Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 82: Mordecai ye Esther

Mbụk 82: Mordecai ye Esther

YAK ifiak edem isua ifan̄ mbemiso Ez′ra akakade Jerusalem. Mor′de·cai ye Esther ẹdi ata mme ọwọrọiso nditọ Israel ke obio ubọn̄ Persia. Esther edi ọbọn̄ an̄wan, ndien eyeneka ete esie Mor′de·cai edi udiana edidem ke odudu. Yak ise nte emi akasan̄ade.

Ete ye eka Esther ẹkekpa ke enye edide ata ekpri, ntre Mor′de·cai ọkọbọk enye. A·has·u·e′rus, edidem Persia, enyene ufọk ubọn̄ ke obio Shu′shan, ndien Mor′de·cai edi asan̄autom esie kiet. Ọfọn, usen kiet n̄wan edidem Vash′ti otụt utọn̄, ntre edidem emek obufa n̄wan ndidi n̄wan ọbọn̄. Nte ọmọfiọk n̄wan emi enye emekde? Ih, ediye n̄kaiferi Esther.

Haman ayat esịt ye Mordecai

Nte omokụt owo ntan̄idem emi mme owo ẹnuhọde ẹnọ? Emi edi Ha′man. Enye edi ata akpan owo ke Persia. Ha′man oyom Mor′de·cai, emi afo okụtde etiede mi, ọnuhọ ọnọ enye n̄ko. Edi Mor′de·cai idinamke oro. Enye ikereke ke enen ndinuhọ nnọ utọ idiọk owo oro. Emi otịm ayat Ha′man esịt. Ntre emi ke enye anam.

Ha′man osu nsu ọnọ edidem aban̄a nditọ Israel. Enye ọdọhọ, ‘Mmọ edi ndiọi owo emi minịmke mme ibet fo.’ ‘Akpana ẹwot mmọ.’ A·has·u·e′rus ifiọkke ite ke Esther n̄wan esie edi owo Israel. Ntre enye akpan̄ utọn̄ ọnọ Ha′man, ndien anam ẹnam ibet nte ẹwot kpukpru nditọ Israel ke usen kiet.

Ke Mor′de·cai okopde aban̄a ibet emi, esịt otịm otịmede enye. Enye ọdọn̄ etop ọnọ Esther: ‘Ana afo asian edidem, onyụn̄ eben̄e enye ete anyan̄a nnyịn.’ Atuaha ye ibet ke Persia ndikụt edidem ibọhọke ẹkotde fi. Edi Esther odụk aka ke owo mikotke. Edidem anyan esan̄ gold esie ọnọ enye, emi ọwọrọde nte ke inaha ẹwot enye. Esther okot edidem ye Ha′man edi akamba udia. Do edidem obụp Esther se mfọn enye oyomde oto imọ. Esther ọdọhọ ete iyesian enye ke enye ye Ha′man ẹdidide udia ke udiana usen.

Ke udia oro Esther asian edidem: ‘Ẹmọn̄ ẹsobo iman mi ye ami.’ Edidem ayat esịt. Enye obụp, ‘Anie odomo ndinam utọ n̄kpọ oro?’

Esther ọbọrọ, ‘Owo asua emi, idiọk Ha′man emi!’

Esther ọbọn̄ an̄wan odori Haman ikọ

Ke emi edidem enen̄ede ayat esịt. Enye owụk ete ẹwot Ha′man. Ke oro ebede, edidem anam Mor′de·cai edi udiana ọnọ enye ke idemesie. Mor′de·cai ndien okụt ete ke ẹnam obufa ibet oro ayakde nditọ Israel ẹn̄wana ẹban̄a uwem mmọ ke usen oro akanade ẹwot mmọ. Koro Mor′de·cai edide utọ ọwọrọiso owo oro ke emi, ediwak owo ẹn̄wam nditọ Israel, ndien mmọ ẹbọhọ mme asua mmọ.

N̄wed Esther eke Bible.



Mme Mbụme

  • Mmanie ẹdi Mordecai ye Esther?
  • Ntak emi Edidem Ahasuerus oyomde obufa n̄wan, ndien anie ke enye emek?
  • Anie edi Haman, ndien nso inam enye otịm ayat esịt?
  • Nso ibet ke ẹnam, ndien nso ke Esther anam ke ama ọkọbọ etop oto Mordecai?
  • Nso itịbe inọ Haman ye Mordecai?
  • Didie ke ẹnam nditọ Israel ẹbọhọ mme asua mmọ?

Mme mbụme efen

Kpep N̄kpọ En̄wen

Kad Mbre Bible Aban̄ade Esther

Didie ke uko Esther akanyan̄a owo? Mịn̄ kad mbre Bible emi da kpep n̄kpọ ban̄a Esther.