Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 96: Jesus Ọkọk Mbon Udọn̄ọ

Mbụk 96: Jesus Ọkọk Mbon Udọn̄ọ

NTE JESUS asan̄ade ke ofụri isọn̄, enye ọkọk mbon udọn̄ọ. Ẹsuan mbụk mme utịbe n̄kpọ emi ẹkanade n̄kpet n̄kpet n̄kpri ye ikpọ obio. Ntre mme owo ẹda mbon mbụn̄ọ ye mme nnan, ye inan, ye ediwak mbon eken oro ẹdọn̄ọde ẹsọk enye. Ndien Jesus ọkọk mmọ kpukpru.

Ebe isua ita idahaemi nte John okonịm Jesus baptism. Ndien Jesus ọdọhọ mme apostle esie ete ke ibịghike imọ iyedọk ika Jerusalem, ebiet ediwotde imọ, ndien ekem iyeset ke n̄kpa. Kan̄a, Jesus akaiso ndikọk mbon udọn̄ọ.

Jesus ọkọk n̄wan emi ọdọn̄ọde

Usen kiet, Jesus ke ekpep n̄kpọ ke Sabbath. Sabbath edi usen nduọk odudu mme Jew. N̄wan emi afo okụtde mi ama ọdọn̄ọ etieti. Ke isua 18 enye osụk ọnuhọ ntre, ikemeke ndidada. Ntre Jesus odori enye ubọk, ndien enye ọtọn̄ọ nditịm nda. Ẹkọk udọn̄ọ esie!

Emi anam mme adaiso ido ukpono ẹyat esịt. Kiet ke otu mmọ ofiori ọnọ otu owo, ‘Usen itiokiet ẹdu ẹnọ nnyịn ndinam utom. Mme usen oro edi usen ndidibọ ukọk udọn̄ọ, idịghe ke Sabbath!’

Edi Jesus ọbọrọ: ‘Mbufo mme idiọk owo. Owo mbufo ekededi eyetat enan̄ esie ọkọnọ mmọn̄ ke Sabbath. Ntre nte ikpekọkke ubuene an̄wan emi ọkọdọn̄ọde ofụri isua 18 ke Sabbath?’ Ibọrọ Jesus anam mme idiọk owo emi but.

Ekem Jesus ye mme apostle esie ẹsan̄a ẹka Jerusalem. Ke mmọ ẹkperede edem obio Jericho, mbon eben̄e nnan iba ẹkop ke Jesus ke asan̄a ebe. Ntre mmọ ẹfiori: ‘Jesus, nnyan̄a nnyịn!’

Jesus okot mbon nnan emi, onyụn̄ obụp: ‘Nso ke mbufo ẹyom nnam nnọ mbufo? Mmọ ẹte: ‘Ọbọn̄, tat nnyịn enyịn.’ Jesus otụk enyịn mmọ, ndien iwiwa, mmọ ẹkeme ndikụt n̄kpọ! Nte afo ọmọfiọk ntak Jesus anamde kpukpru utịbe n̄kpọ n̄kpaidem emi? Koro enye ama mme owo onyụn̄ oyom mmọ ẹbuọt idem ye enye. Ntre nnyịn imekeme ndinịm nte ke ini enye edikarade nte Edidem, baba owo kiet ke isọn̄ ididọn̄ọke aba.

Matthew 15:30, 31; Luke 13:10-17; Matthew 20:29-34.



Mme Mbụme

  • Nso ke Jesus anam nte enye asan̄ade ke ofụri isọn̄?
  • N̄kpọ nte isua ita ke Jesus ama akana baptism, nso ke enye etịn̄ ọnọ mme apostle esie?
  • Mmanie ẹdi emi ke ndise, ndien nso ke Jesus anam ọnọ n̄wan emi?
  • Ntak emi ibọrọ Jesus anamde mme adaiso ido ukpono bụt?
  • Ke ini Jesus ye mme apostle esie ẹsan̄ade ẹkpere Jericho, nso ke Jesus anam ọnọ mbon eben̄e nnan iba?
  • Ntak emi Jesus anamde mme utịben̄kpọ?

Mme mbụme efen

Kpep N̄kpọ En̄wen

JESUS EDI USỤN̄ YE AKPANIKỌ YE UWEM

Jesus Ada Odudu ke M̀mọ̀n̄ Anam Utịben̄kpọ?

Nditọeka Jesus ẹkere ke ibuot ebe enye.