Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 89: Jesus Anam Temple Asana

Mbụk 89: Jesus Anam Temple Asana

ETIE nte Jesus ayat esịt mi, nte itiehe? Nte ọmọfiọk ntak enye ayatde esịt ntre? Edi koro mme owo emi ke temple Abasi ke Jerusalem ẹdiọk itọn̄ etieti. Mmọ ke ẹdomo ndinam ediwak okụk nto mme owo ẹdide mi ndikpono Abasi.

Jesus onụk mme okpokoro okụk ọduọk

Nte omokụt kpukpru nditọ enan̄ oro ye erọn̄ ye mme ibiom? Mme owo oro ke ẹnyam mme unam ẹmi kpa mi ke temple. Nte ọmọfiọk ntak? Edi koro nditọ Israel ẹyom mme unam ye mme inuen ndiwa nnọ Abasi.

Ibet Abasi ọkọdọhọ ete, ke ini owo Israel anamde idiọk, enye ekenyene ndiwa uwa nnọ Abasi. Mme ini efen n̄ko ẹma ẹdu oro nditọ Israel ẹnyenede ndifọp uwa. Edi mmọn̄ ke owo Israel edida mme inuen ye unam ndiwa nnọ Abasi?

Ndusụk mbon Israel ẹma ẹnyene mme inuen ye mme unam. Ntre mmọ ẹkeme ndinọ mmọ oro. Edi ediwak nditọ Israel ikenyeneke mme unam ye inuen. Ndien ediwak eken ẹkedụn̄ ata anyan usụn̄ ẹkpọn̄ Jerusalem nte mikekemeke ndida unam mmọ kiet ndi ke temple. Ntre mme owo ẹdi mi ndidep mme unam ye inuen oro mmọ ẹyomde. Edi mbon ẹmi ẹkebọ mmọ ata ediwak okụk. Mmọ ke ẹtụk mme owo ẹmi. Ke ebede oro, mmọ ikpenyeneke ndinyam n̄kpọ kpa mi ke temple Abasi.

Emi anam Jesus ayat esịt. Ntre enye onụk okpokoro mme owo emi ọduọk ye mme okụk mmọ onyụn̄ asuan mme okụk mmọ. N̄ko, enye ada urụk anam ikpa onyụn̄ ebịn kpukpru unam oro efep ke temple. Enye owụk mme owo oro ẹnyamde mme ibiom ete: ‘Ẹda mmọ ẹwọrọ mi! Ẹtre ndinam ufọk Ete mi itie ndinam ediwak okụk.’

Ndusụk mme anditiene Jesus ẹdu mi ye enye ke temple ke Jerusalem. Idem akpa mmọ ndikụt se Jesus anamde. Ndien mmọ ẹti itie ke Bible etịn̄de aban̄a Eyen Abasi: ‘Ima ufọk Abasi eyesak ke idem esie nte ikan̄.’

Ke Jesus osụk odude mi ke Jerusalem ndidụk Passover, enye anam ediwak utịbe n̄kpọ.

John 2:13-25; 4:3, 4.



Mme Mbụme

  • Ntak ẹnyamde mme unam ke temple?
  • Nso inam Jesus ayat esịt?
  • Nte afo ekemede ndikụt ke ndise emi, nso ke Jesus anam, ndien nso ke enye owụk mme owo oro ẹnyamde mme ibiom?
  • Ke ini mme anditiene Jesus ẹkụtde se enye anamde, nso ke mmọ eti?
  • Ewe obio ke Jesus akasan̄a ke ini enye akafiakde ọnyọn̄ Galilee?

Mbụme efen