Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 68: Nditọ Iren Iba Ẹfiakde Ẹdu Uwem

Mbụk 68: Nditọ Iren Iba Ẹfiakde Ẹdu Uwem

KE AFO akpakpade, ekpetie eka fo didie ke ẹkpenamde afiak odu uwem? Enye akpadara etieti! Edi nte owo oro ama akakpa ekeme ndifiak ndu uwem? Nte akanam otịbe?

Se erenowo emi, ye n̄wan ye ekpri eyeneren oro. Erenowo oro edi prọfet E·li′jah. N̄wan edi ebeakpa Zar′e·phath, ndien eyeneren edi eyen esie. Ọfọn, usen kiet eyeneren emi ọdọn̄ọ. Enye ọdọn̄ọ ọdiọk akan tutu enye akpa ke akpatre. Do E·li′jah ọdọhọ n̄wan oro ete: ‘Nọ mi eyen oro.’

Elijah ye ebeakpa ye eyeneren esie oro ẹnamde eset

E·li′jah emen obukpo eyen oro ọdọk ubet enyọn̄ okonịm ke bed. Enye ọbọn̄ akam ete: ‘O Jehovah, nam eyen emi afiak odu uwem.’ Ndien eyen oro ọtọn̄ọ ndin̄wek! Do E·li′jah emen enye ọsụhọde onyụn̄ ọdọhọ n̄wan oro ete: ‘Sese, eyen fo odu uwem!’ Emi esịn eka esie adara etieti.

Akpan prọfet Jehovah efen ekere E·li′sha. Enye edi andin̄wam E·li′jah. Edi ekem Jehovah ada n̄ko E·li′sha anam mme utịbe n̄kpọ. Usen kiet E·li′sha aka obio Shu′nem emi n̄wan kiet ọfọnde ido etieti ye enye. Ekem n̄wan emi aman eyeneren.

Usenubọk kiet, ke eyen emi ama okokpon, enye etiene ete esie oro anamde utom ke in̄wan̄. Ke mbuari, enye ofiori ete: ‘Ibuot abiak mi-o!’ Ke ẹma ẹkeda ẹnyọn̄, enye akpa. Eka esie ọfụhọ didie ntem! Iwiwa, enye akada E·li′sha edi.

Ke ini E·li′sha edide enye odụk ubet okodu ye okpo eyen oro. Enye ọbọn̄ akam ọnọ Jehovah, onyụn̄ ana enye ke idem. Ibịghike idem eyen oro ọtọn̄ọ ndifiop, ndien enye asia ikatiaba. Eka esie adat esịt didie ntem ke edikụtde eyen esie ye uwem!

Ata ediwak owo ẹma ẹkpa. Emi anam ubon ye mme ufan mmọ ẹtịm ẹfụhọ. Nnyịn inyeneke odudu ndinam mme akpa n̄kpa eset. Edi Jehovah enyene. Ekem iyekpep nte enye edinamde ediwak million owo ẹfiak ẹdidu uwem.

1 Ndidem 17:8-24; 2 Ndidem 4:8-37.


Mme Mbụme

  • Owo ita oro ke ndise emi ẹdi mmanie, ndien nso itịbe inọ ekpri eyeneren emi?
  • Nso akam ke Elijah ọbọn̄ aban̄a ekpri eyeneren emi, ndien nso itịbe ke oro ebede?
  • Andin̄wam Elijah ekere didie?
  • Ntak emi ẹkotde Elisha edi ufọk n̄wan kiet ke Shunem?
  • Nso ke Elisha anam, ndien nso itịbe inọ okpo eyen oro?
  • Nte Elijah ye Elisha ẹwụtde, nso odudu ke Jehovah enyene?

Mme mbụme efen

Kpep N̄kpọ En̄wen

Da nọ utuakibuot akpanikọ!

Ini ewe ke okpoyom enyene uko ke n̄kpọ Abasi?