Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 79: Daniel ke Obube Mme Lion

Mbụk 79: Daniel ke Obube Mme Lion

OH, OH! etie nte Daniel odu ke ekese afanikọn̄. Edi mme lion inamke enye idiọk! Nte ọmọfiọk ntak? Mmanie ẹsịn Daniel mi ye kpukpru mme lion emi? Yak idụn̄ọde ifiọk.

Ke emi, edidem Babylon edi owo ẹkotde Da·ri′us. Enye otịm ama Daniel koro Daniel otịmde ọfọn ido onyụn̄ enyene ọniọn̄. Da·ri′us emek Daniel edi akpan andikara ke obio ubọn̄ esie. Emi anam mbon efen ke obio ubọn̄ ẹfụbe Daniel, ntre emi ke mmọ ẹnam.

Darius

Mmọ ẹtiene Da·ri′us ẹkedọhọ: ‘O edidem, nnyịn imonyịme afo anam ibet ete baba owo okubọn̄ akam ke usen 30 ọnọ abasi ekededi, ibọhọke afo, O edidem. Owo ekededi omiomde, yak ẹtop enye ẹsịn ke obube mme lion.’ Da·ri′us ifiọkke ntak mmọ emi ẹyomde ẹnam ibet emi. Edi enye ekere ke edi eti ekikere, ntre enye esịn ibet ke n̄wed. Ke emi, owo ikemeke ndikpụhọde ibet oro.

Ke Daniel ọfiọkde aban̄a ibet oro, enye ọnyọn̄ ọkọbọn̄ akam nte enye esinamde. Mme idiọk owo oro ẹma ẹfiọk ete Daniel iditreke ndibọn̄ akam nnọ Jehovah. Mmọ ẹdara koro etie nte ediomi mmọ ndiwot Daniel ke ọfọn.

Ke Edidem Da·ri′us ọfiọkde ntak mbon emi ẹkẹyomde ẹnam ibet emi, enye otịm okop mbọm. Edi enye ikemeke ndikpụhọde ibet oro, ntre ana enye owuk ẹtop Daniel ẹsịn ke obube lion. Edi edidem asian Daniel: ‘Mmodori enyịn nte Abasi emi afo okponode eyenyan̄a fi.’

Esịt otịm afịna Da·ri′us, enye ikemeke ndide okoneyo oro. Ndan̄nsiere, enye efehe aka obube mme lion. Afo emekeme ndikụt enye do. Enye ofiori: ‘Daniel, asan̄autom Abasi uwem! Nte Abasi emi afo okponode ekeme ndinyan̄a fi ke ubọk mme lion?’

Daniel ke obube mme lion

Daniel ọbọrọ, ‘Abasi ama ọdọn̄ angel esie ndien okịbi mme lion inua ntre mmọ inamke mi idiọk.’

Edidem otịm enem esịt. Enye owuk ete ẹsio Daniel ke obube oro. Do enye anam ẹtop mme idiọk owo oro ẹkẹdomode ndiwot Daniel ẹnọ mme lion. Idem mbemiso mmọ ẹsịmde isọn̄ obube, mme lion ẹmụm mmọ ẹnyụn̄ ẹnuak kpukpru ọkpọ mmọ.

Edidem Da·ri′us ndien ewet n̄wed ọnọ ofụri owo ke obio ubọn̄ esie: ‘Ami mmowụk nte yak kpukpru owo ẹbak Abasi Daniel. Enye anam ikpọ utịbe n̄kpọ. Enye akanyan̄a Daniel osio mme lion ke inua.’

Daniel 6:1-28.



Mme Mbụme

  • Anie edi Darius, ndien didie ke enye ada Daniel?
  • Nso ke ndusụk mbon ufụp ẹdọhọ Darius anam?
  • Nso ke Daniel anam ke ini enye ọfiọkde aban̄a obufa ibet oro?
  • Ntak emi esịt otịmde afịna Darius tutu enye ikemeke ndide, ndien nso ke enye anam ke ndan̄nsiere?
  • Nso ke Daniel ọbọrọ Darius?
  • Nso itịbe inọ mme idiọk owo oro ẹkedomode ndiwot Daniel, ndien nso ke Darius ewet ọnọ ofụri owo ke obio ubọn̄ esie?

Mme mbụme efen

Kpep N̄kpọ En̄wen

Kad Mbre Bible Aban̄ade Daniel

Nso ikanam ẹtop Daniel ẹsịn ke obube lion? Mịn̄ kad mbre Bible emi da kpep n̄kpọ efen ban̄a Daniel.