Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 75: N̄kparawa Inan̄ ke Babylon

Mbụk 75: N̄kparawa Inan̄ ke Babylon

EDIDEM Neb·u·chad·nez′zar ada kpukpru nti mme ọfiọkn̄wed nditọ Israel aka Babylon. Ekem, edidem emek ata ndiye n̄kparawa ẹfiọkde n̄kpọ ẹkan ke otu mmọ. Inan̄ ke otu mmọ ẹdi nditọ iren oro afo okụtde mi. Kiet edi Daniel, ndien ita eken, mbon Babylon ẹkot Sha′drach, Me′shach ye A·bed′ne·go.

Neb·u·chad·nez′zar odiomi ndikpep n̄kparawa emi ẹnam n̄kpọ ke ufọk ubọn̄ esie. Ke ẹma ẹkekpep ke isua ita, enye eyemek sụk mme ata asian n̄kan ndin̄wam enye ndikan mme mfịna. Edidem oyom n̄kparawa emi ẹkop idem ẹnyụn̄ enyene nsọn̄idem nte ekpepde mmọ. Ntre enye owụk mme asan̄autom esie ẹnọ mmọ kpukpru ukem nti udia oro imọ ye ubon imọ idiade.

Daniel, Shadrach, Meshach, ye Abednego ke ẹnam se mmọ ẹnịmde ke akpanikọ an̄wan̄a

Sese akparawa Daniel. Nte ọmọfiọk se enye ọdọhọde etubom mme asan̄autom Neb·u·chad·nez′zar, Ash′pe·naz? Daniel ke asian enye ete imọ iyomke ndidia nti udia ẹtode okpokoro edidem. Edi Ashpe·naz okop mfịna. Enye ete, ‘edidem ebiere se mbufo edidiade edinyụn̄ ẹn̄wọn̄de.’ ‘Ndien ke mbufo mikopke nsọn̄idem nte n̄kparawa eken, enye ekeme ndiwot mi.’

Ntre Daniel etiene owo ukpeme kiet oro Ash′pe·naz onịmde ese enye ye ufan esie ita. Enye ete, ‘Mbọk sịn nnyịn ke udomo ke usen 10.’ ‘Nọ nnyịn ikọn̄ in̄wan̄ idia ye mmọn̄ in̄wọn̄. Do, domo nnyịn ye n̄kparawa eken ediade udia edidem, ndien se mme mmanie ẹfọn ẹkan.’

Andikpeme onyịme emi. Ndien ke usen 10 oro ẹsịmde, Daniel ye mme ufan esie ẹkop idem ẹkan kpukpru n̄kparawa eken. Ntre, owo ukpeme ayak mmọ ẹkaiso ndidia ikọn̄ in̄wan̄ utu ke udia edidem.

Ke utịt isua ita, ẹda kpukpru n̄kparawa owo ẹsọk Neb·u·chad·nez′zar. Ke ẹma ẹketịn̄ ikọ ẹnọ mmọ kpukpru, edidem okụt Daniel ye mme ufan esie ita ẹfiọkde n̄kpọ ẹkan kpukpru. Ntre enye onịm mmọ ndin̄wam enye ke ufọk ubọn̄ esie. Ndien ini ekededi edidem obụpde Daniel, Sha′drach, Me′shach ye A·bed′ne·go mme mbụme, mme ọnọde mmọ n̄kpọsọn̄ mfịna, mmọ ẹfiọk n̄kpọ utịm ike-10 ẹkan mme oku mmọ mme mme ọfiọkn̄kpọ owo mmọ.

Daniel 1:1-21.



Mme Mbụme

  • Mmanie ẹdi n̄kparawa inan̄ emi ke ndise, ndien ntak emi mmọ ẹdude ke Babylon?
  • Nso ke Nebuchadnezzar odiomi ọnọ n̄kparawa inan̄ emi, ndien nso ke enye owụk mme asan̄autom esie?
  • Nso eben̄e ke Daniel esịn aban̄a udia ye edin̄wọn̄ n̄kpọ esie ye eke mme ufan esie ita?
  • Ke ẹma ẹkedia ikọn̄ in̄wan̄ ke usen duop, Daniel ye mme ufan esie ita ẹtie didie ke ẹmende ẹdomo ye n̄kparawa eken?
  • Daniel ye mme ufan esie ita ẹsan̄a didie ẹdidu ke ufọk ubọn̄ edidem, ndien ke nso usụn̄ ke mmọ ẹfọn ẹkan mme oku ye mme ọfiọkn̄kpọ owo?

Mme mbụme efen