ye Paul ye Silas, nte ọmọfiọk ebiet mmọ ẹkade? Se map oro, yak ikpep ndusụk mme itie oro.

Akpa, mmọ ẹka n̄kpet n̄kpet I·co′ni·um, ekem udiana obio ẹkotde Antioch. Ke oro ebede mmọ ẹsan̄a ẹdọk ẹka Tro′as, ekem ẹsịm Phi·lip′pi, Thes·sa·lo·ni′ca ye Be·roe′a. Nte omokụt Athens ke map? Paul ọkwọrọ ikọ do. Ke oro ebede mmọ ẹbiat isua kiet ye ubak ẹkwọrọ ikọ ke Corinth. Ke akpatre mmọ ẹbet esịt ke Eph′e·sus. Ekem mmọ ẹsan̄a ke ubom edi Caes·a·re′a, ndien ẹsan̄a ẹdọk ẹka Antioch, ebiet Paul odụn̄de.

Ntre Timothy asan̄a ata ediwak itiat ikie an̄wam Paul ndikwọrọ “eti mbụk” ndinyụn̄ ntọn̄ọ ediwak mme esop Christian. Ke afo okponde akan, nte afo eyedi asan̄autom mbuọtidem Abasi nte Timothy?

Utom Mme Apostle 9:19-30; 11:19-26; mme ibuot 13 osịm 17; 18:1-22.

map

1. Rome; 2. Malta; 3. Beroea; 4. Thessalonica; 5. Corinth; 6. Philippi; 7. Athens; 8. Crete; 9. Troas; 10. Ephesus; 11. Miletus; 12. Colossae; 13. Antioch; 14. Iconium; 15. Lystra; 16. Cyprus; 17. Antioch; 18. Caesarea; 19. Joppa; 20. Damascus; 21. Jerusalem; 22. Akwa Inyan̄ (Mediterranean)



Mme Mbụme

  • Akparawa emi ke ndise edi anie, enye odụn̄ ke m̀mọ̀n̄, ndien eka esie ye ekaeka esie ẹkere didie?
  • Nso ke Timothy ọbọrọ ke ini Paul obụpde m̀mê enye akpama ndisan̄a ye imọ ye Silas n̄kwọrọ ikọ nnọ mme owo ke anyan ebiet?
  • M̀mọ̀n̄ ke ẹkot mme anditiene Jesus Christian ke akpa ini?
  • Siak ndusụk obio oro Paul ye Barnabas ẹkade ke ndondo oro mmọ ẹkpọn̄de Lystra.
  • Didie ke Timothy an̄wam Paul, ndien nso mbụme ke mme uyen mfịn ẹkpebụp idemmọ?

Mme mbụme efen

Kpep N̄kpọ En̄wen

KAD MBRE BIBLE

Kad Mbre Bible Aban̄ade Timothy

Timothy akanam n̄kpọ Abasi toto ke ekpri. Didie ke afo ekeme ndikpebe enye?

KPEP NDITO FO

Timothy Ama Esima Ndin̄wam Mme Owo

Nso ke afo akpanam man uwem fo ọfọn onyụn̄ enem nte eke Timothy?