Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 101: Ẹwot Jesus

Mbụk 101: Ẹwot Jesus

SESE ata n̄kpọ ndịk oro otịbede! Ẹwot Jesus. Mmọ ẹdian enye ke eto. Ẹkọn̄ mme n̄kukịm ẹdọn̄ enye ke ubọk ye ukot. Ntak emi owo ekededi okpoyomde ndinam Jesus emi-e?

Ini oro Jesus oyomde ndikpa

Edi koro ndusụk owo ẹsua Jesus. Nte ọmọfiọk owo oro mmọ ẹdide? Kiet ke otu mmọ edi idiọk angel, Satan kpa Devil. Enye edi enye oro ekekemede ndinam Adam ye Eve ẹsọn̄ ibuot ye Jehovah. N̄ko Satan edi enye oro anamde mme asua Jesus ẹnam utọ enyene ndịk idiọkn̄kpọ emi.

Idem mbemiso ekọn̄de Jesus mi ke eto, mme asua esie ẹnam n̄kpọ nsahi ẹnọ enye. Nte emeti nte mmọ ẹkedide in̄wan̄ Geth·sem′a·ne ẹdida enye ẹwọrọ? Mme anie ẹkedi mme asua oro? Ih, mmọ ẹkedi mme adaiso ido ukpono. Ọfọn, yak nnyịn ise se itịbede efen.

Ke mme adaiso ido ukpono oro ẹdade Jesus ẹwọrọ, mme apostle esie ẹfen̄e. Mmọ ẹkpọn̄ Jesus ikpọn̄ ye mme asua esie, koro ndịk anamde mmọ. Edi apostle Peter ye John ikaha oyom usụn̄ akaha. Mmọ ẹsan̄a ẹtiene man ẹkụt se itịbede inọ Jesus.

Mme oku oro ẹda Jesus ẹbịne akani eren oro An′nas, oro ekesidide akwa oku. Otu owo oro idụhe ebịghi mi. Mmọ ndien ẹda Jesus ẹka ufọk Ca′ia·phas, oro edide akwa oku idahaemi. Ediwak mme adaiso ido ukpono ẹsop idem ke ufọk esie.

Mi ke ufọk Ca′ia·phas, mmọ ẹdomo ikpe. Ẹda mme owo ẹdi ẹdisu nsu ẹban̄a Jesus. Mme adaiso ido ukpono oro kpukpru ẹte: ‘Ana ẹwot Jesus.’ Ndien mmọ ẹtọ enye etap ke iso ẹnyụn̄ ẹtọn̄ọ enye ita.

Ke kpukpru emi akade iso, Peter do ke an̄wa okure. Edi okoneyo tuep, ntre mme owo ẹbara ikan̄. Nte mmọ ẹsụk ẹwebede ikan̄, ofụnan̄wan kiet ese Peter, ndien ọdọhọ: ‘Owo emi n̄ko okodu ye Jesus.’

Peter ọbọrọ, ‘Baba, n̄kodụhe!’

Ikata ke mme owo ẹdọhọ Peter ete enye okodu ye Jesus. Edi kpukpru ini Peter ete ke idịghe akpanikọ. Ke ọyọhọ ikata Peter etịn̄de emi, Jesus ọwọn̄ọde ese enye. Peter atua n̄kpọfiọk ke ndisu mme nsu oro, ndien enye adaha akatua.

Nte utịn ọtọn̄ọde ndiwọrọ ke Friday usenubọk, mme oku ẹda Jesus ẹka akwa itie mbono mmọ, efe San′he·drin. Mmọ ẹneme se mmọ ẹdinamde Jesus do. Mmọ ẹda enye ẹsọk Pontius Pilate, andikara district Ju·de′a.

Mme oku oro ẹdọhọ Pilate, ‘Emi edi idiọk owo. Ẹkpenyene ndiwot enye.’ Ke ama okobụp Jesus mbụme ama, Pilate ete: ‘Ami n̄kemeke ndikụt ndudue nnọ enye.’ Ndien Pilate ọnọ Jesus ẹsọk Herod An′ti·pas. Herod edi andikara Gal′i·lee, edi enye odu ke Jerusalem. Herod n̄ko ikemeke ndikụt ke Jesus anam idiọk ndomokiet, ntre enye afiak ọnọ enye ẹsọk Pilate.

