Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 90: Ye N̄wan oro ke Obube Mmọn̄

Mbụk 90: Ye N̄wan oro ke Obube Mmọn̄

JESUS ebet ndiduọk odudu ke mben obube mmọn̄ ke Samaria. Mme mbet esie ẹdụk obio ndidep udia. N̄wan oro Jesus etịn̄de ikọ ọnọ edi ndibọ mmọn̄. Enye ete enye: ‘Nọ mi mmọn̄ n̄n̄wọn̄.’

Jesus ke etịn̄ ikọ ọnọ n̄wan Samaria

Emi akpa n̄wan oro idem etieti. Nte ọmọfiọk ntak? Edi koro Jesus edi owo Jew, ndien enye edi n̄wan Sa·mar′i·a. Ndien ediwak mme Jew imaha mbon Sa·mar′i·a. Mmọ itịn̄ke idem ikọ ye mmọ! Edi Jesus ama kpukpru orụk owo. Ntre enye ete: ‘Edieke ọkpọfiọkde andiben̄e fi mmọn̄, afo ekpeben̄e, ndien enye ọkpọnọ fi mmọn̄ uwem.’

N̄wan oro ọdọhọ, ‘Ete, obube mmọn̄ ọtụn̄ọ, ndien afo ukam unyeneke bọkịt. Ke mmọn̄ ke afo edida mmọn̄ uwem emi?’

Jesus anam an̄wan̄a ete, ‘Edieke afo ọn̄wọn̄de mmọn̄ obube emi, afo eyefiak okop nsatitọn̄. Edi mmọn̄ oro ami ndinọde, ekeme ndinam owo oro odu uwem nsinsi.’

N̄wan oro ọdọhọ, ‘Ete, nọ mi mmọn̄ emi! Ndien ami ndikopke nsatitọn̄ aba. Ndien ndinyeneke ndidi mi aba ndibọ mmọn̄.’

N̄wan oro ekere ete Jesus etịn̄ aban̄a ata mmọn̄. Edi enye etịn̄ aban̄a akpanikọ aban̄ade Abasi ye obio ubọn̄ esie. Akpanikọ emi etie nte mmọn̄ uwem. Enye ekeme ndinọ owo uwem nsinsi.

Jesus ọdọhọ n̄wan oro ke emi: ‘Ka kokot ebe fo di.’

N̄wan oro ọbọrọ ete, ‘Nnyeneke ebe.’

Jesus ete enye, ‘Afo ọmọbọrọ enen.’ ‘Edi afo ama enyene mme ebe ition, ndien erenowo oro afo odụn̄de ye enye idahaemi idịghe ebe fo.’

Idem akpa n̄wan emi, koro kpukpru emi edide akpanikọ. Jesus akasan̄a didie ọfiọk mme n̄kpọ emi? Ih, edi koro Jesus edi Enyeoro Eken̄wọn̄ọde oro Abasi ọdọn̄de, ndien Abasi ọnọ enye ntọt emi. Ke ini emi mme mbet Jesus ẹnyọn̄ ẹdi, ndien idem akpa mmọ nte enye etịn̄de ikọ ye n̄wan Sa·mar′i·a.

Nso ke nnyịn ikpep ito ofụri emi? Owụt nte ke Jesus ọfọn ido ye mme owo eke kpukpru orụk. Ndien nnyịn ikpọfọn nde. Nnyịn inyeneke ndikere nte ke ndusụk owo ẹdiọk n̄kukụre koro mmọ ẹtode akpan orụk kiet. Jesus oyom kpukpru owo ẹdiọn̄ọ akpanikọ oro adade osịm uwem nsinsi. Ndien nnyịn n̄ko ikpoyom ndin̄wam mme owo ekpep akpanikọ.

John 4:5-43; 17:3.



Mme Mbụme

  • Ntak emi Jesus ebetde ke obube mmọn̄ ke Samaria, ndien nso ke enye etịn̄ ye n̄wan oro odude do?
  • Ntak emi n̄wan oro okopde n̄kpaidem, nso ke Jesus etịn̄ ọnọ enye, ndien ntak-a?
  • Nso utọ mmọn̄ ke n̄wan oro ekere ke Jesus etịn̄ aban̄a, edi nso mmọn̄ ke enye enen̄ede etịn̄ aban̄a?
  • Ntak emi idem akpade n̄wan oro ke adan̄a n̄kpọ emi Jesus ọfiọkde aban̄a enye, ndien anie ọkọnọ Jesus ntọt emi?
  • Nso ke ikeme ndikpep nto mbụk aban̄ade n̄wan oro ke obube mmọn̄?

Mme mbụme efen