Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 70: Jonah ye Akamba Iyak

Mbụk 70: Jonah ye Akamba Iyak

SESE owo oro ke esịt mmọn̄. Enye odu ke akwa mfịna, nte idụhe? Iyak oro ọmọn̄ emen enye! Nte ọmọfiọk owo oro enye edide? Enye ekere Jo′nah. Yak ise nte enye akasan̄ade odụk akwa mfịna ntre.

Jo′nah edi prọfet Jehovah. Ibịghike nte E·li′sha akakpa, Jehovah ọdọhọ Jo′nah ete: ‘Ka akwa obio Nin′e·veh. Idiọkn̄kpọ mbon oro ẹdude do okpon etieti, ndien nyom afo etịn̄ ọnọ mmọ aban̄a enye.’

Jonah ye akamba iyak

Edi Jo′nah iyomke ndika. Ntre enye odụk ubom oro akade ebiet efen ọkpọn̄ Nin′e·veh. Jehovah inemke esịt ye Jo′nah ke ndifehe. Do Enye anam akwa oyobio otịbe. Enye ọdiọk tutu ubom oyom ndisịp. Mme awat ubom ẹkop ndịk etieti, do mmọ ẹseme ẹkot mme abasi mmọ ndin̄wam.

Ke akpatre Jo′nah ọdọhọ mmọ ete: ‘Ami n̄kpono Jehovah Abasi emi akanamde enyọn̄ ye isọn̄. Ndien mfehe n̄kpọn̄ ndinam se Jehovah ọkọdọhọde mi nnam.’ Do mme awat ubom ẹbụp ẹte: ‘Nnyịn inam fi nso man oyobio emi etre?’

Jo′nah ọdọhọ ete, ‘Ẹduọk mi ke inyan̄, ndien inyan̄ eyefiak ana sụn̄.’ Mme awat ubom iyomke ndinam oro, edi nte oyobio osụk ọdiọkde akan, mmọ ndien ẹsio Jo′nah ke ubom ẹduọk. Idahaoro oyobio odop, ndien inyan̄ afiak ana sụn̄.

Nte Jo′nah eden̄ide ke mmọn̄, akamba iyak emen enye emen. Edi enye ikpaha. Enye odu ke idịbi iyak oro okoneyo ita ye uwemeyo ita. Jo′nah eseme etieti ke nditre ndikop uyo Jehovah nnyụn̄ n̄ka Nin′e·veh. Ntre nte ọmọfiọk se enye anamde?

Jo′nah ọbọn̄ akam ọnọ Jehovah oyom un̄wam. Ekem Jehovah anam iyak oro ọkọkpọhi enye onịm ke obot. Ke oro ebede Jo′nah aka Nin′e·veh. Nte emi ikpepke nnyịn nte edide akpan n̄kpọ ndinam sededi oro Jehovah ọdọhọde?

N̄wed Jonah eke Bible.



Mme Mbụme

  • Anie edi Jonah, ndien nso ke Jehovah ọdọhọ enye?
  • Sia Jonah mîyomke ndika ebiet oro Jehovah ọdọhọde enye aka, nso ke Jonah anam?
  • Nso ke Jonah ọdọhọ mme awat ubom ẹnam man oyobio etre?
  • Nte afo ekemede ndikụt ke ndise emi, nso itịbe ke ini Jonah eden̄ide ke mmọn̄?
  • Jonah odu usen ifan̄ ke idịbi iyak, ndien nso ke enye anam do?
  • M̀mọ̀n̄ ke Jonah aka ke akamba iyak oro ama ọkọkpọhi enye, ndien nso ke emi ekpep nnyịn?

Mme mbụme efen

Kpep N̄kpọ En̄wen

Kad Mbre Bible Aban̄ade Jonah

Mme edu Jehovah ewe ke mbụk Jonah ekpep fi?