Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 76: Esobo Jerusalem

Mbụk 76: Esobo Jerusalem

ISUA 10 ebe nte Edidem Neb·u·chad·nez′zar akada kpukpru mbon nta n̄wed nditọ Israel aka Babylon. Ndien ke emi, se se itịbede! Ẹfọp Jerusalem ẹduọk. Ndien ke ẹda nditọ Israel oro mikowotke ẹka n̄kpọkọbi ke Babylon.

Ti, emi ke mme prọfet Jehovah ẹketọt ke eyetịbe ke mme owo mikpụhọkede idiọk usụn̄ mmọ. Edi nditọ Israel ikọnọhọ utọn̄ iban̄a item mme prọfet. Mmọ ẹkaiso ẹtuak ibuot ẹnọ mme nsunsu abasi utu ke Jehovah. Ntre odot ẹnọ mbon emi ufen. Nnyịn imọfiọk emi koro Ezekiel prọfet Abasi asian nnyịn aban̄a ndiọi n̄kpọ oro nditọ Israel ẹkenamde.

Nte ọmọfiọk owo emi Ezekiel edide? Enye edi kiet ke otu n̄kparawa oro Edidem Neb·u·chad·nez′zar akadade aka Babylon ke se ikande isua duop mbemiso akwa nsobo emi. Ẹkeda Daniel ye mme ufan esie ita, Sha′drach, Me′shach ye A·bed′ne·go ẹka Babylon ke ukem ini oro.

Ke Ezekiel osụk odude ke Babylon, Jehovah owụt enye mme idiọkn̄kpọ emi ẹketịbede ko ke Jerusalem ke temple. Jehovah anam emi oto utịbe n̄kpọ. Ezekiel osụk enen̄ede odu ke Babylon, edi Jehovah ayak enye okụt kpukpru se itịbede ke temple. Ndien se Ezekiel okụtde enyene ndịk!

Jehovah asian Ezekiel ete ‘Sese mbubiam n̄kpọ emi mme owo ẹnamde mi ke temple. Sese mme ibibene ẹyọhọde ye mme ndise urụkikọt ye mme unam eken. Ndien sese nditọ Israel ẹtuakde ibuot ẹnọ mmọ!’ Ezekiel ekeme ndikụt mme n̄kpọ ẹmi ndien enye ewet se itịbede.

Mbon n̄kpọkọbi ẹkpọn̄ Jerusalem

Jehovah obụp Ezekiel, ‘Nte omokụt se mbiowo ufọk Israel ẹnamde ke ndịbe?’ Ih, enye ekeme n̄ko ndikụt emi. Owo 70 ẹdu, ndien mmọ kpukpru ẹtuak ibuot ẹnọ mme nsunsu abasi. Mmọ ke ẹdọhọ: ‘Jehovah ikwe nnyịn. Enye ọkpọn̄ isọn̄ emi.’

Ekem Jehovah owụt Ezekiel ndusụk iban ke inua otop edere temple. Mmọ ke ẹtie do ẹkpono nsunsu abasi Tam′muz. Ndien sese irenowo oro ke inua otop temple Jehovah. N̄kpọ nte owo 25 ke mmọ ẹdi. Ezekiel okụt mmọ. Mmọ ke ẹnuhọ ẹnọ usiaha utịn, ẹkpono utịn!

Jehovah ete, ‘Mmọ ẹmi ikponoke mi.’ ‘Mmọ ẹnam mme idiọkn̄kpọ kpọt ndien ẹdi mi ke temple ẹdinam mmọ!’ Ntre Jehovah ọn̄wọn̄ọ ete: ‘Mmọ ẹyekụt ubiak iyatesit mi. Ndien ndituaha mmọ mbọm ke ẹsobode mmọ.’

Edi n̄kpọ nte isua ita kpọt ke Jehovah ama okowụt Ezekiel mme n̄kpọ ẹmi ke nditọ Israel ẹsọn̄ ibuot ye Edidem Neb·u·chad·nez′zar. Ntre enye adaha ndin̄wana ye mmọ. Ke isua kiet ye ubak ẹma ẹkebe, mbon Babylon ẹwụri ibibene Jerusalem ẹnyụn̄ ẹfọp obio oro ẹduọk ke isọn̄. Ẹwot ekese owo ẹnyụn̄ ẹda eken ẹka Babylon nte mbon n̄kpọkọbi.

Ntak Jehovah ayakde enyene ndịk nsobo emi otịbe ọnọ nditọ Israel? Ih, koro mmọ ikakpan̄ke utọn̄ inọ Jehovah, n̄ko mmọ ikanamke mme ibet esie. Emi owụt nte edide akpan n̄kpọ ọnọ nnyịn kpukpru ini ndinam se Abasi ọdọhọde.

Ke mbemiso, esisịt ibat owo ke ẹyak ẹtie ke isọn̄ Israel. Edidem Neb·u·chad·nez′zar onịm owo Jew ẹkotde Ged·a·li′ah ndise mbon emi. Edi ndien usụk nditọ Israel ẹwot Ged·a·li′ah. Ke emi, mme owo ẹkop ndịk ẹte mbon Babylon ẹyedisobo mmọ kpukpru sia idiọkn̄kpọ emi otịbede. Ntre mmọ enyịk Jeremiah etiene mmọ, ndien mmọ ẹfehe ẹka Egypt.

Emi anam obio Israel inyeneke owo baba kiet. Ke isua 70, baba owo idụn̄ke ke obio. Enye ana ukpọk ofụri ofụri. Edi Jehovah ọn̄wọn̄ọ ete iyeda ikọt imọ ifiak idi ke isua 70 ẹbede. Kan̄a, nso itịbe inọ ikọt Abasi ke obio Babylon emi ẹdade mmọ ẹka? Yak ise.

2 Ndidem 25:1-26; Jeremiah 29:10; Ezekiel 1:1-3; 8:1-18.



Mme Mbụme

  • Nso itịbe inọ Jerusalem ye nditọ Israel emi ẹwụtde ke ndise emi?
  • Anie edi Ezekiel, ndien nso mme enyene-ndịk n̄kpọ ke Jehovah owụt enye?
  • Nso ke Jehovah ọn̄wọn̄ọ ndinam ke ntak oro nditọ Israel mîkponoke enye?
  • Nso ke Edidem Nebuchadnezzar anam ke nditọ Israel ẹma ẹkesọn̄ ibuot ye enye?
  • Ntak emi Jehovah ayakde enyene-ndịk nsobo emi etịbe ọnọ nditọ Israel?
  • Didie ke obio Israel mînyeneke owo baba kiet, ndien ke isua ifan̄?

Mme mbụme efen