Pilate oyom ndiyak Jesus ọnyọn̄. Edi mme asua Jesus ẹyom owo n̄kpọkọbi efen ọbọhọ utu ke Jesus. Owo emi edi owo n̄wo Bar·ab′bas. Idahaemi ekpere ndisịm ufọt uwemeyo ke Pilate adade Jesus ọwọrọ edi an̄wa. Enye ọdọhọ mme owo: ‘Ẹse Edidem Mbufo do!’ Edi ikpọ oku ẹfiori: ‘Men enye fep! Wot enye! Wot enye! Ntre Pilate ayak Bar·ab′bas ọbọhọ, edi mmọ ẹda Jesus ẹka ndiwot.

Ke ntọn̄ọ uwemeyo Friday, ẹkọn̄ Jesus ke eto. Afo ukemeke ndikụt mmọ ke ndise, edi ke n̄kan̄ Jesus mbiba, ẹwot inọ kiet kiet ke eto, esisịt ini mbemiso Jesus akpade, kiet ke otu mbon inọ oro ọdọhọ Jesus: ‘Ti mi ke ini afo odụkde obio ubọn̄ fo.’ Ndien Jesus ọbọrọ: ‘Mmọn̄wọn̄ọ nnọ fi nte afo eyedu ye ami ke Paradise.’

Nte oro idịghe utịbe un̄wọn̄ọ? Nte afo ọmọfiọk Paradise oro Jesus etịn̄de aban̄a? Mmọn̄ ke Paradise oro Abasi akanamde ke editọn̄ọ okodu? Ih, ke isọn̄. Ndien ke ini Jesus akarade nte edidem ke heaven, enye eyeda owo emi afiak edidu uwem man adara obufa Paradise ke isọn̄. Nte nnyịn ikemeke ndinem esịt mban̄a oro?

Matthew 26:57-75; 27:1-50; Luke 22:54-71; 23:1-49; John 18:12-40; 19:1-30.



Mme Mbụme

  • Anie enen̄ede anam ẹwot Jesus?
  • Nso ke mme apostle ẹnam ke ini mme adaiso ido ukpono ẹdade Jesus ẹwọrọ?
  • Nso itịbe ke ufọk Caiaphas oro edide akwa oku?
  • Ntak emi Peter adahade akatua?
  • Ke ẹma ẹkefiak ẹda Jesus ẹsọk Pilate, nso ke ikpọ oku ẹfiori?
  • Nso itịbe inọ Jesus ke ntọn̄ọ uwemeyo Friday, ndien nso ke enye ọn̄wọn̄ọ ndinam nnọ anamidiọk emi ẹkọn̄de ẹkpere enye?
  • Paradise oro Jesus eketịn̄de aban̄a edidu ke m̀mọ̀n̄?

Mme mbụme efen

Kpep N̄kpọ En̄wen

JESUS EDI USỤN̄ YE AKPANIKỌ YE UWEM

Ẹmen Jesus Ẹka Iso Annas, Ekem Ẹmen Ẹbịne Caiaphas

Ikpe oro Sanhedrin ẹkpede ẹnọ Jesus inenke.

JESUS EDI USỤN̄ YE AKPANIKỌ YE UWEM

Sanhedrin Ẹbiere Ikpe Jesus Ekem Ẹnọ Enye Ẹsọk Pilate

Mme adaiso ido ukpono mme Jew ẹwụt ke mmimọ iyom ẹwot Jesus.

JESUS EDI USỤN̄ YE AKPANIKỌ YE UWEM

Edidem Emi Mînyeneke Se Eduede Ọbọ Ufen ke Eto

Jesus ọn̄wọn̄ọ ọnọ owo n̄wo kiet emi ọkọkọn̄ọde ye enye ke eto ete ke enye oyodu ye imọ ke Paradise.

BECOME JEHOVAH'S FRIEND ACTIVITIES

Mụm John 3:16 ke Ibuot

Kpep se John 3:16 etịn̄de, ekem da enye kwọrọ ikọ.