Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 83: Mme Ibibene Jerusalem

Mbụk 83: Mme Ibibene Jerusalem
Mbonutom ke ẹfiak ẹbọp mme ibibene Jerusalem

SESE ofụri utom emi akade iso mi. Israel ke ẹnam utom ndibọp mme ibibene Jerusalem. Ke ini Edidem Neb·u·chad·nez′zar okosobode Jerusalem isua 152 ekebede, enye ama owụri mme ibibene onyụn̄ ọfọp mme itịm obio ke ikan̄. Israel ikafiakke ibọp mme ibibene oro ke akpa ini mmọ eketode Babylon ẹnyọn̄ edi.

Afo ese ete mme owo oro ẹkese didie ndidụn̄ mi ke uwak isua ye unana ibibene akande obio mmọ okụk? Mmọ ikesehe ite idu ke ifụre. Mme asua mmọ ẹkpekeme ndidụk mmem-mmem n̄n̄wana ye mmọ. Edi ke emi Ne·he·mi′ah ke akpatre an̄wam mmọ emi ndifiak mbọp mme ibibene oro. Nte ọmọfiọk mme Ne·he·mi′ah edi anie?

Ne·he·mi′ah edi owo Israel emi otode obio Shu′shan emi Mor′de·cai ye Esther ẹdụn̄de. Ne·he·mi′ah anam utom ke okụre edidem, ntre ana edi enye ekedi eti ufan Mor′de·cai ye Esther Ọbọn̄ an̄wan. Edi Bible idọhọke ite Ne·he·mi′ah akanam utom ọnọ ebe Esther, Edidem A·has·u·e′rus. Enye akanam utom ọnọ edidem efen, Edidem Ar·ta·xerx′es.

Ti, Ar·ta·xerx′es edi eti edidem oro ọkọnọde Ez′ra ofụri okụk oro ndida n̄ka Jerusalem n̄kafiak ndiọn̄ temple Jehovah. Edi Ez′ra ikọbọpke n̄wụre ibibene obio oro. Yak ise nte Ne·he·mi′ah akasan̄ade edi andinam utom emi.

Isua 13 ẹma ẹbe tọn̄ọ Ar·ta·xerx′es ọkọnọ Ez′ra okụk ndidiọn̄ temple oro. Ne·he·mi′ah idahaemi edi akama wine Edidem Ar·ta·xerx′es. Emi ọwọrọ nte ke enye ọnọ edidem wine esie, onyụn̄ otịm okụt ete baba owo kiet idomoke ndisịn ibọk n̄kpa nnọ edidem. Enye edi ata akpan utom.

Ọfọn, usen kiet eyeneka Ne·he·mi′ah Ha·na′ni ye mbon efen ẹto idụt Israel ẹdi ndise Ne·he·mi′ah. Mmọ ẹtịn̄ ẹnọ enye ẹban̄a mfịna oro nditọ Israel ẹnyenede, ye nte mme ibibene Jerusalem ẹsụk ẹdude ke n̄wụre. Emi ama anam Ne·he·mi′ah ọfụhọ etieti, ndien enye ọbọn̄ akam ọnọ Jehovah aban̄a enye.

Usen kiet edidem okụt nte Ne·he·mi′ah ọfụhọde, ndien obụp ete: ‘Ntak emi afo etiede mfụhọ mfụhọ?’ Ne·he·mi′ah ọdọhọ enye ete ke edi koro Jerusalem odude ke utọ idiọk idaha oro ye mme ibibene esie ẹwụrede. Edidem obụp ete ‘Nso ke afo oyom?’

Nehemiah ọnọ ndausụn̄ ke utom edibọp ibibene

Ne·he·mi′ah ọbọrọ ete, ‘Yak mi n̄ka Jerusalem, man n̄kọbọp mme ibibene oro.’ Edidem Ar·ta·xerx′es ọfọn ido etieti. Enye ọdọhọ ke Ne·he·mi′ah ekeme ndika, onyụn̄ an̄wam enye ndinyene eto ndida mbọp. Ibịghike Ne·he·mi′ah edi Jerusalem, enye etịn̄ ọnọ mbon oro aban̄a uduak esie. Mmọ ẹma ekikere oro, ẹnyụn̄ ẹdọhọ ẹte: ‘Yak itọn̄ọ ndibọp.’

Ke ini mme asua nditọ Israel ẹkụtde nte ibibene okon̄de, mmọ ẹdọhọ ete: ‘Nnyịn iyedọk ikowot mmọ, inyụn̄ itre utom edibọp oro.’ Edi Ne·he·mi′ah okop emi, onyụn̄ ọnọ mbon utom mme ofụt ye eduat. Ndien enye ọdọhọ ete: ‘Ẹkufehe mme asua nnyịn. Ẹn̄wana ẹnọ nditọ eka mbufo, nditọ mbufo, iban mbufo ye ufọk mbufo.’

Mmọ oro ẹnyene uko etieti. Mmọ ẹnịm n̄kpọ ekọn̄ mmọ ke mben̄idem uwemeyo ye okoneyo, ẹnyụn̄ ẹkaiso ẹbọp. Do ke usen 52 kpọt ẹma ẹkụre mme ibibene oro. Idahaemi mmọ ẹkeme ndidu ke ifụre ke esịt obio. Ne·he·mi′ah ye Ez′ra ẹkpep mmọ ibet Abasi, ndien mmọ ẹdat esịt.

Edi mme n̄kpọ isụk idịghe ukem nte ẹkedide mbemiso ẹkedade nditọ Israel nte mbon n̄kpọkọbi ẹka Babylon. Edidem Persia akara mmọ ndien mmọ ẹnyene ndinam n̄kpọ nnọ enye. Edi Jehovah ọn̄wọn̄ọ ete iyenọ obụfa edidem, n̄ko nte edidem emi eyeda emem ọsọk mme owo. Anie edi edidem emi? Didie ke enye edida emem edi ke isọn̄? N̄kpọ nte isua 450 ẹma ẹbe mbemiso ẹkopde n̄kpọ efen ekededi ẹban̄a emi. Ekem ata akpan emana nsekeyen ada itie. Edi oro edi mbụk efen.

Nehemiah, mme ibuot 1 osim 6.



Mme Mbụme

  • Eketie nditọ Israel didie ke idem ndidụn̄ ke Jerusalem oro owo mîbọpke ibibene ikanade?
  • Anie edi Nehemiah?
  • Nso utom ke Nehemiah anam, ndien ntak emi enye edide akpan utom?
  • Nso etop anam Nehemiah ofụhọ, ndien nso ke enye anam?
  • Didie ke Edidem Artaxerxes ọfọn ido ye Nehemiah?
  • Didie ke Nehemiah odiomi ndinam utom ubọpn̄kpọ oro man mme asua nditọ Israel ẹkûkeme ndikpan enye?

Mme mbụme efen