Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 65: Ẹbahade Obio Ubọn̄

Mbụk 65: Ẹbahade Obio Ubọn̄

NTE ỌMỌFIỌK ntak owo emi awaide ọfọn̄idem esie mbak mbak? Jehovah ọkọdọhọ enye anam oro. Owo emi edi A·hi′jah, prọfet Abasi. Nte ọmọfiọk se prọfet edide? Enye edi owo oro Abasi asiande se iditịbede ke mbemiso.

Ahijah ye Jeroboam

Mi, A·hi′jah etịn̄ ikọ ọnọ Jer·o·bo′am. Jer·o·bo′am edi owo emi Solomon onịmde ndinam ndusụk utom ubọp ufọk esie. Ke A·hi′jah osobode Jer·o·bo′am mi ke usụn̄, A·hi′jah anam esen n̄kpọ. Enye osio obufa ewura emi enye esịnede awak ke mbak duopeba. Enye ọdọhọ Jer·o·bo′am: ‘Da mbak duop ke idem fo.’ Nte afo ọmọfiọk ntak A·hi′jah ọnọde Jer·o·bo′am mbak 10?

A·hi′jah anam an̄wan̄a ete Jehovah ọmọn̄ ọbọ Solomon obio ubọn̄. Enye ete Jehovah eyenọ Jer·o·bo′am esien 10. Emi ọwọrọ ete ke esien iba kpọt ẹdisụhọ ọnọ Re·ho·bo′am eyen Solomon ndikara.

Ke Solomon okopde se A·hi′jah ọdọhọde Jer·o·bo′am, enye ayat esịt etieti. Enye odomo ndiwot Jer·o·bo′am. Edi Jer·o·bo′am efehe aka Egypt. Ekem, Solomon akpa. Enye ekedi edidem ke isua 40, edi ke emi ẹnam Re·ho·bo′am eyen esie edidem. Ko ke Egypt, Jer·o·bo′am okop ete Solomon akpa, ntre enye afiak ke Israel.

Re·ho·bo′am idighe eti edidem. Enye akam ọdiọk ye mme owo akan nte ete esie Solomon ọkọdiọkde. Jer·o·bo′am ye ndusụk akpan owo ẹtiene Edidem Re·ho·bo′am eben̄e enye ọfọn akan ye mme owo. Edi Re·ho·bo′am ikpan̄ke utọn̄. Ke akpanikọ, enye akabade ọdiọk akan mbemiso. Ntre, mbon obio ẹnam Jer·o·bo′am edidem ndikara esien 10, edi mme esien iba eke Benjamin ye Judah ẹnịm Re·ho·bo′am nte edidem mmọ.

Jer·o·bo′am iyomke ikọt esie ẹka Jerusalem ẹketuak ibuot ke temple Jehovah. Ntre enye anam nditọ enan̄ gold iba onyụn̄ anam mbon obio ubọn̄ esien duop ẹtuak ibuot ẹnọ mmọ. Ibịghike, isọn̄ ọyọhọ ye ubiat ibet ye obom.

Afanikọn̄ odu n̄ko ke obio ubọn̄ esien iba. Isịmke isua ition nte Re·ho·bo′am akakabade edidem, edidem Egypt edi ndin̄wana ye Jerusalem. Enye ada uwak n̄kpọ uto ke temple Jehovah ọnyọn̄. Ntre edi ke ibio ini kpọt ke temple etie ukem nte ini ẹkebọpde.

1 Ndidem 11:26-43; 12:1-33; 14:21-31.



Mme Mbụme

  • Owo iba oro ẹdude ke ndise emi ẹkere didie, ndien mmanie ke mmọ ẹdi?
  • Nso ke Ahijah anam ye ọfọn̄idem esie, ndien nso ke emi ọwọrọ?
  • Nso ke Solomon odomo ndinam Jeroboam?
  • Ntak emi mme owo ẹnamde Jeroboam edidem ndikara esien duop?
  • Ntak emi Jeroboam anamde nditọ enan̄ gold iba, ndien nso itịbe inọ isọn̄ oro ke mîbịghike?
  • Nso itịbe inọ obio ubọn̄ esien iba ye temple Jehovah ke Jerusalem?

Mme mbụme efen