Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 105: Ndibet ke Jerusalem

Mbụk 105: Ndibet ke Jerusalem

MME owo ẹmi ẹdi mme anditiene Jesus. Mmọ ẹkop uyo ẹnọ enye ẹnyụn̄ ẹbet ke Jerusalem. Ndien nte mmọ kpukpru ẹbetde ọtọkiet, akamba uyom ọyọhọ ofụri ufọk. Enye etie nte akwa ofụm ofụmede. Ndien edeme ikan̄ ẹtọn̄ọ ndiwọrọ ke mme ibuot mme mbet oro kiet kiet. Nte afo emekeme ndikụt ikan̄ oro ke ibuot mmọ kiet kiet? Nso ke kpukpru emi ọwọrọ?

Edisana spirit odoro mme mbet akpa isua ikie ke idem

Edi utịbe n̄kpọ! Jesus afiak okosịm Ete esie ke heaven, ndien enye ke ọduọk edisana spirit Abasi ọnọ mme mbet esie. Nte ọmọfiọk se spirit emi esịnde mmọ ẹnam? Mmọ kpukpru ẹtọn̄ọ nditịn̄ ikọ ke nsio nsio usem.

Ediwak owo ke Jerusalem ẹkop uyom oro etiede nte ọkpọsọn̄ ofụm, ndien mmọ ẹdi ndise se itịbede. Ndusụk owo oro ẹto mme idụt efen edi mi ndibuana ke usọrọ Pentecost Israel. Nso n̄kpaidem osịm isenowo ẹmi ntem! Mmọ ẹkop mme mbet ẹmi ẹtịn̄de ke usem mmọ ẹban̄a mme utịbe n̄kpọ oro Abasi anamde.

Isenowo oro ẹdọhọ, ‘Mmọ ẹmi kpukpru ẹto Gal′i·lee. Didie ndien ke mmọ ẹkeme nditịn̄ ikọ ke nsio nsio usem idụt nnyịn itode?’

Peter ke emi adaha ada ndinam an̄wan̄a mmọ. Enye emenede uyo esie onyụn̄ asian mmọ oro nte ẹkesan̄ade ẹwot Jesus, n̄ko nte Jehovah akanamde enye eset ke n̄kpa. Peter ete, ‘Idahaemi, Jesus odu ke heaven ke ubọk nnasia Abasi. N̄ko enye an̄wan̄a edisana spirit ẹken̄wọn̄ọde ọduọk. Ntak edi oro mbufo ẹkụtde ẹnyụn̄ ẹkopde mme utịbe n̄kpọ ẹmi.’

Ọfọn, ke ini Peter etịn̄de mme n̄kpọ ẹmi, ediwak owo oro ẹtịm ẹkop mbọm ẹban̄a se ẹkenamde Jesus. Mmọ ẹbụp, ‘Nso ke nnyịn ikpanam?’ Peter ọdọhọ mmọ: ‘Mbufo ẹnyene ndikpụhọde uwem mbufo, nnyụn̄ nna baptism.’ Ntre kpa ke usen oro, n̄kpọ nte mme owo 3,000 ẹna baptism ẹnyụn̄ ẹkabade edi mme anditiene Jesus.

Utom Mme Apostle 2:1-47.



Mme Mbụme

  • Nte ndise emi owụtde, nso itịbe inọ mme anditiene Jesus emi ẹbetde ke Jerusalem?
  • Nso n̄kpọ n̄kpaidem ke isenowo ke Jerusalem ẹkụt?
  • Nso ke Peter anam an̄wan̄a mme owo?
  • Etie mme owo ke idem didie ke mmọ ẹma ẹkekpan̄ utọn̄ ẹnọ Peter, ndien nso ke enye ọdọhọ mmọ ẹnam?
  • Owo ifan̄ ẹkena baptism ke usen Pentecost eke isua 33 E.N.?

Mme mbụme efen

Kpep N̄kpọ En̄wen

Ediwak Owo Ẹkụt Jesus Mbemiso Pentecost

Ọtọn̄ọde ke ini emi Jesus esetde tutu esịm ini emi enye ọnyọn̄de heaven, enye ama etịn̄ se ẹdinọde mme mbet ye se mmọ ẹkpedade enye ẹnam.