Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 104: Jesus Afiak ke Heaven

Mbụk 104: Jesus Afiak ke Heaven

NTE mme usen ẹbede, Jesus owụt mme anditiene enye idem ediwak ini. Ini kiet, n̄kpọ nte mme mbet 500 esie ẹkụt enye. Ke owụtde mmọ idem, nte afo ọmọfiọk se Jesus etịn̄de ọnọ mmọ aban̄a? Obio ubọn̄ Abasi. Jehovah ọkọdọn̄ Jesus edi isọn̄ edikpep aban̄a Obio ubọn̄ oro. Ndien enye akaiso anam emi idem ke ẹma ẹkenam enye eset ke n̄kpa.

Jesus afiak ke heaven

Nte afo emeti se Obio ubọn̄ Abasi edide? Ih, Obio ubọn̄ edi ata ukara Abasi ke heaven, ndien Jesus edi enye oro Abasi ekemekde edi edidem. Nte nnyịn ikekpepde, Jesus ama owụt utọ utịbe edidem enye edidide ke ndibọk mbon ọbiọn̄, ndikọk mbon udọn̄ọ ye idem ke ndinam mme akpa n̄kpa ẹset ẹnyene uwem!

Ntre ke Jesus akarade nte edidem ke heaven ke isua tọsịn kiet, n̄kpọ editie didie ke isọn̄? Ih, eyenam ofụri isọn̄ edi ediye paradise. Mme ekọn̄ ididụhe aba, mme ubiatibet, mme udọn̄ọ, mme idem n̄kpa. Nnyịn imọfiọk ke emi edi akpanikọ koro Abasi akanam isọn̄ edi paradise ọnọ mme owo ndidara. Oro edi ntak enye akanamde in̄wan̄ Eden ke editọn̄ọ. Ndien Jesus eyekụt ete ke ẹnam se Abasi oyomde ẹnam ke akpatre.

Ini edikem ke emi ọnọ Jesus ndifiak ke heaven. Ke usen 40, Jesus ke okowụt mme mbet esie idem. Ntre mmọ ẹtịm ẹnịm ẹte enye afiak odu uwem. Edi mbemiso enye ọkpọn̄de mme mbet esie, enye ọdọhọ mmọ: ‘Ẹtie ke Jerusalem tutu mbufo ẹbọ edisana spirit.’ Edisana spirit edi anamutom odudu Abasi, ebietde ofụm ofụmede, oro eyen̄wam mme anditiene enye ẹnam uduak Abasi. Ke akpatre, Jesus ete: ‘Mbufo ẹnyene ndikwọrọ mban̄a mi nsịm ata anyan utịt isọn̄.’

Ke Jesus etịn̄de emi ama, n̄kpọ n̄kpaidem otịbe. Enye ọtọn̄ọ ndidọk n̄kodụk ke heaven, nte afo ekemede ndikụt mi. Ekem, obubịt enyọn̄ ofụk enye ndien mme mbet ikwe Jesus aba. Jesus aka heaven, ndien enye etie do ọtọn̄ọ ndikara mme anditiene enye ke isọn̄.

Mme mbet ke ẹse ikpaenyọn̄

1 Corinth 15:3-8; Eriyarare 21:3, 4; Utom Mme Apostle 1:1-11.



Mme Mbụme

  • Mbet ifan̄ ẹkụt Jesus ini kiet, ndien nso ke enye etịn̄ ọnọ mmọ aban̄a?
  • Nso idi Obio Ubọn̄ Abasi, ndien uwem editie didie ke isọn̄ ke ini Jesus akarade nte Edidem ke isua tọsịn kiet?
  • Jesus owụt mme mbet esie idem usen ifan̄, edi nso ke enye oyom ndinam idahaemi?
  • Nso ke Jesus ọdọhọ mme mbet esie ẹnam esisịt ini mbemiso ọkpọn̄de mmọ?
  • Nso itịbe ke ndise emi, ndien ntak owo mîkemeke ndikụt Jesus aba?

Mme mbụme efen

Kpep N̄kpọ En̄wen

Christ Etie ke Ubọk Nnasia Abasi

Nso ke Jesus edinam ke ini enye osụk ebetde mbemiso enye osobo mme asua esie?