Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 86: Ntantaọfiọn̄ Ada Mme Owo Usụn̄

Mbụk 86: Ntantaọfiọn̄ Ada Mme Owo Usụn̄
Mme asiak ntantaọfiọn̄

NTE omokụt nyayama ntantaọfiọn̄ oro owo emi kiet owụtde? Ke mmọ ẹkpọn̄de Jerusalem, ntantaọfiọn̄ oro ama ọwọrọ. Mme owo emi ẹto Usiaha utịn, mmọ ẹkpep mme ntantaọfiọn̄. Mmọ ẹnịm ẹte, obufa ntantaọfiọn̄ emi ada mmọ ọsọk akpan owo.

Ke mme owo oro ẹsịmde Jerusalem, mmọ ẹkebụp: ‘Enye eyen emi edidide edidem mme Jew?’ “Mme Jew” edi enyịn̄ nditọ Israel efen. Mme owo oro ẹte, ‘Nnyịn ikebem iso ikụt ntantaọfiọn̄ eyen emi ke Usiaha utịn, ndien imedi ndikpono enye.’

Ke Herod, emi edide edidem Jerusalem okopde emi, esịt otịmede enye. Enye ikoyomke edidem efen ada itie esie. Ntre Herod ama okot ikpọ oku obụp: ‘Mmọn̄ ke edidem oro ẹken̄wọn̄ọde edimana?’ Mmọ ẹma ẹbọrọ: ‘Bible ọdọhọ ke Beth′le·hem.’

Ntre Herod okokot mme owo ẹtode Usiaha utịn, ọdọhọ ete: ‘Ẹka ẹkeyom nsekeyen oro. Ke mbufo ẹkụtde enye, ẹnam mi mfiọk. Ami nyom ndikokpono enye n̄ko.’ Edi ke akpan, Herod okoyom ndikụt eyen oro ndiwot enye!

Ekem ntantaọfiọn̄ oro ebem mme owo oro iso aka Beth′le·hem, ndien enye ada ke ebiet emi eyen oro odude. Ke mme owo oro ẹma ẹkedụk ufọk, mmọ ẹkụt Mary ye ekpri Jesus. Mmọ ẹda mme enọ ndien ẹkpọn̄ ẹnọ Jesus. Edi ekem, Jehovah ọtọt mme owo oro ke ndap ete ẹkufiak etiene Herod. Ntre mmọ ẹfiak ke idụt mmọ ke usụn̄ efen.

Ke Herod ọfiọkde ete mme owo ẹtode Usiaha utịn ẹnyọn̄, esịt otịm ayat enye. Ntre enye owụk ete ẹwot kpukpru nditọ iren ke Beth′le·hem tọn̄ọde ke isua iba sụhọde. Edi Jehovah ebemiso ọtọt Joseph ke ndap, ndien Joseph adaha aka Egypt ye ubon esie. Ekem, ke Joseph ọfiọkde ete Herod akpa, enye ada Mary ye Jesus afiak ọnyọn̄ Naz′a·reth. Mi ke Jesus ọkọri okpon.

Afo ekere ete anie akanam obufa ntantaọfiọn̄ oro ayama? Ti, mme owo emi ekebemiso ẹka Jerusalem ke ẹkụtde ntantaọfiọn̄ oro. Satan kpa Devil okoyom ndiwot Eyen Abasi, ndien enye ama ọfiọk ete Edidem Herod eke Jerusalem okpodomo ndiwot enye. Ntre ana edi Satan edi enye oro akanamde ntantaọfiọn̄ oro ayama.

Matthew 2:1-23; Micah 5:2.



Mme Mbụme

  • Mmanie owo ẹdi emi ke ndise, ndien ntak emi owo kiet ke otu mmọ anyande ubọk owụt nyayama ntantaọfiọn̄ oro?
  • Ntak emi esịt otịmede Edidem Herod, ndien nso ke enye anam?
  • M̀mọ̀n̄ ke nyayama ntantaọfiọn̄ oro ada mme owo emi aka, edi ntak emi mmọ ẹfiakde ke idụt mmọ ke usụn̄ efen?
  • Nso ewụhọ ke Herod ọnọ, ndien ntak-a?
  • Nso ke Jehovah ọdọhọ Joseph anam?
  • Anie akanam obufa ntantaọfiọn̄ oro ayama, ndien ntak-a?

Mbụme efen

  • Kot Matthew 2:1-23.

    Jesus ekedi isua ifan̄ ndien enye okodụn̄ ke m̀mọ̀n̄ ke ini mme asiak ntantaọfiọn̄ oro ẹkedide ẹdise enye? (Matt. 2:1, 11, 16)

Kpep N̄kpọ En̄wen

Mme Asiak Ntantaọfiọn̄ Ẹkese Jesus

Ntak emi ntantaọfiọn̄ oro mîkebemke iso imen mmọ ikowụt Jesus edi aka kan̄a ebịne idiọk Edidem Herod?