Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 109: Peter Ekese Cornelius

Mbụk 109: Peter Ekese Cornelius

APOSTLE Peter ada oro, ndien ndusụk mme ufan esie eda enye ke edem. Edi nsinam owo oro ọtọn̄ edọn̄ ọnọ Peter? Nte enye akpanam oro? Nte ọmọfiọk owo emi enye edide?

Peter osobo ye Cornelius

Owo oro edi Cornelius. Enye edi etubom ekọn̄ Rome. Cornelius idiọn̄ọke Peter, edi ẹma ẹdọhọ enye okot enye edi ufọk esie. Yak ifiọk nte emi akasan̄ade otịbe.

Akpa mme anditiene Jesus ẹkedi mme Jew, edi Cornelius idịghe Jew. Edi enye ama Abasi, enye ọbọn̄ akam ọnọ enye, onyụn̄ anam ediwak mfọn ọnọ mme owo. Ọfọn, uwemeyo kiet angel owụt enye idem onyụn̄ ọdọhọ: ‘Abasi enem esịt ye afo, ndien enye ọmọn̄ ọbọrọ mme akam fo. Dọn̄ ndusụk owo ẹkekot owo oro ẹkotde Peter. Enye etie ke Jop′pa ke ufọk Simon, odụn̄de ke mben inyan̄.’

Ọfọn, ini kiet, Cornelius ọdọn̄ ndusụk owo ẹkeyom Peter. Ndan̄ nsiere, ke mme owo oro ekperede Jop′pa, Peter odu ke mbatmbat ọkọm ufọk Simon. Do Abasi anam Peter ekere ete imokụt akamba ọfọn̄ otode heaven ọsụhọde. Ke ọfọn̄ oro, kpukpru orụk unam ẹdu. Nte ekemde ye ibet Abasi, mme unam emi ikasanake se ẹtade, edi uyo ọdọhọ: ‘Daha ke enyọn̄, Peter. Wot nyụn̄ ta.’

Peter ọbọrọ ete. ‘Baba!’ ‘Akanam ntaha se idehede.’ Edi uyo oro asian Peter: ‘Tre ndikot se Abasi ke emi ọdọhọde ke asana edidehe.’ Emi otịbe utịm ikata. Ke Peter eyịkde se kpukpru emi ọwọrọde, mme owo oro Cornelius ọkọdọn̄de ẹsịm ufọk ẹnyụn̄ ẹbụp Peter.

Peter ọsụhọde isọn̄ ọkọdọhọ: ‘Ami ndi owo oro mbufo ẹyomde. Ntak mbufo ẹdide?’ Ke mme owo oro ẹtịn̄de ete ke angel ọkọdọhọ Cornelius okot Peter edi ufọk esie, Peter onyịme ndisan̄a ye mmọ. Ke ndan̄ nsiere, Peter ye mme ufan esie ẹka ndikụt Cornelius ke Caes·a·re′a.

Cornelius ama obon mme iman ye ata mme ufan esie ọtọkiet. Ke Peter edide, Cornelius edisobo enye. Enye ọduọ ke isọn̄ atuak ibuot ke ukot Peter, nte afo okụtde mi. Edi Peter ete: ‘Daha da; Ami ke idem mi ndi kpa owo.’ Ih, Bible owụt nte ke inenke nditọn̄ ẹdọn̄ ntuak ibuot nnọ owo. Nnyịn ikpokpono Jehovah kpọt.

Ke emi, Peter ọkwọrọ ikọ ọnọ mmọ oro ẹtan̄de ẹbon. Peter ọdọhọ, ‘Mmokụt nte Abasi onyịme kpukpru owo oro ẹyomde ndinam n̄kpọ nnọ enye.’ Ndien ke adan̄aemi enye ẹtịn̄de ikọ, Abasi ọdọn̄ edisana spirit, ndien mme owo ẹtọn̄ọ nditịn̄ iko ke nsio nsio usem. Emi akpa mme mbet Jew emi ẹkesan̄ade ye Peter idem, koro mmọ ekekere ete Abasi ama mme Jew kpọt. Ntre emi ekpep nnyịn nte ke Abasi isehe mme owo orụk kiet nte ẹfọnde ẹnyụn̄ ẹdide akpan n̄kpọ ẹnọ Abasi ẹkan mme owo orụk efen. Nte oro idịghe n̄kpọ ọfọnde ọnọ nnyịn kpukpru nditi?

Utom Mme Apostle 10:1-48; 11:1-18; Eriyarare 19:10.



Mme Mbụme

  • Anie owo ọtọn̄ọ edọn̄ emi ke ndise?
  • Nso ke angel ọdọhọ Cornelius?
  • Nso ke Abasi owụt Peter ke ini enye odude ke ọkọm ufọk Simon ke Joppa?
  • Ntak emi Peter ọdọhọde Cornelius nte ke enye ikpọtọn̄ọke edọn̄ ituak ibuot inọ imọ?
  • Ntak emi idem akpade mme mbet Jew emi ẹdude ye Peter?
  • Nso akpan n̄kpọ ke nnyịn ikpekpep ito Peter ndika n̄kese Cornelius?

Mme mbụme efen

Kpep N̄kpọ En̄wen

MME N̄KPỌ NDIDA N̄KPEP BIBLE

Abasi Inamke Asari

Nso akpan n̄kpọ ke ikpekpep ito Peter ndika ufọk Cornelius?