Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 92: Jesus Anam mme Akpa N̄kpa Ẹset

Mbụk 92: Jesus Anam mme Akpa N̄kpa Ẹset

EYENAN̄WAN oro afo okụtde mi edi isua 12. Jesus ke omụm ubọk esie, eka ye ete esie ẹda ẹkpere. Nte afo ọmọfiọk ntak mmọ ẹnemde esịt ntre? Yak nnyịn ifiọk.

Jesus anam eyenan̄wan Jairus eset

Ete eyenan̄wan oro edi akpan owo ẹkotde Ja′i·rus. Usen kiet, eyenan̄wan esie ọdọn̄ọ ndien ẹnịm enye ke bed. Edi idem osụk ọdiọk enye. Enye akam ọdọdọn̄ọ akan. Esịt otịmede Ja′i·rus ye n̄wan esie etieti, koro etie nte ekpri eyenan̄wan mmọ ọmọn̄ akpa. Enye edi n̄kukụre eyenan̄wan mmọ. Ntre Ja′i·rus aka ndiyom Jesus. Enye ama okop mme utịbe n̄kpọ oro Jesus anamde.

Ke Ja′i·rus okụtde Jesus, akwa otu owo ẹkan enye ẹkụk. Edi Ja′i·rus ebe ke ufọt otu owo onyụn̄ ọduọ Jesus ke ukot. Enye ọdọhọ, ‘Eyenan̄wan mi ọdọn̄ọ ata etieti.’ Enye eben̄e, ete, ‘Mbọk di dinam idem ọsọn̄ enye.’ Jesus ete imọ iyedi.

Nte mmọ ẹkade, otu owo ẹkaiso ẹberi kiet eken man ẹsan̄a ẹkpere. Inikiet, Jesus atuak ada, obụp ete, ‘Anie okotụk mi?’ Jesus okop nte odudu ọwọrọde enye ke idem, ntre enye ọfiọk ete owo ama otụk imọ. Edi anie owo? Edi n̄wan kiet oro ọkọdọn̄ọde etieti ke n̄kpo nte isua 12. Enye ama editụk ọfọn̄ Jesus, ndien okop nsọn̄idem!

Emi anam Ja′i·rus ọsọn̄ idem akan, koro enye okụt nte ememde ọnọ Jesus ndikọk udọn̄ọ. Edi idahaoro isụn̄utom edi. Enye ọdọhọ Ja′i·rus, ‘Kufịna Jesus aba. Eyenan̄wan fo akpa.’ Jesus okop emi ndien ọdọhọ Ja′i·rus: ‘Kukere, enye eyekop nsọn̄idem.’

Ke mmọ ẹsịmde ufọk Ja′i·rus ke akpatre, mme owo ke ẹtua ye akwa mfụhọ. Edi Jesus ete: ‘Ẹkutua. Eyen oro ikpahakpa. Enye akam edede.’ Edi mmọ ẹsak Jesus nsahi, koro mmọ ẹfiọkde ke enye akpa.

Jesus ndien ada ete ye eka eyen oro ye mme apostle esie ita odụk ubet oro eyen emi anade. Enye omụm ubọk esie onyụn̄ ọdọhọ: ‘Daha ke enyọn̄!’ Ndien enye eset kpa nte afo okụtde mi. Ndien enye adaha ke enyọn̄ asan̄a akanade! Oro esịn eka ye ete esie ẹkopde inemesịt ata etieti.

Emi idịghe akpa owo oro Jesus akanamde eset ke n̄kpa. Akpa owo oro Bible etịn̄de aban̄a edi eyeneren ebeakpa ke obio Na′in. Ekem, Jesus n̄ko anam Lazarus, eyeneka Mary ye Martha eset. Ke Jesus akarade nte edidem Abasi, enye eyenam ata ediwak mme akpa n̄kpa ẹset. Nte nnyịn ikpenemke esịt iban̄a oro?

Luke 8:40-56; 7:11-17; John 11:17-44.



Mme Mbụme

  • Anie edi ete eyenan̄wan emi ke ndise, ndien ntak emi esịt etịmerede enye ye n̄wan esie etieti?
  • Nso ke Jairus anam ke ini enye okụtde Jesus?
  • Nso itịbe ke ini Jesus akade ufọk Jairus, ndien nso etop ke ẹtobo Jairus ke usụn̄?
  • Ntak emi mbon oro ẹdude ke ufọk Jairus ẹsakde Jesus nsahi?
  • Ke ama akada apostle ita ye ete ye eka eyenan̄wan oro odụk ubet oro eyen emi anade, nso ke Jesus anam?
  • Mmanie efen ke Jesus anam ẹset ke n̄kpa, ndien nso ke emi owụt?

Mme mbụme efen

Kpep N̄kpọ En̄wen

Ekpri Eyen Emi Eset!

Mme owo ẹsak Jesus ke ini enye ọdọhọde ke eyen oro edede, ikpaha-kpa. Nso ke enye ọdiọn̄ọ emi mmọ mîdiọn̄ọke?

Jesus Anam Eyen Ebeakpa Eset

Mbon emi ẹkekụtde utịben̄kpọ emi ẹfiọk se emi adade aban̄a.

Ẹnam Lazarus Eset

Enyene akpan n̄kpọ iba emi mîyakke mme andibiọn̄ọ Jesus ẹdọhọ ke enye ikanamke utịben̄kpọ emi.