Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 69: N̄kaiferi An̄wam Eren Uko

Mbụk 69: N̄kaiferi An̄wam Eren Uko

NTE ọmọfiọk se ekpri n̄kaiferi emi etịn̄de? Enye asian n̄wan oro aban̄a E·li′sha prọfet Jehovah, ye mme utịbe n̄kpọ oro Jehovah an̄wamde enye ndinam. N̄wan oro ifiọkke iban̄a Jehovah, sia midịghe owo Israel. Yak ise, ndien, ntak n̄kaiferi emi odude ke ufọk n̄wan oro.

N̄wan oro edi owo Syria. Ebe esie edi Na′a·man, etubom mbon ekọn̄ Syria. Udịm ekọn̄ Syria ẹma ẹmụm ekpri n̄kaiferi Israel emi ẹda ẹsọk n̄wan Na′a·man ndidi eyen ufọk esie.

N̄wan Naaman ye eyen ufọk esie

Na′a·man enyene idiọk udọn̄ọ ẹkotde akpa mfia. Udọn̄ọ emi ekeme ndinam obụkidem owo eyemede. Ntem se n̄kaiferi emi etịn̄de ọnọ n̄wan Na′a·man edi: ‘Etufọk mi ekpetienede prọfet Jehovah ke Israel. Enye ọkpọkọk enye akpa mfia esie.’ Ekem ẹtịn̄ emi ẹnọ ebe eyenan̄wan oro.

Na′a·man otịm oyom udọn̄ọ emi okụre imọ; ntre enye ebiere ndika Israel. Ke enye osịmde do, enye aka ufọk E·li′sha. E·li′sha ọdọn̄ asan̄autom esie ọdọhọ Na′a·man ete, ekeyere ke Akpa Jordan ikatiaba. Emi ayat Na′a·man esịt etieti, ndien enye ete: ‘Mme akpa ko ke ufọk ẹfọn ẹkan akpa ekededi ke Israel!’ Ke ama eketịn̄ emi, Na′a·man ọnyọn̄.

Edi asan̄autom esie kiet ọdọhọ enye ete: ‘Ete, edieke E·li′sha ọkpọdọhọde anam se isọn̄de, akpanam. Ke emi ntak muyereke nte enye ọdọhọde?’ Na′a·man okop ọnọ asan̄autom esie onyụn̄ aka ekenyịni idemesie ke Akpa Jordan, ikatiaba. Ke enye anamde, obụkidem esie akabade ọsọn̄ onyụn̄ okop idem.

Na′a·man enem esịt etieti. Enye edidọhọ E·li′sha ete: ‘Ke emi ke mfiọk nte Abasi Israel edi n̄kukụre Abasi akpanikọ ke ofụri isọn̄. Ntre, mbọk, bọ mi enọ emi.’ Edi E·li′sha ọbọrọ ete: ‘Baba, ndibọhọ.’ E·li′sha ọfiọk ke inenke imọ ndibọ enọ oro, koro edi Jehovah akanam udọn̄ọ okụre Na′a·man. Edi asan̄autom E·li′sha, Ge·ha′zi oyom mme enọ oro ke idemesie.

Ntre emi ke Ge·ha′zi anam. Ke Na′a·man ọnyọn̄de, Ge·ha′zi efehe okosịm enye. Ge·ha′zi ọdọhọ, ‘E·li′sha ọkọdọn̄ mi nsian fi nte imọ ikpama ndusụk enọ fo ndida nnọ mme ufan emi esụk edide. Ke akpan, emi edi nsu. Edi Na′a·man ifiọkke ite ke edi nsu; ntre enye ọnọ Ge·ha′zi usụk mme n̄kpọ oro.

Ke Ge·ha′zi osịmde ufọk, E·li′sha ọfiọk se enye akanamde. Jehovah asian enye. Do enye ete: ‘Sia fo anamde idiọkn̄kpọ emi, akpa mfia Na′a·man eyeyịre fi.’ Ndien edi ntre, ini kiet!

Nnyịn ikeme ndikpep nso nto kpukpru emi? Akpa, nte ke akpana nnyịn itie nte ekpri n̄kaiferi oro, inyụn̄ itịn̄ iban̄a Jehovah. Oro ekeme ndinam ekese ufọn. Udiana, nnyịn ikutan̄ idem nte Na′a·man ke akpa, edi ikpokop uyo asan̄autom Abasi. Ọyọhọ ita, inaha nnyịn isu nsu nte Ge·ha′zi. Nte nnyịn ikemeke ndikpep ekese nto edikot Bible?

2 Ndidem 5:1-27.



Mme Mbụme

  • Nso ke ekpri n̄kaiferi oro asian n̄wan emi ke ndise?
  • N̄wan oro ke ndise edi anie, ndien nso ke n̄kaiferi oro anam ke ufọk n̄wan oro?
  • Nso ke Elisha ọdọn̄ asan̄autom esie ọdọhọ Naaman, ndien ntak emi Naaman ayatde esịt?
  • Nso itịbe ke ini Naaman okopde uyo asan̄autom esie?
  • Ntak emi Elisha mînyịmeke ndibọ enọ Naaman, edi nso ke Gehazi anam?
  • Nso itịbe inọ Gehazi, ndien nso ke nnyịn ikeme ndikpep nto emi?

Mme mbụme efen

Kpep N̄kpọ En̄wen

DI UFAN JEHOVAH

Jehovah Ayanam Fi Enyene Uko

Nso ikeme ndin̄wam fi enyene uko anam mme owo ẹdiọn̄ọ Jehovah?

MME N̄KPỌ NDIDA N̄KPEP BIBLE

Ẹnam Owo Akpamfia Asana!

Kpep se akanade Naaman anam man ẹkọk enye akpamfia.

NDISE ẸDADE ẸKPEP N̄KPỌ

Gehazi Osu Nsu

Ewe nsu iba ke Gehazi okosu? Mịn̄ mbre ndise emi, dọn̄ mme ntọi ke nnennen itie nyụn̄ kpep n̄kpọ to mbụk Bible emi.