Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

N̄wed Mi eke Mme Mbụk Bible

Mbụk 64: Solomon Ọbọp Temple

Mbụk 64: Solomon Ọbọp Temple

MBEMISO David akpade, enye ama ọnọ Solomon mme ndutịm otode Abasi ndida mbọp temple Jehovah. Ke ọyọhọ isua ukara esie inan̄, Solomon ọtọn̄ọ ndibọp temple, ndien ada isua itiaba ye ubak ndikụre enye. Ediwak tọsịn owo ẹnam utom ke temple, ndien ufọk oro akpa ata ekese okụk. Emi edi koro ẹdade ekese gold ye silver ke enye.

Temple enyene akpan ubet iba, nte ataya ekenyenede. Edi mme ubet emi ẹkpon utịm ikaba ẹkan eke ataya. Solomon anam ẹda ekebe ediomi ẹdisịn ke esịt ubet temple, ndien ẹdọn̄ mme n̄kpọ eken ẹkenịmde ke ataya ke ubet eken.

Ke ẹkụrede temple, ẹnịm akamba usọrọ. Solomon ọtọn̄ edọn̄ ke iso temple ọbọn̄ akam, nte afo ekemede ndikụt ke ndise. Solomon ọdọhọ Jehovah ete, ‘Idem ofụri heaven ikponke ikem ndidụk fi, kam dise ndien, temple emi. Edi, O Abasi mi, mbọk, kop uyo ikọt fo ini ekededi mmọ ẹbọn̄de akam ke itie emi.’

Edidem Solomon ke ọbọn̄ akam

Ke Solomon okụrede akam emi, ikan̄ oto heaven ọsụhọde. Enye ata mme uwa unam oro ẹkenọde. Ndien nyayama un̄wana otode Jehovah ọyọhọ temple. Emi owụt ete Jehovah ke okop, ndien ke enye enem esịt ye temple ye akam Solomon. Temple akabade ebiet mme owo ẹdide ndituak ibuot ke emi, utu ke ataya.

Ke anyan ini, Solomon akara ke ọniọn̄ ọniọn̄ usụn̄, ndien mme owo enem esịt. Edi Solomon ọdọ ediwak iban ẹtode esen idụt oro mikponoke Jehovah. Nte afo emekeme ndikụt kiet kotu mmọ atuakde ibuot ọnọ ndem? Ekem, iban esie ẹnam Solomon okpono mme abasi efen n̄ko. Nte ọmọfiọk se itịbede ke Solomon anamde emi? Enye inamke n̄kpọ aba ye mme owo ke mfọnido. Enye akabade abak ibak ndien mme owo inemke aba esịt.

Edidem Solomon ke okpono ndem

Emi anam Jehovah ayat esịt ye Solomon, ndien asian enye: ‘Nyebọ fi obio ubọn̄ nnọ owo efen. Ndinamke emi ke eyo uwem fo, edi ke ini ukara eyen fo. Edi ndibọhọ eyen fo ofụri mbon obio.’ Yak ise nte emi otịbede.

1 Chronicles 28:9-21; 29:1-9; 1 Ndidem 5:1-18; 2 Chronicles 6:12-42; 7:1-5; 1 Ndidem 11:9-13.



Mme Mbụme

  • Ada Solomon isua ifan̄ ndikụre edibọp temple Jehovah, ndien ntak emi enye akpade ekese okụk ntre?
  • Temple oro enyene akpan ubet ifan̄, ndien nso ke ẹsịn ke esịt ubet?
  • Nso ke Solomon etịn̄ ke akam esie ke ini ẹkụrede temple oro?
  • Didie ke Jehovah owụt ke imọ imenem esịt ye akam Solomon?
  • Nso ke iban Solomon ẹnam enye anam, ndien nso itịbe inọ Solomon?
  • Ntak emi Jehovah ayatde esịt ye Solomon, ndien nso ke Jehovah asian enye?

Mme mbụme efen