Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 103: Odụk Esịt Ubet Ẹkọbide

Mbụk 103: Odụk Esịt Ubet Ẹkọbide

KE PETER ye John ẹma ẹkekpọn̄ udi oro okpo Jesus okodude, Mary odu do ikpọn̄. Enye ọtọn̄ọ nditua. Ndien enye ọnuhọ onyụn̄ ese esịt udi, nte nnyịn ikokụtde ke akpatre ndise oro. Do enye okụt mme angel iba! Mmọ ẹbụp enye: ‘Ntak emi afo atuade?’

Mary ọbọrọ: ‘Mmọ ẹmen Ọbọn̄ mi ẹfep, ndien mfiọkke ebiet ẹnịmde enye.’ Ndien Mary ọwọn̄ọde onyụn̄ okụt owo. Owo oro obụp enye: ‘Anie ke afo oyom?’

Mary ekere ke owo oro edi ekpeme in̄wan̄, n̄ko ke ekeme ndidi enye ekemen okpo Jesus. Ntre enye ete: ‘Edieke afo ekemende enye, sian mi ebiet afo onịmde enye.’ Edi, ke akpan, owo emi edi Jesus. Enye esịne idem oro Mary mifiọkke. Edi ke enye okotde enye enyịn̄ esie, Mary ọfiọk ke edi Jesus. Enye efehe akasian mme mbet: ‘Mmokụt Ọbọn̄!’

Ekem ke usen oro, ke mbet iba ẹsan̄ade ẹka ekpri obio Em·ma′us, eren kiet etiene mmọ. Mme mbet ẹtịm ẹfụhọ koro ẹma ẹwot Jesus. Edi nte mmọ ẹsan̄ade ẹka, owo oro anam ediwak n̄kpọ Bible ẹn̄wan̄a oro anamde esịt enem mmọ. Ke akpatre, ke mmọ ẹbetde ndidia udia, mme mbet oro ẹdiọn̄ọ ke owo emi edi Jesus. Ndien Jesus osop, ndien mbet iba emi ẹsọp ẹfiak edem ke adan̄a usụn̄ oro ẹka Jerusalem ndisian mme apostle mban̄a enye.

Ke oro osụk akade iso, Jesus owụt n̄ko Peter idem. Mmọ eken ẹkop inemesịt ke ẹkopde emi. Ekem, mbet iba emi ẹka Jerusalem ẹkekụt mme apostle. Mmọ ẹtọt mmọ nte Jesus n̄ko okowụtde mmọ idem ke usụn̄. Ndien ke mmọ ẹsụk ẹtịn̄de ẹban̄a emi, nte ọmọfiọk n̄kpọ n̄kpaidem oro otịbede?

Se ndise oro. Jesus owụt idem kpa do ke ubet oro, okposụk edi ẹkọbide usụn̄. Adan̄a didie ke esịt enem mme mbet emi! Nte oro ikedịghe usen inemesịt? Nte afo emekeme ndibat mme ikafan̄ ke Jesus okowụt mme anditiene enye idem idahaemi? Nte afo amabat osịm ikotion?

Jesus owụt mme mbet idem

Apostle Thomas idụhe ye mmọ ke Jesus owụtde idem. Ntre mme mbet eken ẹdọhọ enye: ‘Nnyịn imokụt Ọbọn̄!’ Edi Thomas ete ke ana imọ ikụt Jesus ke idem imọ mbemiso inịmde oro. Ọfọn, usen itiaita ẹbede, mme mbet ẹfiak ẹdu ke esịt ubet ẹkọbide, ndien ini emi Thomas odu ye mmọ. Ndo ndo oro, Jesus ọbiọn̄ọde kpa ke ubet oro. Idahaemi, Thomas onịm ke akpanikọ.

John 20:11-29; Luke 24:13-43.



Mme Mbụme

  • Nso ke Mary etịn̄ ye owo emi enye ekerede ke edi ekpeme in̄wan̄, edi nso inam enye ọfiọk ke owo oro enen̄ede edi Jesus?
  • Nso itịbe inọ mbet iba emi ẹsan̄ade ẹka ekpri obio Emmaus?
  • Nso n̄kpọ n̄kpaidem itịbe ke ini mbet iba ẹdọhọde mme apostle ke mmimọ imokụt Jesus?
  • Ikafan̄ ke Jesus okowụt mme anditiene enye idem?
  • Nso ke Thomas etịn̄ ke ini enye okopde ke mme mbet ẹkụt Ọbọn̄, edi nso itịbe usen itiaita ke oro ebede?

Mme mbụme efen

Kpep N̄kpọ En̄wen

Ediwak Owo Ẹkụt Jesus Mbemiso Pentecost

Ọtọn̄ọde ke ini emi Jesus esetde tutu esịm ini emi enye ọnyọn̄de heaven, enye ama etịn̄ se ẹdinọde mme mbet ye se mmọ ẹkpedade enye ẹnam.