Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 81: Ndibuọt Idem ke Un̄wam Abasi

Mbụk 81: Ndibuọt Idem ke Un̄wam Abasi

N̄KPỌ nte mme owo 50,000 ẹnam anyan isan̄ ẹto Babylon ẹka Jerusalem. Edi ke mmọ ẹsịmde, Jerusalem edi akamba n̄wure. Owo baba kiet idụn̄ke do. Ana nditọ Israel ẹfiak ẹbọp kpukpru n̄kpọ obufa.

Akpa n̄kpọ kiet mmọ ẹnamde edi ndibọp itie uwa. Emi edi itie mmọ ẹkemede ndinam uwa unam, mme mme enọ nnọ Jehovah. Ọfiọn̄ ifan̄ ke ukperedem nditọ Israel ẹtọn̄ọ ndibọp temple. Edi mme asua ẹdụn̄de ke mme obio ẹkperede iyomke nditọ Israel ẹbọp enye. Ntre mmọ ẹdomo ndidịghe mmọ ndinam mmọ ẹtre. Ke akpatre, mme asua ẹmi ẹnam obufa edidem Persia anam ibet etre utom edibọp.

Ediwak isua ẹbe. Ke emi osịm isua 17 tọn̄ọ nditọ Israel ẹkekpọn̄ Babylon. Jehovah ọdọn̄ mme prọfet esie Hag′gai ye Zech·a·ri′ah ẹsian mme owo ẹfiak ẹtọn̄ọ ndibọp. Mme owo ẹbuọt idem ke un̄wam Abasi, ndien mmọ ẹkop uyo mme prọfet. Mmọ ẹtọn̄ọ ndifiak mbọp, okposụk ibet ọdọhọde mmọ ẹkunam oro.

Ntre akwa owo Persia ẹkotde Tat′te·nai edibụp nditọ Israel unen mmọ ẹnyenede ndibọp temple. Nditọ Israel ẹsian enye ẹte ke mmimọ ikodude ke Babylon, Edidem Cy′rus ama asian mmimọ: ‘Eka Jerusalem ke emi, ekebọp temple Jehovah, Abasi mbufo.’

Tat′te·nai ọdọn̄ n̄wed ẹka Babylon onyụn̄ obụp mme Cy′rus emi akpade ke emi ama enen̄ede etịn̄ oro. Ibịghike n̄wed otode obufa edidem Persia edisịm. Enye etịn̄ ke Cy′rus ama enen̄ede ọdọhọ. Ntre, edidem ewet: ‘Yak nditọ Israel ẹbọp temple Abasi mmọ. Mmowụk fi an̄wam mmọ.’ Ke n̄kpọ nte isua inan̄, ẹkụre temple, ndien nditọ Israel ẹtịm ẹnem esịt.

Ediwak isua efen ẹbe. Edi n̄kpọ nte isua 48 ke emi nte ẹkẹkụre temple. Mme owo ke Jerusalem ẹbuene, ndien obio ye temple Abasi itịmke iye. Ko ke Babylon, owo Israel, Ez′ra, ọfiọk aban̄a udọn̄ ndikọdiọn̄ temple Abasi. Ntre nte ọmọfiọk se enye anamde?

Ez′ra aka ndikụt Ar·ta·xerx′es, edidem Persia, ndien eti edidem emi ọnọ Ez′ra ediwak enọ ndida mfiak ke Jerusalem. Ez′ra eben̄e nditọ Israel ke Babylon ẹn̄wam imọ imen mme enọ emi ika Jerusalem. N̄kpọ nte mme owo 6,000 ẹtẹ iyeka. Mmọ ẹnyẹne ekese silver ye gold ye mme n̄kpọ uto eken ndikama.

Ez′ra okop mfịna, koro mme idiọk owo ẹdude ke usụn̄. Mme owo ẹmi ẹkeme ndibọ silver ye gold mmọ, ẹnyụn̄ ẹwot mmọ. Ntre, Ez′ra okot mme owo ọtọkiet, nte afo okụtde ke ndise emi. Do mmọ ẹbọn̄ akam ẹnọ Jehovah ndikpeme mmọ ke anyan isan̄ mmọ ndifiak ke Jerusalem.

Ezra ye mme owo ke ẹbọn̄ akam

Jehovah ekpeme mmọ. Ndien ke isan̄ ọfiọn̄ inan̄ ebede, mmọ ẹsịm Jerusalem ke ifụre. Nte emi iwụtke ite Jehovah ekeme ndikpeme mmọ oro ẹbuọtde idem ye enye ẹyom un̄wam?

Ezra mme ibuot 2 osim 8.



Mme Mbụme

  • Owo ifan̄ ẹnam anyan isan̄ ẹto Babylon ẹka Jerusalem, edi nso ke mmọ ẹkụt ke ini mmọ ẹsịmde?
  • Nso ke nditọ Israel ẹtọn̄ọ ndibọp ke ẹma ẹkesịm, edi nso ke mme asua mmọ ẹnam?
  • Mmanie ẹdi Haggai ye Zechariah, ndien nso ke mmọ ẹsian mme owo?
  • Ntak emi Tattenai ọdọn̄de n̄wed ẹka Babylon, ndien nso ibọrọ ke ẹnọ enye?
  • Nso ke Ezra anam ke ini enye ọfiọkde aban̄a udọn̄ ndikọdiọn̄ temple Abasi?
  • Ke ndise emi, nso ke Ezra ọbọn̄ akam eben̄e, didie ke ẹbọrọ akam esie, ndien nso ke emi ekpep nnyịn?

Mme mbụme efen