Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 73: Akpatre Eti Edidem Israel

Mbụk 73: Akpatre Eti Edidem Israel

JOSIAH edi isua itiaita kpọt ke akabarede edidem esien iba eke usụk Israel. Emi abak akaha owo ndidi edidem. Ntre ke mbemiso n̄kani owo ẹn̄wam enye ndikara idụt oro.

Ke Jo·si′ah ama ekedi edidem ke isua itiaba enye ọtọn̄ọ ndiyom Jehovah. Enye etiene uwụtn̄kpọ nti ndidem nte David, Je·hosh′a·phat ye Hez·e·ki′ah. Do, ke enye osụk edide ekpri akparawa, Jo·si′ah anam n̄kpọ uko.

Edidem Josiah ye ikọt esie ke ẹnuak mme ndem

Ke anyan ini, ekese nditọ Israel ẹtịm ẹdiọk. Mmọ ẹkpono mme nsunsu abasi. Mmọ ẹnuhọ ẹnọ mme ndem. Ntre Jo·si′ah ye ikọt esie ẹwọrọ ẹtọn̄ọ ndision̄o nsunsu utuak ibuot mfep ke isọn̄. Emi edi akamba utom koro ediwak owo ẹkponode mme nsunsu abasi. Afo emekeme ndikụt Jo·si′ah ye ikọt esie ẹnuakde mme ndem mi.

Ke oro ebede, Jo·si′ah onịm owo ita ndise mban̄a edidiọn̄ temple. Ẹbọ mme owo okụk ẹnọ mbon emi ndikpe nnọ utom oro ẹnamde. Ke mmọ ẹnamde utom ke temple, Hil·ki′ah akwa oku okụt ata akpan n̄kpọ do. Edi ukem n̄wed ibet emi Jehovah akanamde Moses ewet ata anyan ini ko. Enye ama osop ediwak isua.

Ẹda n̄wed emi ẹsọk Jo·si′ah, ndien enye ete ẹkot ẹnọ imọ. Nte enye okopde, Jo·si′ah ekeme ndikụt nte mme owo inịmke ibet Jehovah. Enye otịm ọfụhọ aban̄a emi, ntre enye awai mme ọfọn̄ esie, nte afo ekemede ndikụt mi. Enye ete: ‘Jehovah ayat esịt ye nnyịn, koro mme ete nnyịn mikonịmke mme ibet ewetde ke n̄wed emi.’

Shaphan ye Edidem Josiah

Jo·si′ah owụk Hil·ki′ah akwa oku oyom se Jehovah oyomde ndinam ye mmọ. Hil·ki′ah etiene n̄wan oro Hul′dah, emi edide prọfet an̄wan okobụp enye. Enye ọnọ enye ẹtop emi oto Jehovah ndida nsọk Jo·si′ah: ‘Jerusalem ye kpukpru mme owo ẹyebọ ufen koro mmọ ẹkponode mme nsunsu abasi ndien isọn̄ ọyọhọ ye idiọk. Edi koro afo, Jo·si′ah anamde eti, ufen emi ididịghe tutu afo akpa.’

2 Chronicles 34:1-28.



Mme Mbụme

  • Josiah edi isua ifan̄ ke ini enye akabarede edidem, ndien nso ke enye ọtọn̄ọ ndinam ke ama ekedi edidem ke isua itiaba?
  • Ke akpa ndise emi, nso ke Josiah anam?
  • Nso ke akwa oku okụt ke ini mme owo ẹdiọn̄de temple?
  • Ntak emi Josiah awaide mme ọfọn̄ esie?
  • Nso etop otode Jehovah ke Huldah prọfet an̄wan ọnọ Josiah?

Mme mbụme efen