Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 102: Jesus Odu Uwem

Mbụk 102: Jesus Odu Uwem

NTE ỌMỌFIỌK owo oro n̄wan oro ye irenowo iba oro ọdidẹ? N̄wan oro edi Mary Mag′da·lene, ufan Jesus. Ndien irenowo oro ke mfia ọfọn̄ ẹdi mme angel. Ekpri ubet oro Mary esede esịt edi ebiet oro ẹkenịmde okpo Jesus ke enye ama akakpa. Ẹkot enye udi. Edi idahaemi, okpo oro idụhe! Anie ekemen enye? Yak nnyịn ise.

Mme angel ẹtịn̄ ikọ ye Mary Magdalene

Ke Jesus ama akakpa, mme oku ẹdọhọ Pilate: ‘Ke ini Jesus okodude uwem, enye ọkọdọhọ ke ẹyenam imọ iset ke ọyọhọ usen ita. Ntre nnọ ewụhọ ete ẹkpeme udi oro. Ndien mme mbet esie idikemeke ndiyịp okpo esie nnyụn̄ ndọhọ nte ke ẹnam enye eset ke n̄kpa!’ Pilate ọdọhọ mme oku ẹdọn̄ mbon ekọn̄ ẹkekpeme udi.

Edi ke ata tuhi usenubọk ọyọhọ usen ita nte Jesus akakpa, angel Jehovah kiet edi iwiwa. Enye akpat itiat oro efep ke udi. Mbon ekọn̄ ẹkop ndịk tutu mmọ ikemeke ndidụri idem nda. Ke akpatre, ke mmọ ẹsede esịt udi, okpo oro idụhe! Ndusụk mbon ekọn̄ oro ẹdụk ke obio ẹkesian mme oku. Nte ọmọfiọk se mme idiọk oku oro ẹnamde? Mmọ ẹkpe mbon ekọn̄ oro okụk ẹsu nsu. Mme oku oro ẹdọhọ mbon ekọn̄, ‘Ẹdọhọ ẹte ke mme mbet esie ẹkedi ke okoneyo, ke ini nnyịn ikedede idap, ẹnyụn̄ ẹyịp okpo oro.’

Kan̄a, ndusụk ufan Jesus iban edi ndise udi. Akpa mmọ idem didie ndikụt enye anade ukpọk! Idahaoro, angel iba ke nsemnsem ọfọn̄ ẹbiọn̄ọde. Mmọ ẹbụp, ‘Ntak emi mbufo ẹyomde Jesus mi?’ ‘Ẹma ẹnam enye eset. Ẹka usọp usop ẹkesian mme mbet esie.’ Iban oro ẹfehe ẹsọp didie ntem! Edi ke usụn̄, owo kiet etre mmọ. Nte afo ọmọfiọk owo oro enye edide? Edi Jesus! Enye ọdọhọ, ‘Ẹka ẹkesian mme mbet mi.’

Ke ini iban ẹmi ẹdọhọde mme mbet esie ẹte Jesus odu uwem, n̄ko nte ke mmimọ imokụt enye, ọsọn̄ mme mbet oro idem ndinịm. Peter ye John ẹfehe ẹka udi oro ndise ke idem mmọ, edi udi ana ukpọk! Ke Peter ye John ẹkpọn̄de, Mary Mag′da·lene atuak ada do. Emi edi ini enye esede esịt okụt mme angel iba oro.

Nte afo ọmọfiọk se ikotịbede inọ okpo Jesus? Abasi akanam enye osop. Abasi ikanamke Jesus afiak eset ye ikpọkidem obụk oro enye akadade akpa. Enye ọkọnọ Jesus obufa idem spirit, nte mme angel ke heaven ẹnyenede. Edi man owụt mme mbet esie nte imọ imodu uwem, Jesus ekeme ndisịne idem oro mme owo ẹkemede ndikụt, nte nnyịn idikpepde.

Matthew 27:62-66; 28:1-15; Luke 24:1-12; John 20:1-12.



Mme Mbụme

  • N̄wan emi ke ndise edi anie, mmanie ke irenowo iba emi ẹdi, ndien mmọ ẹdu ke m̀mọ̀n̄?
  • Ntak emi Pilate ọdọhọde mme oku ẹdọn̄ mbonekọn̄ ẹkekpeme udi Jesus?
  • Nso ke angel anam ke tụhi usenubọk ọyọhọ usen ita tọn̄ọ nte Jesus akakpa, edi nso ke mme oku ẹnam?
  • Ntak emi idem akpade ndusụk iban ke ini mmọ ẹkade ẹkese udi Jesus?
  • Ntak emi Peter ye John ẹfehede ẹka udi Jesus, ndien nso ke mmọ ẹkụt?
  • Nso iketịbe inọ okpo Jesus, edi nso ke enye anam ndiwụt mme mbet ke imọ imodu uwem?

Mme mbụme efen

Kpep N̄kpọ En̄wen

JESUS EDI USỤN̄ YE AKPANIKỌ YE UWEM

Jesus Owụt Ediwak Owo Idem ke Enye Ama Ekeset

Jesus edinam didie iwụt mme mbet esie ke imeset?

ENYỌN̄-UKPEME

Nso ke Jesus Ndikakpa Nnyụn̄ Nset Ekeme Ndinam Nnọ Fi?

Akpan ukpepn̄kpọ Bible itiokiet anam ifiọk nte n̄kpa owo kiet anamde ediwak owo ẹnyene uwem.