Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 94: Enye Ama N̄kpri Nditọ

Mbụk 94: Enye Ama N̄kpri Nditọ

SESE Jesus mi awan̄de ekpri eyen oro ubọk ke idem. Afo emekeme ndikụt nte Jesus ke akpan ekere aban̄a n̄kpri nditọ. Irenowo oro ẹsede ẹdi mme apostle esie. Nso ke Jesus asian mmọ? Yak idụn̄ọde ifiọk.

Jesus ye mme apostle esie ẹnyọn̄ anyan isan̄ ididahaemi. Ke usụn̄, mme apostle ẹma ẹnyene mfan̄a ye kiet eken. Ntre ke utịt isan̄ oro, Jesus obụp mmọ: ‘Nso ke mbufo ẹkefan̄a ke usụn̄?’ Ke akpan, Jesus ọfiọk se mfan̄a oro akaban̄ade. Edi enye obụp mbụme oro ndise mme mme apostle oro ẹyetịn̄ ẹnọ enye.

Jesus ye ekpri eyeneren

Mme apostle ibọrọke, koro ke usụn̄ mmọ ẹkefan̄a ẹban̄a owo ke otu mmọ oro edide andikpon n̄kan. Usụk mme apostle ẹyom ndidi akpan owo n̄kan mmọ eken. Didie ke Jesus editịn̄ ọnọ mmọ ke inenke ndiyom ndidi andikpon n̄kan?

Enye okot ekpri eyeneren oro, onyụn̄ anam enye ada ke iso mmọ kpukpru. Ndien enye ọdọhọ mme mbet esie: ‘Ami nnyom mbufo etịm ẹfiọk emi, Ibọhọke mbufo ẹkpụhọde ẹkabade ẹtie nte n̄kpri nditọ, mbufo ididụkke obio ubọn̄ Abasi. Andikpon n̄kan ke obio ubọn̄ oro edi enye oro akabarede etie nte ekpri eyen emi.’ Nte ọmọfiọk ntak Jesus etịn̄de ntem?

Nte ededi, n̄kpri nditọ ikereke iban̄a ndidi andikpon n̄kan mme akpan owo n̄kan mmọ efen. Ntre mme apostle ẹnyene ndikpep nditie nte n̄kpri nditọ ke usụn̄ emi utu ke nditọhọ mban̄a edidi n̄kpon n̄kan owo mme akpan owo.

Mme ini efen ẹdu, n̄ko, oro Jesus owụtde adan̄a nte enye ekerede aban̄a n̄kpri nditọ. Ke ọfiọn̄ ifan̄ ebede ndusụk owo ẹda nditọ mmọ ẹdikụt Jesus. Mme apostle ẹdomo ndikpan mmọ. Edi Jesus ọdọhọ mme apostle esie: ‘Ẹyak n̄kpri nditọ ẹtiene mi, ẹkukpan mmọ, koro obio ubọn̄ Abasi enyenede owo ẹbietde mmọ.’ Ndien Jesus emen n̄kpri nditọ oro akama, onyụn̄ ọdiọn̄ mmọ. Nte ifọnke ndifiọk nte ke Jesus ama n̄kpri nditọ?

Matthew 18:1-4; 19:13-15; Mark 9:33-37; 10:13-16.



Mme Mbụme

  • Nso ke mme apostle ẹfan̄a ẹban̄a ke ini mmọ ẹnyọn̄de anyan isan̄?
  • Ntak emi Jesus okotde ekpri eyeneren onyụn̄ anamde enye ada ke iso mme apostle?
  • Ke nso usụn̄ ke mme apostle ẹkpekpep nditie nte n̄kpri nditọ?
  • Ke ọfiọn̄ ifan̄ ẹbede, didie ke Jesus owụt ke imama n̄kpri nditọ?

Mme mbụme efen